സമാന്തരം

വണ്ടിക്കാള

2010-12-22T04:17:00.000-08:00

22. വണ്ടിക്കാള

മൂളിയും ഞെരങ്ങിയും
സിഗ്നനുകളിൽ കാത്തുനിന്നും
കിതച്ചും കുതിച്ചും
എവിടേയ്ക്കെന്നറിയാതെ
നടന്നു നീങ്ങുന്ന
ഒരു വണ്ടിക്കാളയാണു
പ്രണയം

പാവറട്ടി പെരുന്നാള്‍ ഇന്ന്.

2010-04-23T20:31:00.000-07:00

അന്നമനട ആശാന്റെ പഞ്ചവാദ്യം.

ചില ചിത്രങ്ങള്‍

ബസ്

2010-02-19T02:24:00.000-08:00

ചുവപ്പും മഞ്ഞയുമടിച്ച
ചങ്കില്‍ ഇരുട്ടു കട്ടപിടിച്ച
ചരിവില്‍ ചാഞ്ചാട്ടമസ്ഥിക്കുപിടിച്ച
പ്രണയത്തിന്‍ മറുപേരല്ലോ..

ലോകത്തിലെ ഏറ്റവും വലിയ പ്രണയം

2010-01-15T01:44:00.000-08:00

20. ലോകത്തിലെ ഏറ്റവും വലിയ പ്രണയം

അതുകൊണ്ട്
ലോകത്തിലെ ഏറ്റവും
വലിയ പ്രണയമേത് ?

എനിക്ക് മനസ്സിലായില്ലെങ്കിലും
അവന് പറഞ്ഞു
സൂര്യഗ്രഹണം..

എന്തുകൊണ്ടെന്നാല്‍
അവന്റെ പ്രായം
പത്തും
എന്റേത് പത്തൊന്‍പതുമാണല്ലോ..

പൂച്ച

2010-01-04T23:47:00.000-08:00

19. പൂച്ച

എന്റെ വീട്ടിലെ
കറുത്ത പൂച്ചയും
വെളുത്ത പൂച്ചയും
പ്രണയിച്ചു.

പ്രസവിച്ചു.

ഒരു കറുത്ത പൂച്ചക്കുട്ടിയും
വെളുത്ത പൂച്ചക്കുട്ടിയും
കറുത്ത പൂച്ച
വെളുത്ത പൂച്ചക്കുട്ടിയെയും
വെളുത്ത പൂച്ച
കറുത്ത പൂച്ചക്കുട്ടിയെയും
നക്കിത്തുടച്ചു.

എങ്കിലും
ഞാന്‍ കുണ്ഠിതപ്പെട്ടത്
ഒരു പുള്ളിപ്പൂച്ചക്കുട്ടിയെ
പ്രസവിക്കാതെ
പോയതില്‍
മാത്രം

(തലക്കെട്ട് പൂച്ചയോ പൂച്ചോ ? )

ഓര്‍മ്മ

2010-01-04T05:22:00.000-08:00

18. ഓര്‍മ്മ

ഒരു ഓര്‍മ്മയാണ്
സൌഹ്രദത്തിന്റെ
കെട്ടുപാടുകളഴിച്ചത്

ആ ഓര്‍മ്മയാണ്
മഴയില്‍
തിരിച്ചുവരാനാവാതെ
ഒലിച്ചുപോയതും
തനിച്ചാക്കിയതും..

(18 എപ്പോഴും കനവും കനലുമായിരുന്നല്ലോ..)

ജിഹാദ്

2009-10-23T02:25:00.000-07:00

16. ജിഹാദ്

സുബൈദേ നീയെന്തിനു
ഒരു ജിഹാദിനെ പ്രണയിക്കണം ?
നിനക്ക് പ്രണയിക്കാനും
പാശ്ചാത്തപിക്കാനും
എത്രയോ ലാദന്മാര്‍
പത്രത്താളുകളില്‍
നീണ്ടുകിടന്നുറങ്ങുന്നു..

അടിയന്തരാവസ്ഥ നഷ്ടപ്പെടുത്തിയ ആറുവർ‍ഷങ്ങ- പുസ്തക പ്രകാശനം

2009-10-10T02:30:00.000-07:00

ഇന്ന് കാലത്ത് സാഹിത്യ അക്കാദമിയുടെ വൈലോപ്പിള്ളി ഹാളില്‍ വെച്ച് കെ.എം.പ്രമോദിന്റെ കവിതകളുടെ സമാഹാരം പ്രകാശനം ചെയ്തു.

പ്രമോദിന്റെ ചിരി പോലെ വളരെ പ്രസന്നമായിരുന്നു പുസ്തക പ്രകാശനച്ചടങ്ങുകളും. ജി ഉഷാകുമാരി സ്വാഗതം പറഞ്ഞു. ഗോപീകൃഷ്ണന്‍ അദ്ധ്യക്ഷനായിരുന്നു. കണ്ണൂക്കാരുടെ പാപഭാരം തൃശ്ശൂര്‍ക്കാരേറ്റെടുക്കേണ്ടെന്ന് തുറന്നുപറഞ്ഞുകൊണ്ടുതന്നെ എ.സി. ഹരി ശ്രീ ആറ്റൂര്‍ രവിവര്‍മ്മയില്‍ നിന്നും പുസ്തകത്തിന്റെ പ്രതി ഏറ്റുവാങ്ങിക്കൊണ്ട് പ്രകാശനം നടന്നു. കവി അന്‍ വര്‍ അലി കവിയെയും കവിതയെയും പരിചയപ്പെടുത്തി. പി.പി. രാമചന്ദ്രന്‍, വിഷ്ണുപ്രസാദ്, ശൈലന്‍, സി.ആര്‍ പരമേശ്വരന്‍ എന്നിവരും ബ്ലോഗര്‍മാരായ കൈതമുള്ള്, കുറുമാന്‍, അചിന്ത്യ, കോമരം, ജെപി വെട്ടിയാട്ടില്‍, കുട്ടന്മേനൊന്‍, പിന്നെ കെ.കെ.ടി.എം കോളജിലെ വിദ്യാര്‍ത്ഥികളും ചടങ്ങില്‍ സംബന്ധിച്ചു.

എന്റെ മൊബൈലില്‍ എടുത്ത ചില ചിത്രങ്ങള്‍

http://pramaadam.blogspot.com/

കൊടുക്കാന്‍ മറന്നത്..

2009-10-05T05:33:00.000-07:00

16. കൊടുക്കാന്‍ മറന്നത്

ഗള്‍ഫുകാരന്‍
അവള്‍ക്ക് കൊടുത്തിരുന്നതും
കൊടുത്തുകൊണ്ടേയിരിക്കുന്നതും
പ്രണയം

ഗള്‍ഫുകാരന്‍
ലീവില്‍ കൊടുത്തിരുന്നതും
കൊടുത്തുകൊണ്ടേയിരിക്കുന്നതും
അത്തറിന്റെ മണം

ഇന്നും
ഗള്‍ഫുകാരന്‍
കൊടുക്കാന്‍ മറന്നതും
അയല്‍ക്കാരന്‍
കൊടുക്കാന്‍ മറക്കാത്തതും

കാമം.

(ജോസഫേ നിന്നോട് പറയാന്‍ എനിക്ക് ചവറുകളില്ല..)

മറന്നുവെച്ചത്

2009-09-25T23:31:00.000-07:00

15.മറന്നുവെച്ചത്

പ്രണയം മൂത്ത് തെങ്ങില്ക്കയറിയ ബ്ലോഗര്‍
പ്രാണസഖിയ്ക്കായ് ഒരു കരിക്കിട്ടു.
പ്രാണന്‍ പരവേശമായപ്പോള്‍
തനിയ്ക്കായ് ഒരു കുല കരിക്കിട്ടു.

എങ്കിലും...

നടുനിവര്‍ത്തുമ്പോള്‍
പ്രാണസഖിയ്ക്ക് വേണ്ടത്
അതുമാത്രം

തെങ്ങിന് മുകളില്‍ മറന്നു വെച്ച
ആ പഴയ കത്തി..

(പ്രചോദനം : ജെ പി യുടെ ഈ പോസ്റ്റ്. )

വാഴ്ത്തപ്പെട്ട പതിവുകള്‍

2009-09-23T05:07:00.000-07:00

14. വാഴ്ത്തപ്പെട്ട പതിവുകള്‍

ചെമ്പട്ടുപുതച്ച
പൂമരത്തണലിലെ
ക്ലാസ് കട്ടു ചെയ്ത
പതിനൊന്നുമണിയുടെ
കുറുകലുകള്‍,

കാന്റീനിലെ
ഒഴിഞ്ഞ മൂലയിലെ
ആവി പറക്കുന്ന
പരിദേവനങ്ങള്‍,

കെമിസ്ട്രി ലാബിലെ
പുകഞ്ഞുയരുന്ന
തെറ്റിയ രസതന്ത്രങ്ങള്‍,

എന്തിനുമൊടുവില്‍
കൂര്‍ത്ത ചൂണ്ടിലെ
അസൂയയും
തുളുമ്പിയ മിഴികളും

എല്ലാം
വാഴ്ത്തപ്പെട്ട പതിവുകള്‍ മാത്രം

പ്രണയത്തെക്കുറിച്ച് 101 ചവറുകള്‍ (11 - 13)

2009-09-18T20:58:00.000-07:00

11. കുന്നിക്കുരു

കുഞ്ഞിക്കുട്ടന്റെ മുത്തശ്ശി
കുന്നിനിടയിലൂടെ
കൂവത്തിന്നരികിലൂടെ
കുന്നിക്കുരു പെറുക്കാന്‍ പോയി
കുന്നിക്കുരുക്കളെല്ലാം
കുഞ്ഞിക്കുട്ടന്റെ മുത്തശ്ശിയെ
കൂട്ടം കൂടിയെടുത്ത്
കൊണ്ടുപോയി
പ്രണയിക്കാന്‍

12. പ്രേമലേഖനം

അവിവാഹിതനായ
കവിതയെഴുതുന്ന
വയസ്സറിയാത്ത
കുഞ്ഞിരാമന്‍ മാസ്റ്റര്‍
നിരക്ഷരയായ
സുന്ദരിയായ
വയസ്സറിയാത്ത
കുഞ്ഞാമിനയ്ക്കൊരു
പ്രേമലേഖനം കൊടുത്തു.
കുഞ്ഞാമിന
കരഞ്ഞതെന്തിനെന്ന്
കുഞ്ഞിരാമന്‍ മാസ്റ്റര്‍ മാത്രം
കുണ്ഠിതപ്പെട്ടു.

13. പൂമരം

ചെമ്പട്ടുപുതച്ച
പൂമരമേ
കണ്ടാലറിയാതെയായി നിന്നെ
മിണ്ടുവാനില്ല നിന്നോടു
ഇലകളെ മൂടിയ നീ
യെന്നേയെനിക്കന്യയായ്..

പ്രണയത്തെക്കുറിച്ച് 101 ചവറുകള്‍ (6 - 10 ‌)

2009-09-17T20:18:00.000-07:00

6. മഷിക്കുപ്പി

കിഴക്കോട്ടും തെക്കോട്ടും പാഞ്ഞിട്ടാകാം
ഒരു സൈക്കിള്‍
സ്റ്റാന്ഡിലിരുന്ന് ഉറങ്ങുന്നത്

താഴോട്ടും മുകളിലോട്ടും പറന്നിട്ടാകാം
ഒരു പന്ത്
വെള്ളത്തില്‍ പൊങ്ങിക്കിടക്കുന്നത്

തിരിച്ചും മറിച്ചും കത്തുകളെഴുതിയിട്ടാവാം
ഞാനും നീയും
ഒഴിഞ്ഞ മഷിക്കുപ്പിയെ സ്നേഹിച്ചുതുടങ്ങിയത്.

7.കഥ

എങ്ങനെ ഞാനവളെ
ആട്ടിപ്പുറത്താക്കും
അവള്‍ മരിച്ചാല്‍
എന്റെ കഥയും..

8. സന്ധ്യ

സന്ധ്യ

ഒരു പിച്ചാത്തിയെടുത്ത്
നടന്നു
പകലിനെ കീറിമുറിക്കാന്‍
ഊട്ടിയിലെ നിശ്വാസങ്ങള്‍
സാക്ഷിയാക്കി..

(ഊട്ടി : തൃശ്ശൂര്‍ കേരളവര്‍മ്മ കോളജിലെ പ്രണയകൂടാരം )

9. കാക്ക

എന്റെ വീട്ടില്‍
വിരുന്നുവന്ന കാക്ക
കലമുടച്ചു,
നിറഞ്ഞ കാടിവെള്ളത്തില്‍
തല കുളിച്ചു.

ഒരു വറ്റുപോലും തിന്നാതെ
പറന്നുപോയി
ഉടയാത്ത മണ്‍കലങ്ങള്‍ തേടി.

10. ഇഷ്ടം

നിനക്ക് ചുവപ്പുമതി
എനിക്ക് നീലയും
നിനക്ക് കൃഷ്ണമണി മതി
എനിക്ക് കടുകുമണിയോളം മതി.

പ്രണയത്തെക്കുറിച്ച് 101 ചവറുകള്‍ (1 - 5 ‌)

2009-09-16T20:49:00.000-07:00

1. ഇലകള്‍

നമുക്കൊപ്പം നടന്ന
വഴിവക്കിലെ പൂമരം
ഇലകളെ തനിച്ചാക്കി.

2. മൌനം

ആകാശത്തോളം വളര്‍ത്തുവാന്‍
ഭൂമിയോളം തളര്‍ന്നു.

3. നിശാശലഭം

സ്വപ്നം കൊണ്ട് നിന്നെയുറക്കാന്‍
പകലോളം കാത്തുകിടന്നു

4. പറയാനുള്ളത്

നിന്നോട് പറയാനുള്ളതെല്ലാം
പറഞ്ഞ് പറഞ്ഞ്
പറന്നുപോയി.

5. താജ്മഹല്‍

നീയൊരു മുംതാസായിരുന്നില്ലെങ്കില്‍
എനിക്കൊരു താജ്മഹല്‍
എന്നേ പണിയുമായിരുന്നു..

(ആമുഖം :ഇതൊരു സീരീസായി എഴുതുന്നതാണ്. വിമര്‍ശനങ്ങള്‍ ക്ഷണിക്കുന്നു. കവിതയില്‍ കൈവെച്ച് പൊള്ളിയ അനുഭവം മാത്രമേയുള്ളൂ. എങ്കിലും എഴുതാതിരിക്കാന്‍ സാധിക്കാത്തതുകൊണ്ടുമാത്രമാണ് എഴുതുന്നത്. )

പ്രണയം

2009-09-11T04:11:00.000-07:00

വൃദ്ധയായ കന്യാസ്ത്രീ
വാര്‍ഷികപ്പതിപ്പു വായിക്കുന്നതാണ്
വെന്ത വരികള്‍ക്കിടയില്‍
വെണ്ണീറു പരതുന്നതാണ്

പന്നിപ്പനിക്കാരനു ചുറ്റും
നേഴ്സുമാര്‍ പരതുന്നതാണ്
നളിനിജമീല തത്വമസിയുടെ
നവീനപതിപ്പിറക്കുന്നതാണ്

കാള വേല

2009-08-26T22:14:00.000-07:00

ഓണക്കാലമല്ലേ.. ഒരു നാടന്‍പാട്ട് ആയ്ക്കോട്ടെ..

കഴിഞ്ഞ ദിവസം എളവള്ളി ഷാപ്പിനു മുന്നില്‍ വെച്ച് കോരച്ചനെ കണ്ടിരുന്നു. കോരച്ചനു അപ്പോള്‍ എന്നോട് ഭയങ്കര ഇഷ്ടം. ഇഷ്ടങ്ങള്‍ക്ക് എതിരു നില്‍ക്കുന്നത് ശരിയല്ലല്ലോ.. പ്രത്യേകിച്ചു വയസ്സായവരുടെ.. ഷാപ്പിലെ സപ്ലയര്‍ കം മെയിന്‍ കുക്കായ വിശാലാക്ഷി(യക്ഷിയെന്ന് കോരച്ചന്‍ ഇടയ്ക്കിടെ കണ്ണിറുക്കി ചെവിയില്‍ പറയുന്ന കക്ഷിതന്നെ) ചേച്ചിയുടെ സ്പെഷല്‍ ഒണക്കമീന്‍ ഫ്രൈ ചെമ്പട്ടുപുതച്ച എണ്ണം പറഞ്ഞ പല്ലുകള്‍ക്കിടയില്‍ ഓരോന്നായി എടുത്തുവെയ്ക്കുമ്പോള്‍ പാടിയ ഒരു നാടന്‍ പാട്ടാണിത്..
വാ മൊഴിയില്‍ നിന്നും വരമൊഴിയിലേക്കാക്കിയതിന്റെ ചില പ്രശ്നങ്ങളുണ്ട്.

പാള കൊണ്ടല്ലോ കാള
കാള കഴുത്തില് മാല
വള്ളി ചരടില് കോര്‍ത്ത്
മെല്ലെ നടക്കുന്നു മോള്
പുല്ലരിയാനൊന്നും വയ്യ
നെല്ല് കടിക്കല്ലേ കാളേ

പാറോമ്മ കണ്ടാല്‍ പിരാകും
വേഗം നടക്കെടി കാളേ
പടികടന്നപ്പുറം മോള്
പടിയിലുടക്കിയ്യ കാള

വേഗം നടക്കെടി കാളേ
വെയില് മൂക്കുന്നെടി വേഗം
പുല്ലു പറിച്ചുകാണിച്ചു
പാടത്തിറങ്ങി വലിച്ചു
പാള കുരുങ്ങിക്കിടപ്പൂ
മോളറിയുന്നില്ല പാവം

പിന്നെ തിരിച്ചു നടന്നു
ഒന്നു കൊടുത്തു തലയ്ക്ക്
പാവാടത്തുമ്പില്‍ പിടിച്ച്
ഉമ്മറത്തൂണില്‍ തളച്ചു

ചാടിക്കളിക്കാതെ നിന്നോ
കാടിയെടുക്കട്ടെ ഞാനും
കണ്ണന്‍ ചിരട്ടയീല്‍ വെള്ളം
ഇറയത്ത് കൊണ്ട് വെയ്ക്കുന്നു
കയ്യതിലിട്ട് കലക്കി
പയ്യെ വിളിപ്പു കുടിക്കാന്‍
കിട്ടുന്ന നേരം കുടിച്ചോ
അല്ല്ങ്കിലാടിന്ന് കേട്ടോ

ഒക്കെയും നോക്കിച്ചിരിച്ച്
മോളേ ഞാന്‍ വാരിയെടുത്തു
നല്ലമോളിങ്ങിനെ വേണം
എല്ലാ പഠിച്ചു വളരാന്‍..

പ്രമേഹ രോഗികളേ ഇതിലേ.. ഇതിലേ..

2009-08-26T04:40:00.001-07:00

രണ്ടുമാസം കഴിഞ്ഞാല്‍ ഇന്ത്യാ മഹാരാജ്യത്ത് പഞ്ചാരയില്ലാതാവും.... ബേക്കറികള്‍ പഞ്ചസാരയില്ലാതെ ഷുഗര്‍ലെസ് കേക്കുകള്‍, ലഡു, ജിലേബി എന്നിവയുണ്ടാക്കിത്തുടങ്ങും..
കാണാന്‍ പോകുന്ന പൂരം പറഞ്ഞറിയിക്കേണ്ട...

ആരു ജയിക്കും ?

2009-04-16T09:51:00.000-07:00

ആരു ജയിക്കും ?

വലിയൊരു ചോദ്യം തന്നെയാണത്.

കേരളത്തിന്റെ ഇലക്ഷന്‍ മാമാങ്കം ഇന്ന് പര്യവസാനിച്ചു.

കഴിഞ്ഞ കുറച്ചു ദിവസങ്ങളിലായി കേരളത്തില്‍ ഒരു ഓട്ടപ്രദക്ഷിണം നടത്താനായപ്പോള്‍ വിജയ സാധ്യതയെ കുറിച്ചു ലഭിച്ച ചില സൂചനകള്‍ ഇവിടെ കുറിക്കൂന്നു.

ഇടതുപക്ഷത്തിനു അനുകൂലമായ മണ്ഡലങ്ങള്‍.

1. ആറ്റിങ്ങല്‍
2. കൊല്ലം
3. ആലത്തൂര്‍ (ജനതാദളിന്റെ ക്രിസ്ത്യന്‍ - മുസ്ലീം വോട്ടുകളുടെയും സ്വാധീനമില്ലെങ്കില്‍ മാത്രം )
4. വയനാട് ( മുരളീധരന്‍ കൂടുതല്‍ വോട്ട് പിടിച്ചില്ലെങ്കില്‍ സി.പി.ഐയ്ക്ക് ഇത്തവണ കേരളത്തില്‍ നിന്നു ഒരു എം.പിയും ലോകസഭ കാണില്ല. )
5. വടകര (പഴയ ഭൂരിപക്ഷമില്ലെങ്കിലും സതീദേവി തന്നെ )
6. കണ്ണൂര്‍
7. കാസറഗോഡ് (രണ്ടാം സ്ഥാനത്ത് ഒരു പക്ഷേ ബി.ജെ.പി സ്ഥാനാര്‍ത്ഥി എത്തിക്കൂടെന്നില്ല)

ഐക്യമുന്നണിക്ക് അനുകൂലമായ മണ്ഡലങ്ങള്‍

1. മാവേലിക്കര
2. പത്തനംതിട്ട
3. കോട്ടയം
4. എറണാംകുളം
5. ആലപ്പുഴ
6. ചാലക്കുടി
7. തൃശ്ശൂര്‍
8. പൊന്നാനി
9. മലപ്പുറം

വോട്ടിങ്ങിലെ ചെറിയ വ്യത്യാസങ്ങള്‍ മാത്രമായിരിക്കും മറ്റു മണ്ഡലങ്ങളിലെ വിജയ സാധ്യത നിര്‍ണ്ണയിക്കുന്നത്.

1. തിരുവനന്തപുരം (പോളിങ് കുറഞ്ഞത് ശശി തരൂരിനു ഗുണകരമാവില്ല)
2. ഇടുക്കി ( ശക്തമായ മത്സരം നടക്കുന്ന മണ്ഡലം)
3. പാലക്കാട് ( ജനതാദളിന്റെയും ബി.ജെ.പിയുടേയും വോട്ടുകള്‍ നിര്‍ണ്ണായകം)
4. കോഴിക്കോട് (ജനതാദളിന്റെ സ്വാധീനം ശക്തമായില്ലെങ്കില്‍ മുഹമ്മദ് റിയാസിനു തന്നെ വിജയ സാധ്യത)

ഗുരുവായൂര്‍ ആനയോട്ടം ഗോപീകണ്ണന്‍ ഒന്നാമത്

2009-03-08T00:59:00.000-08:00

വലത്തേയറ്റത്ത് പദ്മനാഭന്‍.

അച്യുതന്‍ - ഇവന്‍ എന്നും രണ്ടാമന്‍ മാത്രം

ഇവന്‍ ഗോപീകണ്ണന്‍ - വിജയികള്‍ എന്നും ശാന്തരായേ നില്‍ക്കാറുള്ളൂ.തലയെടുപ്പില്ലെങ്കിലും ഉല്‍സവത്തിനു തിടമ്പ് ഇവനുമാത്രം

ആനകളെ ഇങ്ങനെയിട്ടോടിക്കുന്നത് ഏതാചാരത്തിന്റെ പേരിലാണെങ്കിലും എതിര്‍ക്കപ്പെടേണ്ടതല്ലേ ?

പാമ്പാടി രാജന്‍.

2009-01-20T08:15:00.000-08:00

തെക്കുനിന്നും വരുന്ന ഗജ വീരന്മാരൊന്നും പൂരക്കളരിയില്‍ ശോഭിക്കാറില്ല. അതിനൊരപവാദമാണ് പാമ്പാടി രാജന്‍. കറുപ്പിന്റെ അഴകൊന്ന് വേറെ തന്നെയാണ്. മാത്രമല്ല., കേരളത്തിലെ നാടനാനകളില്‍ കേമന്‍ ഇന്നും പാമ്പാടി രാജന്‍ തന്നെ.
(ഇന്ന് രാവീലെ വീടിനടുത്തെ ക്ഷേത്രത്തില്‍ ഉത്സവത്തിനു വന്നപ്പോള്‍ എടുത്ത ചില പടങ്ങള്‍)

ചില കുമരകം കാഴ്ചകള്‍

2009-01-13T01:26:00.000-08:00

ഒരു പൊട്ടകാമറയും തൂക്കിപ്പിടിച്ച് നടന്നതുകൊണ്ടായില്ല. പടമെടുക്കണം. പടമെടുക്കാനുള്ള കഴിവുവേണം. സെന്‍സിബിലിറ്റി വേണം. എന്നൊക്കെ മമ്മുട്ടി ശൈലിയില്‍ കുറച്ചുകാലമായി കൂടെ നടക്കുന്ന മഹിളാമണി ഡയലോഗടിച്ചപ്പോള്‍ പിന്നെ രണ്ടും കല്പിച്ചെടുത്ത ചില പടങ്ങള്‍

അവള്‍ വരുന്നു.. വീണ്ടും..

2008-09-14T19:44:00.000-07:00

അവള്‍ വീണ്ടും വരുന്നു... പുതിയ ആടയാഭരണങ്ങളിഞ്ഞ്...
ജനകോടികളുടെ വിശ്വസ്ഥ സ്ഥാപനം ...
തൃശ്ശൂര്‍ക്കാരുടെ രോമാഞ്ചം..

ചരിത്ര നായിക...

ഗിരിജ പിക്ചര്‍ പാലസ്

കുഞ്ഞബ്ദുള്ളയുടെ കുത്തിത്തിരിപ്പുകള്‍

2008-08-28T01:03:00.000-07:00

മാതൃഭൂമി ആഴ്ചപ്പതിപ്പിന്റെ പേജുകളുടെ എണ്ണം കൂട്ടിയപ്പോള്‍ ഗുണം മെച്ചപ്പെടുമെന്ന് കരുതിയത് വെറുതെയായിപ്പോയി. പല പുതിയ പംക്തികളും ഈയിടെ തുടങ്ങുകയുണ്ടായി. ഇന്റര്‍നെറ്റില്‍ നിന്നും വികലമായ പരിഭാഷയോടെ പകര്‍ത്തിയെഴുതിയ ലേഖനങ്ങളും മാങ്ങയോ വലുത് തേങ്ങയോ വലുത് എന്ന രീതിയിലുള്ള ലേഖനങ്ങളും കൊണ്ട് മാതൃഭൂമി ഒരു പലചരക്കുകടമാത്രമായി അവശേഷിച്ചുകൊണ്ടിരിക്കുന്നു.

മലയാളി ബ്ലോഗര്‍മാരെ മുഴുവന്‍ അമേധ്യം മണത്തു നോക്കുന്നവരായി ചിത്രീകരിച്ച മുഖപടമായി ഒരു വര്‍ഷം മുമ്പ് ബ്ലോഗുകളെ മുഴുവന്‍ അധിക്ഷേപിച്ചിറങ്ങിയ മാതൃഭൂമി ഈയിടെയായി 'ബ്ലോഗന'എന്ന ഒരു സ്ഥിരം പംക്തിയും തുടങ്ങിയിരിക്കുന്നു.

ഇതിനിടയിലാണ് ഈയാഴ്ച(ആഗസ്ത് 31-ം ലക്കം) പുനത്തില്‍ കുഞ്ഞബ്ദുള്ളയുടെ നോമ്പ് വിശേഷങ്ങള്‍ കാണുന്നത്. പുനത്തില്‍ കുഞ്ഞബ്ദുള്ളയുടെ ലേഖനങ്ങളും ആത്മകഥനങ്ങളും ലളിതമായ ഭാഷയായതുകൊണ്ടാണ് പലപ്പോഴും വായിച്ചു നോക്കുന്നത്. സംഭവങ്ങളായി വിവരിക്കുന്ന പല ആത്മകഥനങ്ങളുടെയും പരിണാമഗുപ്തി പലപ്പോഴും വായനക്കാരനെ പുനത്തിലില്‍ നിന്നും അകറ്റുന്നതായി കാണാം.

ഈയാഴ്ചയില്‍ 'ഞാനോ ദൈവമോ ആരാണ് ഒളിച്ചുകളിക്കുന്നത് ?' എന്ന ലേഖനത്തിലെ ഒരു സംഭവം താഴെ കുറിക്കാം.

* * *

വിശ്വാസത്തെക്കുറിച്ച് എഴുതുമ്പോള്‍ ഞാന്‍ ഒരാളെ കൂടി ഓര്‍ത്തുപോകുകയാണ്. ബീഹാറുകാരനായ മൌലാന ഇനാം ഖുറൈഷി.
എല്ലാ ഹോസ്റ്റലുകളിലും കോമണ്‍ ബാത്ത് റൂമാണ്. വിദ്യാര്‍ഥികളെല്ലാം ഒരു ലോട്ടയുമായാണ് ബാത്ത് റൂമിലേക്ക് പ്രവേശിക്കുക. കുളികഴിഞ്ഞ് ലോട്ടയെടുക്കാന്‍ മറന്നാല്‍ അത് നഷ്ടപ്പെട്ടതു തന്നെ. ഒരു ദിവസം ഒരു ലോട്ട അനാഥമായി കിടക്കുന്നതു കണ്ടപ്പോള്‍ ഞാനത് കരസ്ഥമാക്കി. സഹമുറിയന്‍ ഇബ്രാഹിം കുട്ടിയോടും വിവരം പറഞ്ഞു. അത് അവിടെ കിടക്കട്ടെ എന്നായി കുട്ടിയും. ഒരു ദിവസം അതുമായി ടോയിലറ്റിലേക്ക് പോകുമ്പോള്‍ മൌലാന ഇനാം ഖുറൈഷി കുളികഴിഞ്ഞ് എതിരെ വരുന്നു. ഞാന്‍ സലാം പറഞ്ഞു. അദ്ദേഹവും. അദ്ദേഹം എന്റെ കൈയിലെ ലോട്ട സൂക്ഷിച്ചു നോക്കിക്കൊണ്ട് ചോദിച്ചു.
'ഇതാരുടെ ലോട്ടയാണ് ?''
'എന്റേതു തന്നെ. എന്താ സംശയം ?''
ഞാന്‍ പറഞ്ഞു.
ഒരു ചെറിയ ഭയം പതുക്കെ ഉണരാന്‍ തുടങ്ങി.
എന്റെ കയ്യില്‍ നിന്നു അദ്ദേഹം ലോട്ട വാങി തിരിച്ചും മറിച്ചും പിന്നെ സൂക്ഷ്മമായി അടിയിലും നോക്കിക്കൊണ്ട് പറഞ്ഞു
'അബ്ദുല്ലാ സാബ്.. ഈ ലോട്ട എന്റേതാണ്.. '
ഞാന്‍ വിട്ടുകൊടുക്കുമോ ?
കുറച്ചു നേരം തര്‍ക്കമായി. അവസാനം അദ്ദേഹം ഒരു ഫോര്‍മുല വെച്ചു. ദൈവത്തെ പിടിച്ച് എന്നോറ്റ് സത്യം ചെയ്യാന്‍ പറഞ്ഞു. വേറെ ഒരു മാര്‍ഗവുമില്ല. ഒരു നിമിഷം പോലും ഞാന്‍ ആലോചിച്ചു നിന്നില്ല. ഞാന്‍ ദൈവത്തെ പിടിച്ച് ആണയിട്ടു.. ദൈവത്തെ എനിക്കെന്തു പേടി ?
പുഞ്ചിരിച്ചുകൊണ്ട് എനിക്ക് കൈ തന്ന് അദ്ദേഹം പോയി.
മുറിയിലെത്തിയപ്പോള്‍ ഞാനും കുട്ടിയും കൂടി ലോട്ട പരിശോധിച്ചു. അതിന്റെ അടിയില്‍ മൌലാനാ ഇനാം ഖുറൈശി എന്ന് കൊത്തി വെച്ചിട്ടുണ്ട്. അദ്ദേഹത്തിന്റെ സ്വന്തം പേര്‍.

ദൈവത്തെ പിടിച്ച് ഞാന്‍ ആണയിട്ടപ്പോള്‍ കോമ്പസ്സുകൊണ്ട് അദ്ദേഹം ലോട്ടയുടെ അടിഭാഗത്ത് കോറിയിട്ട പേരു പോലും അപ്രസക്തമായി. അത്രയും കടുത്തതായിരിന്നു അദ്ദേഹത്തിന്റെ വിശാസം.

* * *

ഖുറൈശി ഒരു വിശ്വാസിയായതുകൊണ്ട് തന്റെതെന്ന് ഉറപ്പിച്ച ഒരു ലോട്ട കുഞ്ഞബ്ദുള്ളയ്ക്ക് ചിരിച്ചുകൊണ്ട് സമ്മാനിച്ചതായിരിക്കില്ലേ ?
അതോ
മദ്രാസികള്‍ മുഴുവന്‍ കള്ളന്മാരാണെന്ന് മനസ്സില്‍ ഉറപ്പിച്ചുകൊണ്ട് ഖുറൈശിക്ക് ആ ലോട്ടയിലെ ഉടമസ്ഥാവകാശം വേണ്ടെന്ന് വെച്ചുകൂടെ.. ?

ഏതായാലും കുഞ്ഞബ്ദുള്ളയുടെ ഇതുപോലെയുള്ള വളിപ്പുകള്‍ പ്രസിദ്ധീകരിക്കുന്ന മാതൃഭൂമിക്ക് നമോവാകം.

മാടമ്പി

2008-08-25T04:26:00.000-07:00

ഇവന്‍ മാടമ്പി.. തെച്ചിക്കോട്ടുകാവ് രാമചന്ദ്രന്‍..
ഇന്നലെ (24/08/2008) മുതല്‍ മദപ്പാടില്‍.. മദപ്പാടിന്റെ ആരംഭഘട്ടമായതുകൊണ്ട് വലിയ പ്രശ്നമില്ല. നീരൊലിച്ചുതുടങ്ങിയാല്‍ അടുപ്പിക്കില്ല ഇവന്‍.. ഇന്ന് കേരളത്തിലെ ഏറ്റവും തലയെടുപ്പുള്ളവന്‍ ഇവന്‍ മാത്രം.. ചില ബ്ലോഗേഴ്സിനു വേണ്ടിയാണ് ഇവന്റെ പടമെടുക്കാന്‍ ചെന്നത്. രണ്ടു ദിവസം മുമ്പ് വരെ ശ്രീഗുരുവായൂരപ്പന്‍ എന്ന സീരിയലില്‍ അഭിനയിക്കാന്‍ പോയിരിക്കുകയായിരുന്നു ഇവന്‍..

അഷ്ടമിരോഹിണിനാളില്‍

2008-08-23T23:11:00.000-07:00

അഷ്ടമിരോഹിണിനാളില്‍ ഗുരുവായൂരമ്പലത്തിലെ ചില ദൃശ്യങ്ങള്‍ (മൊബൈല്‍ ഫോണ്‍ ചിത്രങ്ങള്‍..)

ക്ഷേത്രം അലങ്കാരപ്രഭയില്‍

കലാമണ്ഡലം ക്ഷേമാവതിയുടെ നൃത്ത സന്ധ്യ..

അഷ്ടമി രോഹിണി നാളില്‍ കണ്ണന്റെ തിടമ്പേറ്റിയ കുട്ടികൃഷ്ണന്‍..

ഭരതനില്ലാത്ത പത്തുവര്‍ഷങ്ങള്‍

2008-07-30T20:25:00.000-07:00

നമ്മുടെ സ്വപ്നങ്ങള്ക്ക് എത്ര വര്ണ്ണങ്ങളുണ്ടെന്ന് നമുക്ക് കാണിച്ഛു തന്ന ചലച്ചിത്രകാരനാണ് ഭരതന്...

ഓര്മ്മകളില് ദൃശ്യവസന്തത്തിന്റെ ഇതളുകള് വിരിച്ചിട്ട് പത്തുവര്ഷങ്ങള് കടന്നുപോയിരിക്കുന്നു..

പലതും പറയാന് മടിക്കുന്ന നമ്മുടെയെല്ലാം കാപട്യങ്ങള്ക്കുമേലെയാണ് പച്ചയായ മോഹങ്ങളുടെ ബ്രഷുകൊണ്ട് ഭരതേട്ടന് ഒരു പാട് സ്വപ്നങ്ങള് വരച്ഛിട്ടത്..

മണ്ണിന്റെ ചൂടിനും പെണ്ണിന്റെ ചൂരിനും നിറങ്ങളുണ്ടെന്ന് അങ്ങനെ നമ്മളറിഞ്ഞു.. ആ നിറങ്ങള്ക്ക് സംഗീതമുണ്ടെന്നും..

ഭരതനു സമം ഭരതന് മാത്രം..

ഇന്നലെ ഭരതന്റെ പത്താം ചരമവാര്ഷികം സാംസ്കാരിക നഗരത്തില് സ്മൃതിയുടെ കേളികൊട്ടായി. ഭരതനെ സ്നേഹിക്കുന്നവരുടെ ഒരു കൂട്ടായ്മമായി. ഒപ്പം കഴിഞ്ഞ വര്ഷം ഭരതന് സ്മൃതി ഉദ്ഘാടനം ചെയ്ത ഭരത് ഗോപിയോടുള്ള സ്മൃതിയും പങ്കുവെച്ചു. സമൂഹത്തിന്റെ നാനാത്തുറയിലുള്ളവര് ഒത്തു ചേര്ന്നു.

കാവാലം നാരായണപ്പണിക്കര് മുതല് ജയരാജ് വാര്യര് വരെ എല്ലാതലമുറയിലെയും ഭരതന്റെ സ്മൃതി പങ്കുവെക്കാനെത്തിച്ചേര്ന്നു.

ഫൈന് ആര്ട്സ് കോളജിലെ വിദ്യാര്ത്ഥികള് വരച്ച ചിത്രങ്ങളും ഭരതന്റെ പ്രതിമയും പ്രദര്ശിപ്പിച്ഛു.

പിന്നീട് നടന്ന ഭരത സ്മൃതിയില് പലരും ഓര്മ്മകള് പങ്കുവെച്ചു.

കമല് :- മനസിന്റെ പരിണാമത്തിലെവിടെയോ വല്ലാതെ സ്വാധീനം ചെലുത്തിയ ഭരതേട്ടന്റെ സിനിമകളാണ് പ്രയാണം, ആരവം, ഓര്മ്മയ്ക്കായ്..മലയാള സിനിമയ്ക്ക് അഭൌമമായ സുഗന്ധം പരത്തി മൃതിയുടെ ഏതോ കോണുകളിലേക്ക് ചേക്കേറിയപ്പോള് മലയാളത്തിന്റെ പുണ്യമാണ് നഷ്ടപ്പെട്ടത്.

കാവാലം :- അകക്കണ്ണുകൊണ്ട് ശ്രദ്ധിച്ചാല് , ഉള്ക്കാതുകൊണ്ട് സൂക്ഷ്മമായി കാതോര്ത്താല് കാണാം, കേള്ക്കാം, അറിയാം പ്രപഞ്ചത്തിന്റെ തുടിതാളത്തിലാണ് ആ മനസ്സ് സ്പന്ദിക്കുന്നതും വിരലുകള് ചലിക്കുന്നതു. സൃഷ്ടിയുടെ തുടിതാളപ്പെരുക്കത്തിനൊരു വായ്ത്താരിയയി സ്വന്തം സത്ത സമര്പ്പിച്ച ജന്മമായിരുന്നു ഭരതന്റേത്.

ഐ.വി.ശശി :- ഭരതന് ആരായിരുന്നു മലയാളത്തിനു എന്നതിന് ഭരതനില്ലാതെ കടന്നുപോയ 10 വര്ഷങ്ങള് സാക്ഷ്യം വഹികുന്നു.

ജോണ്പോള് :- തിരക്കഥയും സിനിമയുടെ പുതിയ വെളിപാടുകളിലേക്കും വിസ്മയങ്ങളിലേക്കും സാധ്യതകളിലേക്ക് കടന്നു ചെല്ലണമെന്ന് എന്നെ പഠിപ്പിച്ചത് ഭരതനാണ്.

ഭരതന്റെ ചിത്രങ്ങള് :

പ്രയാണം, ഗുരുവായൂര് കേശവന്, ആരവം, അണിയറ, രതിനിര്വ്വേദം, തകര, ചാമരം, ലോറി, ചാട്ട, പറങ്കിമല,നിദ്ര, പാര്വ്വതി,മര്മ്മരം,ഓര്മ്മക്കായി, ഈണം,കാറ്റത്തെകിളിക്കൂട്, എന്റെ ഉപാസന, ഇത്തിരിപൂവേ ചുവന്നപൂവേ, കാതോടുകാതോരം, ചിലമ്പ്, പ്രണാമം,നീലക്കുറിഞ്ഞിപൂത്തപ്പോള്, ഒരു മിന്നാമിനുങ്ങിന്റെ നുറുങ്ങുവെട്ടം, സന്ധ്യമയങ്ങും നേരം, വൈശാലി, ഒരു സായാഹ്നത്തിന്റെ സ്വപ്നം, മാളൂട്ടി, താഴ്വാരം,അമരം, കേളി, ചമയം, പാഥേയം, വെങ്കലം, ദേവരാഗം, മഞ്ജീരധ്വനി, ചുരം.

ചിത്രപ്രദര്‍ശനത്തിന്റെ ബോര്‍ഡ്

കലാധരന്‍, സി.ന്‍. കരുണാകരന്‍

സി.എന്‍. കരുണാകരന്‍ ചിത്രപ്രദര്‍ശനം ഉദ്ഘാടനം ചെയ്യുന്നു.
ഫൈന്‍ ആര്‍ട്സ് കോളജിലെ വിദ്യാര്‍ത്ഥികളുടെ ചിത്രങ്ങള്‍.

വാ‍ട്ടര്‍ ബൈക്

2008-07-28T00:06:00.000-07:00

മഴയില്ലാ മഴയില്ലാ എന്ന് എപ്പോഴും പരാതി.. ഒരൊറ്റ മഴ പെയ്തപ്പോഴേയ്ക്കും ഇങ്ങനെ ..

തലയിലൊരാല്‍

2008-07-10T21:02:00.000-07:00

ആസനത്തില്‍ വാല്‍മുളയ്ക്കുകയെന്നൊക്കെ കേട്ടിട്ടുണ്ട്. ഇത് തലയില്‍ ആലു മുളച്ചതാണ്. രണ്ടു വര്‍ഷമായി അടഞ്ഞു കിടക്കുന്ന എന്‍.എച് 47 ലെ (ആമ്പല്ലൂര്‍ ജംങ്ഷന്‍) ഒരു ഓട്ടുകമ്പനിയുടെ മുകളില്‍ ആലു മുളച്ചപ്പോള്‍..

ദശാവതാരം (?)

2008-06-14T23:34:00.000-07:00

1

' CPRC-26 Station - 12 .. over over..'
'ഉം.. ഓവര് ഓവര്‍..'
'ഇപ്പോള്‍ പേരൂര്‍ക്കട ജങഷനില്‍ നിന്നും തിരിഞ്ഞു കൊണ്ടിരിക്കുകയാണ് .. ഓവര്‍ ഓവര്‍..'
'ആരാണ്.. ഓവര്‍ ഓവര്‍..'
'ദേവസ്വം മന്ത്രിയുടെ കോണ്‍ വോയ്....ഓവര്‍ ഓവര്‍..'
'നേരെ റൈറ്റ് പോകട്ടെ..ഓവര്‍ ഓവര്‍...'
'സര്‍.. നെടുമങ്ങാട്ടേക്ക് ആ വഴിയല്ലല്ലോ ‍..ഓവര്‍ ഓവര്‍..'
' ഈ വഴിയും പോകാമെടേ.. വണ്ടി നേരെ വിട്....ഓവര്‍ ഓവര്‍ ..'
അല്പ സമയത്തിനു ശേഷം

'സര്‍ .. ഇപ്പോ ഹിന്ദുസ്ഥാന്‍ ലാറ്റക്സ്റ്റിനടുത്തെത്തി .. ഓവര്‍ ഓവര്‍..'
'എന്തരടേ.... വണ്ടിയ്ക്ക് ഇത്ര സ്പീഡോ.. റൈറ്റ് തിരിഞ്ഞ് ലെഫ്റ്റിലേക്കെടുക്കൂ ..ഓവര്‍ ഓവര്‍..'
'ബട് സര്‍.. അത് ഊളമ്പാറ മെന്റല്‍ ഹോസ്പിറ്റലല്ലേ..ഓവര്‍..'
'തന്നെ തന്നെ.... മഴക്കാലമല്ലടേയ് ....അങ്ങേരെ ഒരു രണ്ടുമാസം അവിടെ കൊണ്ടിട്.. ഓവര്‍.. ഓവര്‍..'
'സര്‍.. ഹലോ ഹലോ....
കട്ട്

2

' CPRC-26 Station - 12 .. over over..'
'ഉം. ഉം.. ഓവര്‍ ഓവര്‍..'
'സര്‍.. ശംഖുമുഖം റോഡില്‍ സംഘര്‍ഷം..ഓവര്‍.. ഓവര്‍..'
'ആരൊക്കെയാടെയ്...ഓവര്‍ ഓവര്‍..'
'സിപിഐക്കാരും സിപീഎമ്മുകാരും.... അടി തുടങ്ങി സര്‍.. ഓവര്‍..'
'അടിക്കട്ടെടേയ്.. ഓവര്‍.. ഓവര്‍..'
'സര്‍.. ക്രമസമാധാനപ്രശ്നമാണ്.. ഓവര്‍.. ഓവര്‍..'
'അവന്റെ %^%%% പ്രശ്നം. പോയി വല്ല പുട്ടും കടലയും അടിക്കടേയ്...ഓവര്‍ ഓവര്‍..'
കട്ട്

3

' CPRC-26 Station - 12 .. over over..'
'ഉം.. എന്ത് ര് .. ഓവര്‍ ഓവര്‍..'
'സര്‍ ഓപ്പോസിഷന്‍ ലീഡറുടെ കോണ്വോയ് ഇപ്പോള്‍ തമ്പാനൂരെത്തി.. ഓവര്‍ ഓവര്‍..'
'തന്നെ... അങ്ങേര്‍ അവിടെയും എത്തിയോ..ഓവര്‍.. ഓവര്‍..'
'പാസ് ചെയ്യട്ടേ .. ഓവര്‍..ഓവര്‍..'
'അവിടെ ഗണപതി അമ്പമില്ലടേയ്.. അവിടെ സൈഡ് ആക്കൂ.. ഓവര്‍. ഓവര്‍..'
'യെസ് .. സൈഡ് ആക്കി. സര്‍.. ഓവര്‍ ഓവര്‍..'
'അവിടെ നിന്ന് ഒരു തേങ്ങ വാങ്ങി അങ്ങേരുടെ തലമണ്ടയ്ക്ക് ഒരു കുത്ത് കൊടുക്കടെയ്... ബുദ്ധിയൊക്കെ ഒന്ന് ഇളകി വരട്ടെ..ഓവര്‍ ഓവര്‍..'
കട്ട്

4
' CPRC-26 Station - 12 .. over over..'
'ഉവ്വ് .. ഓവര്‍ ഓവര്‍..'
'സര്‍.. ഈസ്റ്റ് പോലീസ് സ്തേഷനില്‍ ഫോണ്‍ അടിക്കുന്നു. ആരു എടുക്കുന്നില്ല..ഓവര്‍.. ഓവര്‍..'
'എടേയ്..അത് ആ ഉരുട്ടിക്കൊല നടന്ന സ്തേഷനല്യോ..ഓവര്‍. ഓവര്‍..'
'സര്‍.. ഓവര് ഓവര്‍..'
'അവന്മാരെ മൊത്തം ഇന്നലെ രാത്രി അണ്ണന്മാര് കയറി ഉരുട്ടിക്കൊന്നടേയ്..ഓവര്‍ ഓവര്‍...'
കട്ട്

5

' CPRC-26 Station - 12 .. over over..'
'അതെ..അതെ.. ഓവര്‍ ഓവര്‍..'
'സര്‍ .. സി.എമ്മിന്റെ കോണ്വോയ് വഴുതക്കാട് ജങഷനിലെത്തി.. ഓവര്‍ ഓവര്‍..'
'ഷൂട്ട് ഹിം.. '
കട്ട്

6

' CPRC-26 Station - 12 .. over over..'
'ശരി ഓവര്‍ ഓവര്‍..'
'സര്‍.. സെക്രട്ടറിയേറ്റിനുമുന്നില്‍ നൂറോളം പിച്ചക്കാര്‍ സമരം ചെയ്യുന്നു..ഓവര്‍ ഓവര്‍..'
'എന്തരടേയ്..ഓവര്‍ ഓവര്‍..'
'അവര്‍ സെക്രട്ടറിയേറ്റിനകത്തേക്ക് തള്ളിക്കയറാന്‍ ശ്രമിക്കുന്നു സര്‍..ഓവര്‍ ഓവര്‍..'
'കടത്തിവിടടേയ്.. കടത്തി വിട് ..അവരു ബന്ധുക്കളെയൊക്കെ ഒന്ന് കണ്ട് പോരട്ട്...ഓവര്‍ ഓവര്‍..
കട്ട്

7

' CPRC-26 Station - 12 .. over over..'
'ഉം.. ഓവര്‍ ഓവര്‍..'
'സര്‍ ആരോഗ്യമന്ത്രിയുടെ കോണ്‍സ്റ്റിപേഷന്‍ ടാബ്ലറ്റ് കഴിഞ്ഞു .. ഓവര്‍ ഓവര്‍..'
'എന്തരടേയ്.. ഓവര്‍ ഓവര്‍...'
'ആ ഏരിയയിലെ മെഡിക്കല്‍ ഷാപ്പില്‍ ഉണ്ടോയെന്ന് ഡിജിപി ചോദിക്കുന്നു സര്‍...ഓവര്‍ ഓവര്‍..'
'അവരെ എടുത്ത് പത്തുമിനിട്ട് ജനറല്‍ ആശുപത്രിയുടെ വരാന്തയില്‍ കൊണ്ടുപോയി ഇരുത്തടേയ്.. മലബന്ധം പമ്പകടക്കും. ഓവര്‍ ഓവര്‍..'
കട്ട്

8

' CPRC-26 Station - 12 .. over over..'
'ഓവര്‍ ഓവര്‍..'
'സര്‍.. ഇന്ത്യന്‍ ക്രിക്കറ്റ് ടീം കയറിയ വണ്ടി ഇതാ കടന്നു വരുന്നു.. ഓവര്‍.. ഓവര്‍..'
'നോക്കി നില്‍ക്കാതെ പോയി എല്ലാറ്റിനും ചന്തിക്ക് നാ‍ല് പൂശ് കൊടുക്കടെയ്.. ഓവര്‍ ഓവര്‍..'
കട്ട്

9

' CPRC-26 Station - 12 .. over over..'
‘ഉം.. ഓവര്‍ ഓവര്‍..’
‘സര്‍.. കേന്ദ്രമന്ത്രിയുടെ കോണ് വോയ് പി.എം.ജി ജങ്ഷന്‍ പാസ് ചെയ്തു..ഓവര്‍ ഓവര്‍..’
‘ലെവന്‍ എവിടെ പോണടേയ്..ഓവര്‍.. ഓവര്‍..’
‘ഒരു ജന്മശതാബ്ദിക്ക് ..ഓവര്‍ ഓവര്‍..’
‘ഏത് .. അങ്ങേരുടെ അമ്മായിയിപ്പന്റെ ... ഓവര്‍ ഓവര്‍..’
‘യെസ് സര്‍.. ഓവര്‍ ഓവര്‍..’
‘ലെഫ്റ്റ് പിടിച്ച് സ്ട്രൈറ്റ് പോകട്ട്..ഓവര്‍..ഓവര്‍..’
‘സര്‍ അത് മ്യൂസിയമല്ലേ സര്‍..ഓവര്‍ ഓവര്‍..’
‘അവനു എന്തരടേയ് കേന്ദ്രത്തില് പണി ? പോയി കുറച്ച് നേരം ഫ്രന്റ്സിനെയൊക്കെ കണ്ട് പോരട്ടടേയ്.. ഓവര്‍ ഓവര്‍..’
കട്ട്.

10

' CPRC-26 Station - 12 .. over over..'
‘ഉം. ഓവര്‍ ഓവര്‍..’
‘സര്‍ ഞങ്ങള്‍ ഈസ്റ്റ് പോലീസ് സ്റ്റേഷനിലേക്ക് വരുന്നു..ഓവര്‍ ഓവര്‍..’
‘അവിടെ എന്തെടുക്കാനടേയ്..ഓവര്‍. ഓവര്‍..’
‘ചാല മാര്‍ക്കറ്റില്‍ നിന്ന് രണ്ട് പോക്കറ്റടിയന്മാരെ പൊക്കിയിട്ടുണ്ട്. ഓവര്‍ ഓവര്‍..’
‘ഏതരവനടേയ്..ഓവര്‍..ഓവര്‍..’
‘ഒന്ന് പൂന്തുറ രാജു, മറ്റേത് ലൊടുക്ക് കുഞ്ഞന്‍.. ഓവര്‍ ഓവര്‍..’
‘തന്നെ.. ഇറക്കി വിടടേയ്.. ഓവര്‍ ഓവര്‍..’
കട്ട്

* * * * *
എന്തരോ..എന്തോ..
എന്റെയൊക്കെ ഒരു സമയം..
ഏത് സമയത്താണാവോ ദൈവമേ കേരളാ പോലീസിന്റെ വയര്‍ലെസ് സെറ്റ് മോഷ്ടിക്കാന്‍ തോന്നിയത് !!

(Based on a true incident )

ഇവരും നിയമപാലകര്‍ തന്നെ

2008-06-04T00:21:00.000-07:00

നിയമപാലകര്‍ തന്നെ നിയമങ്ങള്‍ തെറ്റിച്ചാലോ ?

നിയമം തെറ്റിച്ച് പാര്‍ക്ക് ചെയ്ത ആര്‍മിയുടെ വാഹനം പോലീസിന്റെ വീല്‍ ക്ലാമ്പിട്ട് സ്റ്റൈലില്‍ !!

ഇന്നത്തെ അല്‍-വതന്‍ പത്രത്തില്‍നിന്നും.

സമാധാനമായി

2008-05-30T23:56:00.000-07:00

ഹൌ എന്തൊരു സമാധാനം.

ഒരു സൈറ്റ് ബ്ലോഗ് പോസ്റ്റുകളെടുത്ത് മലയാളത്തെ പ്രോത്സാഹിപ്പിക്കാന്‍ നോക്കിയപ്പോള്‍ തന്നെ വിചാരിച്ചിരുന്നു ഇത് അധിക കാലം ഉണ്ടാവില്ലെന്ന്.

തികച്ചും പ്രതിഷേധാര്‍ഹം തന്നെ.
പക്ഷേ,

എല്ലാവരും ചേര്‍ന്ന് ഇപ്പൊ ആ സൈറ്റിന്റെ മലയാളവിഭാഗം പൂട്ടിക്കെട്ടിയിരിക്കുന്നു.

എന്ന ദുര്‍വാശി എന്തിനായിരുന്നു ?

കേരള്‍സ്.കോം ഇനി ഇംഗ്ലീഷില്‍ കളിച്ചാല്‍ മതി.

പൈറേറ്റഡ് മൈക്രോസോഫ്റ്റ് ഓപ്പറേറ്റിങ് സിസ്റ്റങ്ങള്‍, സോഫ്റ്റ്വെയറുകള്‍, ഫോണ്ടുകള്‍ എന്നിവ ഉപയോഗിച്ച് ബ്ലോഗ് ചെയ്യുന്ന തമിഴിലും കന്നടയിലുമുള്ള ബ്ലോഗ്ഗേഴ്സ് ഇതൊക്കെ കണ്ട് പഠിക്ക്.

ഒരു സംഭവത്തിന്റെ മറുവശം കൂടിയൊന്ന് ചിന്തിക്കുന്നതില്‍ തെറ്റില്ലെന്നാണ് എനിക്ക് തോന്നുന്നത്. ഒരു സമാന്തര ചിന്ത. അത്രമാത്രം. ചിന്തിക്കാന്‍ വേറെ കാശൊന്നും കൊടുക്കേണ്ടല്ലോ !! :)

നാണപ്പേട്ടനില്ലാത്ത പത്തു വര്‍ഷങ്ങള്‍

2008-05-22T01:14:00.000-07:00

പൊള്ളയായ വാക്കുകളും അര്‍ത്ഥങ്ങളുമില്ലാത്ത കാപട്യം തൊട്ടുതീണ്ടാത്ത ഒരു സാഹിത്യകാരനെ കാണിച്ചുതരാന്‍ പറഞ്ഞാല്‍ ആദ്യം മനസ്സിലെത്തുന്നത് നാണപ്പേട്ടനെയാണ്. നാണപ്പേട്ടന്‍ അഥവാ എം.പി. നാരായണപ്പിള്ളയെ പരിചയപ്പെടുന്നത് ഏകദേശം പതിനാറ് വര്‍ഷങ്ങള്‍ക്കു മുന്‍പാണ്. മുംബൈയില്‍ മലയാളികളുടെ ശ്രമഫലമായി സ്ഥാപിച്ച ഒരു വായനശാലയുടെ വാര്‍ഷികത്തിനു ക്ഷണിക്കാനാണ് ബോര്‍വിലിയിലെ നാണപ്പേട്ടന്റെ വീട്ടിലെത്തുന്നത്. അങ്ങനെ പ്രസംഗപരിപാടികള്‍ക്ക് പെട്ടന്നൊന്നും വഴങ്ങുന്ന വ്യക്തിത്വമല്ലായിരുന്നു നാണപ്പേട്ടന്‍. കലാകൌമുദി ദിനപ്പത്രത്തിലെ വിജു.വി. നായരു മുഖേനയോ മറ്റോ ആണ് ആ കൂടിക്കാഴ്ചയ്ക്ക് അവസരമൊരുക്കിയത്. അന്നു വരെ അദ്ദേഹത്തെ കഥകളിലൂടെയും ലേഖനങ്ങളിലൂടെയും മാത്രമുള്ള അറിവായിരുന്നു അദ്ദേഹത്തെക്കുറിച്ച്.

ആദ്യ ദര്‍ശനത്തില്‍ തന്നെ മനസ്സില്‍ കുടിയേറുന്ന ഒരു വ്യക്തിത്വമാണ് നാണപ്പേട്ടന്റേത്. ഒരു തരം പരുക്കന്‍ സ്വഭാവം. കട്ടിയുള്ള കറുത്ത ഫ്രെയിമുള്ള കണ്ണടയും നെറ്റിക്കു മുകളിലുള്ള കറുത്ത പുള്ളിയും കഷണ്ടിയും അദ്ദേഹത്തിനു അങ്ങനെയൊരു പരിവേഷം നല്‍കിയിരുന്നുവെന്ന് വേണം കരുതാന്‍.
ചെന്ന പാടെ ചോദ്യം.
'എന്തിനാ വന്നേ..'
കാര്യം പറഞ്ഞു.
കുറച്ച് നേരം ലോകത്തിന്റെ അന്നത്തെ അവസ്ഥയെ കുറിച്ച് വാചാലനായി. ഞാന്‍ കമ്പ്യൂട്ടര് രംഗത്താണെന്നറിഞ്ഞപ്പോള്‍ മംഗ്ലീഷിലെഴുതുന്നതിനെക്കുറിച്ചായി സംസാരം. അന്ന് പല പ്രസിദ്ധീകരണങ്ങളിലേക്കും വേര്‍ഡ് സ്റ്റാറിലും ഡോസ് എഡിറ്റിലും മറ്റും മംഗ്ലീഷിലെഴുതിയാണ് നാണപ്പേട്ടന്‍ പല രചനകളും അയച്ചിരുന്നതെന്ന് കേട്ടപ്പോള്‍ നമിച്ചു പോയി.
സംസാരിച്ചു തുടങ്ങിയാല്‍ പിന്നെ നിര്‍ത്തില്ല. ആ വാക്ചാതുരിയില്‍ പലപ്പോഴും വന്നകാര്യം മറക്കും. അന്നും സംഭവിച്ചത് അതു തന്നെയായിരുന്നു. പിന്നീട് രണ്ടു ദിവസത്തിനു ശേഷം ഫോണ്‍ ചെയ്താണ് അദ്ദേഹത്തെ ഓര്‍മ്മിപ്പിക്കേണ്ടി വന്നത്.
പിന്നീട് പലപ്പോഴും അദ്ദേഹത്തെ കാണാനിടയായിട്ടുണ്ട്. ബോര്‍വിലിയിലെ ആ ഫ്ലാറ്റില്‍ വെച്ചും മറ്റും. ആ ഫ്ലാറ്റിനു ചുറ്റും നിറയെ മരങ്ങളുണ്ടായിരുന്നു അന്ന്. ഒരു പക്ഷേ അദ്ദേഹത്തിനു അതായിരിക്കും തിരക്കുകള്‍ക്കിടയിലും അവിടെ നിന്നും മാറിത്താമസിക്കാന്‍ മടിയുണ്ടായിരുന്ന ഘടകം.
കയ്യില്‍ കാശില്ലെങ്കില്‍ പോലും മറ്റുള്ളവരെ സഹായിക്കാന്‍ അദ്ദേഹം എന്നും മുന്നിലുണ്ടായിരുന്നു. സഹായമഭ്യര്‍ഥിച്ച് വരുന്ന പല കത്തുകള്‍ക്കും ആരെന്നോ എവിടേനിന്നെന്നോ നോക്കാതെ കഴിയാവുന്ന പോലെയൊക്കെ അദ്ദേഹം സഹായിക്കുമായിരുന്നു. , മുന്‍വിധികളില്ലാതെ..
അതുപോലെ തന്നെ ധാരാളിത്തവും.
നല്ല ഒരു സുഹൃത് വലയത്തിനുടമയായിരുന്നു അദ്ദേഹം. പലരും അത് മുതലാക്കിയെന്നൊക്കെ കേട്ടിട്ടുണ്ട്.
കഥകളും ലേഖനങ്ങളും മാത്രമെഴുതിയിരുന്ന അദ്ദേഹം നോവലിലേക്ക് തിരിഞ്ഞപ്പോള്‍ പലപ്പോഴും സംശയിച്ചിട്ടുണ്ട്. എങ്ങനെയാണ് ഇതു പൂര്‍ത്തിയാക്കുകയെന്ന്. ആ നോവല്‍ എഴുതിത്തുടങ്ങിയിരുന്ന കാലത്ത് അദ്ദേഹത്തോട് സംസാരിക്കുമ്പോള്‍ അത് ശരിക്കും മനസ്സിലാക്കാനായിട്ടുണ്ട്. ഒരു തരം വാശിയായിരുന്നു. വ്യക്തിനിഷ്ടമാവാത്ത ഒരു ആത്മകഥയായിരുന്നു 'പരിണാമ'മെന്ന് വേണമെങ്കില്‍ പറയാം. അസാമാന്യമായ ഉള്‍ക്കാഴ്ചകൊണ്ട് ദീപ്തമായ കഥ. സാക്ഷിയായോ കാഴ്ചക്കാരനായോ അദ്ദേഹവും നോവലില്‍ പലപ്പോഴും പ്രത്യക്ഷപ്പെടുന്നതായി കാണാം. കുട്ടിച്ചാത്തനും ആനമറുതയും ഒറ്റമുലച്ചിയുമെല്ലാം ഇടകലര്‍ന്നൊഴുകിയ ഭാഷ. ഒരു പക്ഷേ അതുപോലൊരു നോവല്‍ മലയാളത്തിലിന്നും ഇറങ്ങിയിട്ടില്ലെന്ന് പറയാം.

നാണപ്പേട്ടന്റെ ലേഖനങ്ങള് ‍ പലതും ആറ്റിക്കുറുക്കിയതായിരുന്നു. ഒരു പേജില്‍ കവിയാത്ത ലേഖനങ്ങളാണ് എല്ലായ്പോഴും നല്ലതെന്നാണ് അദ്ദേഹത്തിന്റ വാദം.
ഒരു രാത്രി അദ്ദേഹത്തെ കണ്ടു മുട്ടിയത് സ്റ്റേഷനു സമീപമുള്ള ചേരിയിലായിരുന്നു. എന്തൊക്കെയോ സ്വയം പറഞ്ഞുകൊണ്ട് നടന്നു നീങ്ങുകയായിരുന്നു അപ്പോള്‍. ബോംബെയിലെ ചേരികളിലെ ജീവിതങ്ങളെക്കുറിച്ച് എപ്പോഴും അദ്ദേഹത്തിന് ആധിയായിരുന്നു. ആ വേദനയുമായാണ് അദ്ദേഹം ജീവിച്ചതെന്ന് വേണമെങ്കില്‍ പറയാം. ഒരു പക്ഷേ അദ്ദേഹത്തിന്റെ ജീവനെടുത്തതും.. അന്ന് സംസാരിക്കണമെന്നുണ്ടായിരുന്നു. ഒരു പക്ഷേ പ്രതീക്ഷിക്കാതെ വിളിക്കുന്നത് അദ്ദേഹത്തിനിഷ്ടപ്പെട്ടില്ലെങ്കിലോയെന്നതുകൊണ്ടു മാത്രം വേണ്ടെന്ന് വെച്ചു. പിന്നീട് ഒരിക്കലും അദ്ദേഹത്തെ കാണാന്‍ സാധിച്ചിട്ടില്ല.

സ്വതന്ത്രമാധ്യമം (ഇന്നത്തെ ബ്ലോഗിങ്ങ്) വളരെ മുമ്പുതന്നെ അദ്ദേഹത്തിന്റെ സ്വപ്നങ്ങളിലുണ്ടായിരുന്നെന്നോര്‍ക്കുമ്പോള്‍ നാണപ്പേട്ടനില്ലാത്ത പത്തുവര്‍ഷം മനസ്സിലൊരു നീറ്റലായി ഇന്നുമവശേഷിക്കുന്നു.

കാലന്‍ ജോസേട്ടന്‍

2008-04-22T23:22:00.000-07:00

സംഭവം നടക്കുന്നത് ഒരു പതിനഞ്ചുകൊല്ലം മുമ്പ് റിയാദില്‍ വെച്ചാണ്. വലിയ അല്ലലൊന്നുമില്ലാതെ മലയാളിയുടെതെന്നല്ല ഒരു ഇന്ത്യക്കാരന്റെ പോലും മണമില്ലാത്ത കമ്പനിയില്‍ സുഡാനികളും മസറികളും പാലസ്തീനികളുമൊക്കെയുള്ള ഒരു ഗ്രൂപ്പുമായി വളരെ മനസ്സമാധാനത്തോടെ വാഴുന്ന കാലം. ഒരു തേങ്ങയും മനസ്സിലായില്ലെങ്കിലും അറബിചാനലുകളില്‍ വരുന്ന സീരിയലുകള്‍ മണിക്കൂറുകളോളം അവരോടൊപ്പം സസന്തോഷം കണ്ട് ആനന്ദിച്ചിരുന്ന സമയം. ‘പത്താക്ക‘യില്ലാതെ പുറത്തിറങ്ങിയാല്‍ അറബി പോലീസ് പിടിച്ചുകൊണ്ടു പോയി കൂമ്പിനിടിക്കുമെന്ന്‍ അറബികള്‍ വിരട്ടിയതിനാല്‍ ജോയിന്‍ ചെയ്ത് ഒരാഴ്ച കഴിഞ്ഞപ്പോഴാണ് ക്യാമ്പില്‍ നിന്നും പുറത്തിറങ്ങാനായത്. അന്നുവരെ വിചാരിച്ചിരുന്നത്, ആ പ്രദേശത്ത് ഇന്ത്യക്കാരൊന്നുമില്ലെന്നായിരുന്നു. ഗോതമ്പ് കുബ്ബൂസും മുത്തബലും ഹുമ്മൂസുമൊക്കെ സാമ്പാറും കുടമ്പുളിയിട്ടുവെച്ച മീന്കറിയും ബീഫ് ഫ്രൈയുമൊക്കെയാണെന്ന് സങ്കല്‍പ്പിച്ചായിരുന്നു കണ്ണടച്ചിറക്കിയിരുന്നത്.

ഒരു ദിവസം പുറത്തിറങ്ങി ഒരു ഫര്‍ലോങ്ങ് നടന്നപ്പോള്‍ റോഡരികില്‍ ചുവന്ന അക്ഷരത്തില്‍ ‘മാണിക്കല്‍’ റെസ്റ്റോറന്റെന്ന ബോര്‍ഡ് കണ്ടപ്പോഴാണ് ലോകത്തെവിടെ ചെന്നാലും മലയാളികളെകാണാമെന്ന തത്വത്തില്‍ കഴുമ്പുണ്ടെന്ന് മനസ്സിലായത്. അവിടെ വെച്ചാണ് കൊച്ചിക്കാരനായ ജോണ്‍സനെ പരിചയപ്പെട്ടതും. ജോണ്‍സനാണ് പറഞ്ഞത് തൊട്ടടുത്ത് തന്നെ മലയാളികള്‍ തിങ്ങിപ്പാര്‍ക്കുന്ന മറ്റൊരു ക്യാമ്പുണ്ടെന്നും അവിടെ ഇരുപത്തിനാലുമണിക്കുറും പ്രവര്‍ത്തിക്കുന്ന ഷാപ്പും മലയാളം സിനിമകള്‍ മാത്രമിടുന്ന വി.സി.യാറുമുണ്ടെന്ന്. ആനന്ദലബ്ദിക്കിനിയെന്തുവേണം. വ്യാഴാഴ്ചകളും വെള്ളിയാഴ്ചകളും പിന്നീട് ജോണ്‍സന്റെ കൂടാരത്തില്‍.

അവിടെ വെച്ചാണ് ജോസേട്ടനെ പരിചയപ്പെടുന്നത്. നാല്‍പ്പതു കടന്ന യുവാവ്. കാലന്‍ ജോസെന്ന് പറഞ്ഞാലേ ക്യാമ്പില്‍ അറിയൂ. മാടപ്രാവിന്റെ മുഖവും മാലാഖയുടെ സ്വരവുമുള്ള ഈ മനുഷ്യനെയാണോ കാലനെന്ന് വിളിക്കുന്നതെന്ന് ഞാന്‍ സംശയിച്ചു. മറ്റൊരു അന്തേവാസിയായ ആന്റണിയാണ് അക്കഥ പറഞ്ഞത്.

ആന്റണിയുടെ അപ്പന്‍ ദേവസ്സിക്ക് പണ്ട് മൂന്നു ബസുണ്ടായിരുന്നു. ആലുവ- പനങ്ങാട് റൂട്ടില്‍. അതിലൊന്നിന്റെ സാരഥിയായിരുന്നുവത്രേ ജോസേട്ടന്‍. അപ്പന്‍ ദേവസ്സിയുടെ വിശ്വസ്ഥനായ സാരഥിയായിരുന്നു ജോസേട്ടന്‍. യാത്രക്കാരിലൊരുത്തനെ കാലപുരിയ്ക്കയച്ച് ഒരു ബസ് തവിടുപൊടിയാക്കിയതിന്റെ ഒന്നാം വാര്‍ഷികത്തില്‍ തന്നെ ജോസേട്ടന്‍ മറ്റൊരുത്തനെ ഇടിച്ചിട്ടു. രണ്ടാമത്തെ ഇടിയ്ക്കു ശേഷമാണത്രേ കാലന്‍ ജോസെന്ന് പേരു വീണത്. കേസു നടത്തി മൂന്നാമത്തെ ബസ് വില്‍ക്കാറായപ്പോഴാണ് മൂന്നാമത്തെ ആക്സിഡന്റും ഉണ്ടായത്. പിന്നെ ജോസേട്ടന്‍ നാട്ടില്‍ നിന്നില്ല. രായ്ക്കുരാമാനം ബോംബെയ്ക്ക് മുങ്ങി. ഇപ്പോഴും പോലീസ് കണക്കില്‍ പിടികിട്ടാപ്പുള്ളിയാണ് ജോസേട്ടന്‍. ഒരു വിധം നല്ല സാമ്പത്തിക സ്ഥിതിയുണ്ടായിരുന്ന ദേവസിച്ചേട്ടന്‍ കടം വാങ്ങിയ പൈസ കൊണ്ടാണ് ആന്റണിയെ ഗള്‍ഫില്‍ വിട്ടത്. ഗള്‍ഫിലെത്തി പിറ്റേന്നു തികച്ചും ആകസ്മികമായിട്ടാണ് ജോസേട്ടനെ സ്വന്തം ക്യാമ്പില്‍ തന്നെ ആന്റണി കണ്ടുമുട്ടുന്നത്. സ്വന്തം അപ്പനെ കുത്തുപാളയെടുപ്പിച്ചവനെങ്കിലും ആന്റണി മറ്റൊരു വേതാളമായി ജോസേട്ടനെ കൂടെക്കൂട്ടി ജന്മാന്തരങ്ങളുടേ കണക്കുപുസ്തകത്തില്‍ എഴുതിച്ചേര്‍ത്തു.

അന്നൊരു വ്യാഴാഴ്ചയായിരുന്നു. വെള്ളിയാഴ്ചയ്ക്കു മുമ്പുള്ള വ്യാഴം. വ്യാഴാഴ്ചകളില്‍ ഉറങ്ങാന്‍ പാടില്ലെന്നാണ് ക്യാമ്പിലെ നിയമം. പുലരുന്നതുവരെ ദാഹം തീര്‍ത്തും ടിജി രവിയുടെ പുണ്യപുരാണ ചിത്രങ്ങള്‍ കണ്ടും കഴിയണം. എല്ലാ വ്യാഴാഴ്ചയും ഓരോരോ ആഘോഷങ്ങളാണ്.
അന്നത്തെ ആഘോഷം ജോണ്‍സന്‍ നാട്ടില്‍ നിന്നു തിരിച്ചു വന്നതിന്റെയായിരുന്നു. ചമ്പക്കുളം വര്‍ഗ്ഗീസിന്റെ വഞ്ചിപ്പാട്ടും കുക്കും പ്രധാന വാറ്റ് നിര്‍മ്മിതാവുമായ സജീവന്റെ വക കവിതാ പാരായണവും കൊടുമ്പിരിക്കൊള്ളുകയായിരുന്നു. അപ്പോഴാണ് ഒരശരീരിപോലെ ജോണ്‍സന്‍ അത് പ്രഖ്യാപിച്ചത്.
‘ജോസേട്ടാ.. ചെലവ് ചെയ്യണം ..’
‘എന്തിനു ? ’
‘ഞാന്‍ ജോസേട്ടന്റെ വീട്ടില്‍ പോയിരുന്നു. അടുത്ത മെമ്പറ് വരാറായി അല്ലേ.ഉം.. ചേച്ചീനെ ഞാന്‍ കണ്ടു... ‘
ആഘോഷം തുടര്‍ന്നുകൊണ്ടേയിരുന്നു.
അഞ്ചുമിനിട്ട് കഴിഞ്ഞപ്പോള്‍ ജോസേട്ടന് മെല്ലെ അവിടെ നിന്നും മുങ്ങി.
വഞ്ചിപ്പാട്ടിനു ചൂടുകൂടിയാല്‍‍ വര്‍ഗ്ഗീസിനു ഇരിപ്പുറയ്ക്കില്ല. പിന്നെ മുറിക്ക് ചുറ്റും താളം പിടിച്ച് ഓടിക്കൊണ്ടായിരിക്കും പാട്ട്. അങ്ങനെ കൈകൊട്ടിപ്പാട്ട് പാടി രസം പിടിച്ചുവരുന്നതിന്റെ ഇടയ്കായിരുന്നു ഒരു അപശബ്ദം കേട്ട് പാട്ട് നിര്‍ത്തിയത്. ജോസേട്ടന്റെ കുഞ്ഞിക്കൈ ജോണ്‍സന്റെ മുഖത്ത് തലോടിയതായിരുന്നു അത്.
‘നായിന്റെ മോനെ.. മനുഷ്യനെ എടങ്ങേറാക്കാന്‍.. നട്ടപ്പാതിരയ്ക്ക് ഫോണ്‍ ചെയ്ത് എന്റെ കാശും കളഞ്ഞു..’
‘എന്താ ജോസേട്ടാ പ്രശ്നം. ? ‘
‘ഇവന്‍ പോയിട്ട് എന്റെ അനിയന്റെ ഭാര്യേനെയാണ് കണ്ടുവന്നത്...കൊല്ലം ആറായി നാട്ടില്‍ പോകാതെ ഞാനിവിടെ കിടക്കുന്നു....’

റിംഗ് ടോണ്‍ മാനിയ

2008-04-10T02:17:00.000-07:00

ഈയടുത്ത കാലത്ത് ഒരു പൊതുപ്രവര്‍ത്തകയുടെ മരണത്തെത്തുടര്‍ന്നു നടന്ന അനുശോചന യോഗം. സ്ഥലം എം.എല്‍.എ പ്രസംഗിക്കുകയാണ്. എണ്‍പതു വയസ്സുകഴിഞ്ഞ പാര്‍ട്ടിയുടെ പഴയ ഒരു പ്രവര്‍ത്തകയാണ് മരിച്ചിരിക്കുന്നത്. പാര്‍ട്ടിക്കും നാടിനും വേണ്ടി അവര്‍ ചെയ്ത കാര്യങ്ങള്‍ വിശദീകരിക്കുന്നതിനിടയിലാണ് എം.എല്‍.എയുടെ മൊബൈല്‍ ചിലച്ചത്. ‘ലജ്ജാവതിയേ....’ . ജനം ചിരിക്കണോ കരയണോയെന്നറിയാതെ നിന്നു. ഇതൊന്നും ഒറ്റപ്പെട്ട സംഭവമല്ല.

അമ്മായിയമ്മയുടെ മരണശുശ്രൂഷയ്ക്കിടയില്‍ മരുമകളുടെ മൊബൈലിലെ റിംഗ് ടോണായി ‘രാക്ഷസീ.. രാക്ഷസീ ‘ എന്ന പാട്ട് വന്നാല്‍ എങ്ങനെയിരിക്കും ?

ബസ്റ്റോപ്പിലെ ക്യൂവില്‍ മധുരപ്പതിനേഴുകാരിയുടെ പിന്നില്‍ നില്‍ക്കുന്ന പ്രായം ചെന്ന ചേട്ടന്റെ മൊബൈലില്‍ റിംഗ് ടോണായി ‘ചോളി കെ പീഛേ..’ വന്നാല്‍ എങ്ങനെയിരിക്കും ?

കുറച്ചുകാലം മുമ്പ് മൈക്രോസോഫ്റ്റിന്റെ ഒരു സെമിനാറില്‍ കൂലങ്കഷമായ ചര്‍ച്ച നടക്കുകയായിരുന്നു. മൂന്നോ നാലോ ഇന്ത്യക്കാരും ബാക്കിയെല്ലാവരും അറബ്സും യൂറോപ്യന്‍സുമായിരുന്നു. പെട്ടന്ന് ഒരു മൊബൈല്‍ അലറി വിളിച്ചു ‘ സ്വാമിയേ.. ശരണമയ്യപ്പ..’
അത് ഒരു മലയാളിയുടെയായിരുന്നു.. മണ്ഡലകാലത്തെ സ്പെഷല്‍ റിംഗ് ടോണാണത്രേ. അത് മൈക്രോസോഫ്റ്റിനെ അറിയിച്ചാല്‍ അവനു എന്തു കിട്ടാനാണ് ?

ഒരു കോള്‍ വരുന്നെന്ന് ഉപഭോക്താവിനെ അറിയിക്കുകയാണ് റിംഗ് ടോണുകളുടെ കടമെയ്ങ്കിലും പലപ്പോഴും തന്റെ റിംഗ് ടോണ്‍ മറ്റുള്ളവരെ കേള്‍പ്പികയാണ് അതിന്റെ പ്രധാന പരിപാടിയെന്ന് തോന്നിപ്പോകും പലരും ഉപയോഗിക്കുന്നത് കണ്ടാല്‍. ആരെങ്കിലും മൊബൈലില്‍ വിളിച്ചാല്‍ അതിന്റെ റിംഗ് ടോണ്‍ പാടിത്തീരുന്നതുവരെ കാള്‍ അറ്റന്‍ഡ് ചെയ്യാതിരിക്കുന്ന പലരേയും കണ്ടിട്ടുണ്ട്.

മൊബൈല്‍ ഫോണുകളില്‍ ഇതുപോലെയുള്ളാ ഫാന്‍സി റിംഗ് ടോണുകള്‍ ആവശ്യമാണോ ?

പൊതുവിജ്ഞാനം

2008-04-03T02:22:00.000-07:00

പൊതു വിജ്ഞാന പരീക്ഷ

ചോദ്യം : കടല്‍പ്പാമ്പിനെ എങ്ങനെ തിരിച്ചറിയാം
ഉത്തരം : നക്കി നോക്കിയാല്‍ മതി. ഉപ്പുരസമുണ്ടെങ്കില്‍ അത് കടല്‍പ്പാമ്പാണെന്ന് തിരിച്ചറിയാം.

ചോദ്യം : മണിപ്രവാളം എന്നാലെന്ത് ?
ഉത്തരം : പരീക്ഷാ ഹാളിലേക്ക് കയറാനുള്ള മണി അടിയ്കുമ്പോള്‍ കുട്ടികള്‍ക്കുണ്ടാവുന്ന വെപ്രാളമാണ് മണിപ്രവാളം

ചോദ്യം : ഗാന്ധിയുടെ അവസാന നിമിഷങ്ങള്‍ വിവരിക്കുക
ഉത്തരം : ഡിഷ്യും.. ഡിഷ്യും... റാം റാം

ചോദ്യം : വേലിയേറ്റവും വേലിയിറക്കവും എന്നാലെന്ത് ?
ഉത്തരം : ഒരാള്‍ തന്റെ പറമ്പിന്റെ അതിരു മറ്റൊരാളുടെ പറമ്പിലേക്ക് കയറ്റി വേലികെട്ടുന്നതിന്റെ വേലിയേറ്റം എന്നും മറ്റേ പറമ്പുകാരന്‍ ആളുകളേയും കൂട്ടിവന്ന് അത് പൊളിച്ചിറക്കുന്നതിനെ വേലിയിറക്കമെന്നും പറയുന്നു.

ചോദ്യം : ഇന്ത്യന്‍ പഞ്ചവത്സര പദ്ധതിയും റഷ്യന്‍ പഞ്ചവത്സര പദ്ധതിയും തമ്മിലുള്ള വ്യതാസം ?

ഉത്തരം : റഷ്യന്‍ പഞ്ചവത്സരപദ്ധതി 5 വര്‍ഷം കൊണ്ട് അവസാനിക്കുമ്പോള്‍ ഇന്ത്യ പഞ്ചവത്സരപദ്ധതി 5 വര്‍ഷം കഴിഞ്ഞേ ആരംഭിക്കൂ.

(നെറ്റില്‍ തലമുറ തലമുറ കൈമാറി കിട്ടിയത്... )

കാട്ടാളനു വിട

2008-03-30T22:10:00.000-07:00

കടമ്മനിട്ട രാമകൃഷ്ണന്‍ അന്തരിച്ചു. ഇന്നു(31/03/2008) രാവിലെയായിരുന്നു അന്ത്യം.

കടമ്മനിട്ട രാമകൃഷ്ണന്‍ (ജ.മാര്‍ച്ച് 22, 1935) കേരളത്തിലെ‍ അറിയപ്പെടുന്ന കവിയും രാഷ്ട്രീയ, സാസ്കാരിക പ്രവര്‍ത്തകനുമാണ്. കേരളത്തിന്റെ നാടോടി സംസ്കാരത്തെയും പടയണിപോലെയുള്ള നാടന്‍ കലാരൂപങ്ങളെയും സന്നിവേശിപ്പിച്ച രചനാ ശൈലി സ്വീകരിച്ചാണ് രാമകൃഷ്ണന്‍ സാഹിത്യലോകത്തു ശ്രദ്ധേയനായത്. ഛന്ദശാസ്ത്രം അടിസ്ഥനമാക്കിയ കാവ്യരചനയേക്കാള്‍ നാടോടി കലാരൂപങ്ങളുടെ താളം കവിതയില്‍ കൊണ്ടുവന്ന അദ്ദേഹം ആധുനിക രചനാശൈലിയുടെ വക്താവുമായി.

1960കളില്‍ കേരളത്തില്‍ ശക്തമായിരുന്ന നക്സലേറ്റ് പ്രസ്ഥാനത്തിന്റെ സ്വാധീനം രാമകൃഷ്ണന്റെ രചനകളില്‍ നിഴലിക്കുന്നുണ്ട്. സമകാലികരായ കവികളിലധികവും പ്രകൃതി കേന്ദ്രീകൃത രചനകളില്‍ ശ്രദ്ധയൂന്നിയപ്പോള്‍ മനുഷ്യകേന്ദ്രീകൃതമായിരുന്നു കടമ്മനിട്ടയുടെ കവിതകള്‍. 1970കള്‍ക്കു ശേഷം കേരളത്തിലെ ഇടതുപക്ഷ രാഷ്ട്രീയ പ്രസ്ഥാനങ്ങളുടെ സാംസ്കാരിക സംഘടനകളില്‍ സജീവ പ്രവര്‍ത്തകനായി. ആറന്മുള നിയമസഭാ മണ്ഡലത്തെ പ്രതിനിധീകരിച്ച് ഒരു തവണ കേരളാ നിയമസഭയിലും അംഗമായി.

പ്രധാനകൃതികള്‍

കുറത്തി
കടിഞ്ഞൂല്‍‌പൊട്ടന്‍
മിശ്രതാളം
മഴപെയ്യുന്നു മദ്ദളംകൊട്ടുന്നു
കടമ്മനിട്ടയുടെ കവിതകള്‍
വെള്ളിവെളിച്ചം
ഗോദോയെ കാത്ത് (സാമുവല്‍ ബക്കറ്റിന്റെ “വെയ്റ്റിംഗ് ഫോര്‍ ഗോദോ” എന്ന നാടകത്തിന്റെ വിവര്‍ത്തനം)
സൂര്യശില

(വിവരങ്ങള്‍ക്കു കടപ്പാട് : വിക്കിപീഡിയ )

പൊറാട്ടുചെണ്ട

2008-03-08T04:49:00.000-08:00

ജീവിതത്തിന്റെ കാലിക പ്രതിസന്ധികള്‍ സൂക്ഷ്മതയോടെ രേഖപ്പെടുത്തുന്ന, തന്റെ കാലത്തോട് അര്‍ത്ഥവത്തായി സംവദിക്കുന്ന മുണ്ടൂര്‍ സേതുമാധവന്റെ കഥാസമാഹാരമാണ് പൊറാട്ടുചെണ്ട. മലയാള ചെറുകഥാ സാഹിത്യത്തില്‍ ആധുനികതയുടെ പ്രവാഹം ശക്തിയായിരുന്നപ്പോള്‍ എഴുതിയ കഥകളാളിവ. എന്നാല്‍ ആധുനികതയുടെ ആഘോഷത്തിമര്‍പ്പുകളിലൊന്നും മുണ്ടൂരിന്റെ കഥകള്‍ ഉള്‍പ്പെടുന്നില്ല. കഴിഞ്ഞ നാല്പതുവര്‍ഷക്കാലമായി മുണ്ടൂര്‍ സേതുമാധവന്‍ എഴുതിയ ഇരുപത്തിയഞ്ചുകഥകളുടെ സമാഹാരമാണ് ഈ കൃതി.

വ്യക്തി അനുഭവിക്കുന്ന നോവുകളും അനാഥത്വവും ‘പഥികന്‍’, ‘സീത പറയുമായിരുന്നു’ എന്നീ കഥകളില്‍ കാണാം. വര്‍ത്തമാനകാലത്ത് ഭൌതിക ജീവിത പരിസരത്തില്‍ ഉണ്ടായ പരിണാമം വേദനയോടെ വരച്ചുകാട്ടുകയാണ് ‘ കാഴ്ചപ്പാടുകളി’ല്‍.ഇന്നിന്റെ വേഗതകളില്‍ നഷ്ടമായിക്കൊണ്ടിരിക്കുന്ന മനുഷ്യ ബന്ധങ്ങളുടെ വിവിധ തലങ്ങള്‍ അനാവരണം ചെയ്യുന്ന’ഹേമന്തം’, ‘ഇരുട്ടിലേക്ക് പറന്നു പോയ ഒരു വെണ്‍പ്രാവ്’, എന്നീ കഥകള്‍ക്ക് കാലിക പ്രസക്തിയുണ്ട്.
ജീവിത ചിന്തയുടെ ഭാഗമായാണ് കഥാകൃത്ത് ഈ കഥകളില്‍ കാലത്തെ കാണുന്നത്. ജീവിതത്തിലെ അതിസാധാരണമായ വസ്തുതകളില്‍ നിന്നാണ് പലപ്പോഴും ഇതിലെ കഥകളുടെ പ്രമേയം സ്വീകരിച്ചിട്ടുള്ളത്. ബന്ധങ്ങളില്‍ സാന്ത്വനമന്വേഷിക്കുന്നവരാണ് ഇതിലെ കഥാപാത്രങ്ങളില്‍ ഒട്ടുമിക്കവരും. കാല്‍പ്പനികമായ ഭാഷയിലൂടെയാണ് ഇതിലെ കഥകള്‍ അവതരിപ്പിക്കുന്നുവെങ്കിലും വായനക്കാ‍രനിലേക്ക് കഥയെ സംക്രമിപ്പിക്കുന്നതിനത് തടസ്സമാവുന്നില്ല.

മലയാള ചെറുകഥാസാഹിത്യത്തില്‍ വേറിട്ട വായനാനുഭവം പകരുന്നവയാണ് ‘പൊറാട്ടുചെണ്ട’യിലെ കഥകളെന്ന് നിസ്സംശയം പറയാം.

പൊറാട്ടുചെണ്ട
മുണ്ടൂര്‍ സേതുമാധവന്‍
കറന്റ് ബുക്സ്
വില 75 രൂപ

ഈ പുസ്തകം ഇവിടെ നിന്നും ലഭിക്കുന്നതാണ്.

വിജയന്‍ - ഒരു ജീവിതം

2008-02-14T21:29:00.000-08:00

‘ഇതിഹാസം ഒരു പ്രായത്തില്‍ എനിക്കുണ്ടായിരുന്ന അനുഭവങ്ങളുടേയും ഭ്രമാത്മകമായ ഭാവനയുടെയും ഏറെക്കുറെ സത്യസന്ധമായ കട്ടുരയാണ്. അതെഴുതുമ്പോള്‍ എന്റെ മനസ്സില്‍ ഒരു പ്രത്യേക ലക്ഷ്യമൊന്നും ഉണ്ടായിരുന്നില്ല. കാറ്റുകൊള്ളുമ്പോലുള്ള ഒരു സുഖം പോലെ ഒരു അനുഭൂതിമാത്രം’ഖസാഖിന്റെ ഇതിഹാസം എഴുതിയപ്പോഴുണ്ടായ അനുഭവത്തെപ്പറ്റി വിജയന്‍ ഇങ്ങനെ പറഞ്ഞിട്ടുണ്ട്.

തീവ്രമായ മനുഷ്യസ്നേഹവും അഗാധമായ പ്രപഞ്ചബോധവുമുണ്ടായിരുന്ന മലയാളത്തിലെ വലിയൊരു എഴുത്തുകാരനായിരുന്നു വിജയന്‍.

ഖസാക്കിനു ശേഷം പലപ്പോഴായി വിജയനെന്ന വ്യക്തി നേരിട്ട ജീവിത മുഹൂര്‍ത്തങ്ങളെ അതേ വൈകാരിക തീവ്രതയോടെ ഒപ്പിയെടുത്തവതരിപ്പിക്കാന്‍ ഒരുപക്ഷേ വിജയനു കഴിഞ്ഞിട്ടുണ്ടോയെന്നത് സംശയമാണ്. ഖസാക്കിനു ശേഷം വിജയന്റെ മനസ്സിലേക്കുള്ള വായനക്കാരന്റെ അധിനിവേശമായിരിക്കണം ഇതിനൊരു കാരണം. ഖസാക്കിലൂടെ വിശ്വസാഹിത്യത്തിന്റെ പടിവാതില്‍ക്കലെത്തിയ മലയാളത്തിന്റെ ഈ പ്രതിഭാശാലി പിന്നീട് ആ വഴിക്ക് പോയതേയില്ല. ‘ഗുരുസാഗര’ത്തിലും ‘ധര്‍മ്മപുരാണ’ത്തിലും ‘പ്രവാചകന്റെ വഴി’യിലുമെല്ലാം ആ പ്രതിഭയുടെ ഒരു മിന്നലാട്ടം പോലും കടന്നുവന്നിട്ടില്ലെന്നത് ഒരു പക്ഷേ വിജയന്റെ വ്യക്തി ജീവിതത്തിലെ അനാവശ്യ തര്‍ക്കങ്ങളും ബാലിശമായ ചോദ്യശരങ്ങളുമായി പലരേയും അഭിമുഖീകരിക്കേണ്ടിവന്നുവെന്നതിന്റെ ബാക്കിപത്രമായിരിക്കാം.

വിജയനെന്ന വ്യക്തിയെ അടുത്തറിയാന്‍ വായനക്കാരന്‍ ഇനിയും ശ്രദ്ധിച്ചിട്ടില്ലെന്നത് ഇത്തരുണത്തില്‍ എടുത്തുപറയേണ്ടതാണ്. വിജയനെ ഒരു മിത്തായി മാറ്റി നിര്‍ത്താതെ വ്യാഖ്യാനിക്കപ്പെടുന്ന അവസ്ഥ ഈ വൈകിയ വേളയിലെങ്കിലും ഉണ്ടായേത്തീരൂ. പ്രവാചകന്‍, ഇതിഹാസകാരന്‍ എന്നീ വിശേഷണങ്ങളൊക്കെ കൊടുത്ത് വിജയനെന്ന എഴുത്തുകാരെന മാറ്റി നിര്‍ത്തുന്നത് ശരിയല്ല. അദ്ദേഹത്തിന്റെ അന്വേഷണങ്ങളുടെ തീഷ്ണതെയെ പിന്തുടരേണ്ടിയിരിക്കുന്നു. വിജയനിലെ പ്രതിഭയുടെ സ്രോതസിനെ കണ്ടെത്താന്‍ വായനക്കാരനു ഇന്നും കഴിഞ്ഞിട്ടുണ്ടോയെന്നത് സംശയമാണ്. വിജയനെക്കുറിച്ചുള്ള അന്വേഷണങ്ങളും ജീവചരിത്രങ്ങളും ഓര്‍മ്മക്കുറിപ്പുകളും ലക്ഷ്യമാക്കേണ്ടത് അതാണ്.

അവസാന കാലത്ത്, രോഗത്തിന്റെ പിടിയിലായപ്പോള്‍ സഹായി എന്ന നിലയില്‍ കുറെക്കാലം വിജയനോടൊപ്പം കഴിഞ്ഞ ഗോപിനാരായണന്‍ രചിച്ച ഓര്‍മ്മപ്പുസ്തകമാണ് ‘ഒ.വി. വിജയന്‍ - ഒരു ജീവിതം’ . ഒറ്റയിരുപ്പിനു വായിച്ചു തീര്‍ക്കാവുന്ന ഒരു പുസ്തകമാണിത്.

വിരസമല്ലെങ്കിലും പുതുമ അവകാശപ്പെടാനില്ലാത്ത, വിജയനെന്ന വ്യക്തിയെ ശരിക്കും മനസ്സിലാക്കാത്ത ചില ഓര്‍മ്മക്കുറിപ്പുകളുടെ ശേഖരമായതിനാലാവാം ഒരുപക്ഷേ ശ്രദ്ധിക്കപ്പെടാതെ, ചര്‍ച്ച ചെയ്യപ്പെടാതെ പോയത്. വിജയന്റെ പുസ്തകങ്ങളിലെ കഥാപാത്രങ്ങളിലൂടെയും സാഹചര്യങ്ങളിലൂടെയുമുള്ള യാത്രയും ഗോപി നാരായണന്‍ നടത്തിയിട്ടുണ്ട് ഈ പുസ്തകത്തിലൂടെ. ഓര്‍മ്മപ്പുസ്തകം എന്ന ശ്രേണിയില്‍ നിന്നും ഈ പുസ്തകം അകന്നു പോകാന്‍ ഇതൊരു കാരണമായിട്ടുണ്ട്. വിജയനിലെ വ്യക്തിയെ കുറെക്കൂടി സത്യസന്ധമായി അടുത്തറിയുന്നതിനു ഈ കൃതി പ്രയോജനപ്പെടുന്നില്ലെന്നതാണ് വാസ്തവം.

ഒ.വി. വിജയന്‍ - ഒരു ജീവിതം
ഗോപി നാരായണന്‍
കേരള സാഹിത്യ അക്കാദമി.
തൃശ്ശൂര്‍.

ചൊവ്വയിലെ ചേച്ചി

2008-01-28T23:02:00.000-08:00

തെങ്ങുകയറുന്ന കണാരേട്ടന്‍ കുര്യാക്കുവിന്റെ പറമ്പില്‍ തെങ്ങുകയറുന്ന ഇന്നലെ വരെ വെറും കണാരേട്ടന്‍ മാത്രമായിരുന്നു. കാലത്ത് എഴുന്നേറ്റ് സ്വന്തം തലൈവി മുണ്ടിക്കുട്ടിയെ നാലു തെറിയും വിളിച്ച് വെട്ടുകത്തിയും തളാപ്പുമായി വളരെ മനസ്സമാധാനത്തോടെ ചെമ്പരത്തിക്കാട് പഞ്ചായത്തിലെ ഓരോ വീട്ടിലെയും തെങ്ങുകളില്‍ കയറി, രാത്രി പാടവരമ്പത്ത് വാറ്റുന്ന ദാക്ഷായണിയുടെ ഹൈടെക് വാറ്റുകേന്ദ്രത്തില്‍ നിന്നും ഇന്ധനവും നിറച്ച് സ്റ്റാന്‍ഡ് പിടിക്കുന്ന സാധാരണക്കാരില്‍ സാധാരണക്കാരനായിരുന്നു.

അന്ന്, കുര്യാക്കേട്ടന്റെ പറമ്പിലെ ആ ചമ്പത്തെങ്ങില്‍ കയറി പകുതിയെത്തിയപ്പോഴാണ് കണാരനു രണ്ടിനു പോകണമെന്ന് കലശ്ശലായി തോന്നിയത്. ഏതായാലും കയറിയില്ലേ ഇനി മുകളിലെത്തിയിട്ട് ഒരു കാജാ ബീഡി വലിച്ചാല്‍ തീരുന്ന പ്രശ്നമേയുള്ളൂവെന്ന് സമാധാനിച്ചാണ് കയറിയത്. മുകളിലെത്തി ഒരു കാജാ ബീഡിക്ക് തീകൊളുത്തി. ഒരു പുക മുകളിലേക്കൂതി വിട്ട് അതിന്റെ അലസഗമനം നോക്കിയിരിക്കുമ്പോഴാണ് കണാരേട്ടന്‍ അത് കണ്ടത്.

ആകാശത്ത് ഒരു നക്ഷത്രം.
നക്ഷത്രത്തിലേക്ക് സൂക്ഷിച്ച് നോക്കിയപ്പോഴാണ് ഒരുത്തി അവിടെ കിടന്നുറങ്ങുന്നു.
ങാഹ. . ഇവളിതുവരെയും എഴുന്നേറ്റില്ലേ .. കാലത്ത് റേഷനായി കൊടുക്കേണ്ട എല്ലാ തെറിയും കൊടുത്തതാണല്ലോ..

‘എടീ.. %#%#$% , #@$%#@$ , മോളേ എഴുന്നേറ്റ് പോയി ക്ടാങ്ങളെ സ്കൂളില്‍ പറഞ്ഞയ്ക്കടി....’

അവളെഴുന്നേല്‍ക്കുന്ന ലക്ഷണമില്ല....

‘ഡാ കണാരാ.... നെനക്കെന്താ പ്രാന്തായാ .. ചമ്പത്തെങ്ങിന്റെ മോളീക്കയറി തെറി വിളിക്കാന്‍.. താഴെ എറങ്ങടാ..’ കുര്യാക്കേട്ടന്‍ താഴെ നിന്നലറി വിളിച്ചു.

പണ്ടാറക്കാലന്‍ ഒരു മടലുപോലും വെട്ടാനില്ലാത്ത തെങ്ങിന്മേല്‍ എണ്ണം തികയ്ക്കാന്‍ കയറിയതും പോര മനുഷ്യനെ തെറിവിളിക്കുന്നോ..

‘ദേ നോക്ക്യ കുര്യാക്കേട്ടാ,, അവള്‍ അവിടെ കിടക്കന്ന്യ...’

‘ഏതവള് ..’ കുരുത്തംകെട്ടവന്‍ പിച്ചും പേയും പറയുന്നോ..

‘താഴ്ത്തെറങ്ങടാ കണാരാ..’ കുര്യാക്കേട്ടന്‍ ലാസ്റ്റ് വാണിങ്ങ് കൊടുത്തു.

ഒന്നും പറ്റാതെ താഴെ ഇറങ്ങിയാല്‍ അടുത്ത ഷഷ്ഠിക്ക് കണാരനെ ശൂലം കുത്തിച്ച് മലകയറ്റിക്കോളാമെന്ന് നേര്‍ച്ചയും നേര്‍ന്നു കുര്യാക്കേട്ടന്‍.

പാതി വലിച്ച ബീഡി തെങിന്റെ കൊരലയ്ക്കു തന്നെ കുത്തിക്കെടുത്തി കണാരേട്ടാന്‍ താഴെ ഇറങ്ങി.
വിയര്‍ത്തുകുളിച്ചാണ് കണാരേട്ടന്‍ തെങ്ങില്‍ നിന്നറങ്ങിവന്നത്.

‘എന്താ കണാരാ നെനക്ക് പറ്റ്യേ ? ‘
കണാരേട്ടന്‍ കാര്യം പറഞ്ഞു. കുര്യാക്കേട്ടന് കാര്യം അത്ര പന്തിയായി തോന്നിയില്ല. ഒന്നുകില്‍ ഇവനു മുഴുവട്ട്. അല്ലെങ്കില്‍..

വീട്ടിനകത്ത് പോയി മകന്‍ വാറുണ്ണിയെ വിളിച്ചു കാര്യം പറഞ്ഞു.

വാറുണ്ണി വേഗം തന്നെ പോയി തന്റെ ലാപ്ടോപ്പ് തുറന്ന് ഇന്റര്‍നെറ്റില്‍ പരതി.

ഒടുവിലാണതു കണ്ടത്.. ‘നാസ’യുടെ സൈറ്റില്‍ ..

ചൊവ്വയില്‍ ഒരു സ്ത്രീ രൂപം....

അപ്പോള്‍ തന്നെ തന്റെ ബ്ലോഗ് തുറന്ന് അടുത്ത കവിത കാച്ചി.

വ്യത്യസ്ഥനാമൊരു ക്ലൈമ്പറാം കണാരനെ
സത്യത്തിലാരും തിരിച്ചറിഞ്ഞില്ല.
...

പിന്നെ, ഓര്‍ക്കുട്ടില്‍ കയറി എല്ലാവര്‍ക്കും സ്ക്രാപ്പിട്ടു.

ചൊവ്വയിലെ ചേച്ചിയെ കണാരേട്ടന്‍ കണ്ടേ....

അങ്ങനെ സ്ക്രാപ്പുകളില്‍ നിന്നും സ്ക്രാപ്പുകളിലേക്ക് കണാരേട്ടന്‍ ചേച്ചിയെ കണ്ട വിവരം പറന്നു നടന്നു.

സ്ക്രാപ്പ് കണ്ട മലയാളദേവി പത്രപ്രവര്‍ത്തകനും കോപ്പാനിനക്ക് ടൂര്‍ണ്ണമെന്റിന്റെ സ്പെഷല്‍ കറസ്പോണ്ടന്റുമായ മനീഷ് കൂത്താട്ടുകുളം എല്ലാ ബ്ലോഗര്‍മാരുമായും സംവദിച്ചു.

ആരാണീ ചേച്ചി ?

ബ്ലോഗില്‍ മൊത്തം രണ്ടു ചാച്ചിമാരേ ഉള്ളു. ഒന്ന് ചെല്ലമ്മ ചേച്ചി. ഈയടുത്ത കാലത്ത് പ്രൌഢഗംഭീരമായ ഒരു കവിത ചേച്ചി എഴുതിയിരുന്നു.

തേങ്ങാച്ചമ്മന്തി
വെട്ടുകല്ല്
ഏപ്രില്‍ 1
എല്‍.ഐ.സി ഏജന്റ്
മടക്കിക്കുത്തിയ മുണ്ട്
നായ്ക്കൊര്‍ണ്ണപ്പൊടി
നീല സാരി --

ആ ചേച്ചി ചെല്ലമ്മച്ചാച്ചിയാണോ ?

ആണോ...

പിന്നെയുള്ള ചേച്ചി രമേച്ചി..

രമേച്ചി ഈയിടെ അപൂര്‍വ്വമായേ ബ്ലോഗൂ.. പ്രശസ്ത എഴുത്തുകാരന്‍ കോന്തുണ്ണിനായരുടെ നോവലായ ‘മിന്നുകെട്ട്’ ന്റെ 150 -ം വാര്‍ഷികാഘോഷപരിപാടികളില്‍ മുഴുകിയിരിക്കുകയാണ്.

പിന്നെ ആര് ?

പടം പിടിക്കുന്ന കാല്‍പ്പിള്ളിയും പിടിച്ച പടത്തെ ബ്ലാക് & വൈറ്റാകി മാസക്കുറിപ്പിലിടുന്ന നീരജനും സിഗ്നല്‍ തെറ്റിച്ചതിനു പോലീസ് പിടിച്ചപ്പോള്‍ കവിത ചൊല്ലിക്കേള്‍പ്പിച്ച ചുള്ളനുമെല്ലാം ആലോചനോട് ആലോചന. ...

ആര്‍ക്കും തന്നെ മനസ്സിലായില്ല ആ ചാച്ചിയാരെന്ന്.

അന്ന് കിട്ടുണ്ണിച്ചേട്ടന്റെ ചായക്കടയില്‍ ചെന്നപ്പോഴാണ് തട്ടാന്‍ വാസു കണാരേട്ടനോട് ചോദിക്കുന്നത്
‘കണാരന്‍ ചൊവ്വയിലെ ചേച്ചിയെ കണ്ടൂന്ന് പറയണത് നേരാണോ ?’
‘പിന്നല്ലാണ്ട്..’
‘എങ്ങനീണ്ട് മൊതല് ? ’
‘ഞാനാദ്യം വിചാരിച്ചത് മ്മടെ മുണ്ടിക്കുട്ട്യാന്നാ.....ഇതതൊന്ന്വല്ലാത്രേ.. ഏതോ ബ്ലാഗ് ചേച്ച്യാന്നാ വാറുണ്ണി പറയണെ..’

‘അതെന്തൂട്ടാ കണാരാ ബ്ലാഗ് ചേച്ചീന്ന് പറഞ്ഞാല് ?’

‘ആര്‍ക്കറിയാം.. അവന്‍ ദേ കമ്പോട്ടര്‍ല് കുത്തീട്ട് പറഞ്ഞതാ..’

ഏതായാലും നാട്ടില്‍ കണാരനു നല്ല പേരായി. കാണുന്നവരെല്ലാം കണാരനോട് ചോദിച്ചു ..

പക്ഷേ സ്വന്തം കുടുമ്മത്ത് ഇതാ‍യിരുന്നില്ല പ്രതികരണം.

‘നിങ്ങ അവള്‍ടെ കൂടെ പോയി കെടക്ക് മനുഷ്യ...’ എന്നാണ് അന്ന് രാത്രി കിടയ്ക്ക പായീന്നും കണാരേട്ടനെ ഇറക്കിവിടുമ്പോ മുണ്ടിക്കുട്ടി പറഞ്ഞത്.

പാവം കണാരേട്ടന്‍ വീടിന്റെ വരാന്തയിലിരുന്ന് കാജാ ബീഡിക്ക് തീ‍കൊളുത്തി.

മഴ

2008-01-17T04:24:00.000-08:00

ആരുമറിയാതെ
ആരും കാണാതെ
ഉള്ളില്‍ ഒരു മഴ
സ്നേഹമഴ

വിങ്ങാന്‍ മറന്ന്
തുളുമ്പാന്‍ കൊതിച്ച്
പലരുമുണ്ടെന്ന ശ്രുതിയില്‍
ലയിക്കാന്‍ കൊതിച്ച്
പലതുമുണ്ടെന്ന ഭാഗ്യത്തെ
പുണരാന്‍ വെമ്പി
കാത്തുകാത്തിരുന്ന നേരം
ഞാന്മാത്രമറിയും
ഞാന്‍
വെറുമൊരനാഥയെന്ന്

നിഴല്‍

2008-01-16T01:51:00.000-08:00

എത്ര പറഞ്ഞിട്ടും തിരിച്ചുപോവാത
മറിച്ചു പറയാനൊന്നുമില്ലാതെ
എന്നെ പുണരാന്‍ വെമ്പുന്ന
വെറുമൊരു നിഴലാണു നീ.

വിട്ടുപോവുക വിട്ടുപോവുക
നീയറിയാതൊരു നിമിഷത്തെ
എനിക്കു വിട്ടുതരിക
ഉറങ്ങട്ടെ സ്വസ്ഥം .

സര്‍വ്വീസ് പായ്ക്ക്

2007-12-30T05:38:00.000-08:00

നാലു ചുവരുകള്‍
നിറയെ ഫയലുകള്‍
കമ്പ്യൂട്ടര്‍ റൂമിലെന്തിനിത്ര
ബോക്സ് ഫയലുകള്‍ ?

നിറഞ്ഞ സിഡി ബോക്സുകളിലെന്തിനിത്ര
സര്‍വ്വീസ് പായ്ക്കുകള്‍ ?

ഒരു ജിബി ഡാറ്റാഫയലിനെന്തിനു
റാക് സെര്‍വ്വര്‍ ?

പോയിന്റു കൂട്ടിയ പുതിയ കണ്ണട
മോണിറ്ററില്‍ നോക്കി
ഊര്‍ദ്ധ്വം വലിച്ചുകൊണ്ടൊന്നാം
പെന്റിയം ചിരിച്ചു മറിഞ്ഞു.

വിചാരവും ധ്യാനവും ഒന്നാണോ ?

2007-12-22T05:02:00.000-08:00

വിചാരവും ധ്യാനവും ഒന്നാണോ ?

സര്‍വ്വസങ്കല്പ വികല്പനങ്ങളും ഒഴിഞ്ഞിരിക്കുന്ന അവസ്ഥയെ ധ്യാനം എന്നു പറയാം. അതിന്റെ അര്‍ത്ഥം ധ്യാനിക്കാന്‍ കഴിയുകയില്ല എന്നാ‍ണ്.

ധ്യാനം എന്നാല്‍ ഒരു അവസ്ഥയാണ്. മനസ്സ് അടങ്ങിയിരിക്കുമ്പോഴുള്ള അവസ്ഥ. മനസ്സുകൊണ്ടു പിന്നെ ചെയ്യാന്‍ കഴിയുന്നത് എന്താണ് ?

വിചാരം.

വിചാരം എങ്ങനെ നയിക്കപ്പെടണമെന്ന് അറിയാമോ ?
തര്‍ക്കവും ന്യായവും മീമാംസയും എല്ലാം ഉണ്ടായിട്ടുള്ളത് ചിന്തയ്ക്ക് പദ്ധതി ഉണ്ടാക്കിക്കൊടുക്കാനാണല്ലോ.
വ്യാകരണം പഠിച്ചിട്ടാണോ മനുഷ്യര്‍ സംസാരിച്ചുതുടങ്ങിയത് ?
തര്‍ക്കം പഠിച്ചിട്ടേ ചിന്തിക്കാന്‍ പാടുള്ളൂ ?
അടിസ്ഥാനപരമായ അറിവ് ആദ്യം തന്നെ മനസ്സില്‍ ഒളിഞ്ഞിരിപ്പുണ്ടാവും. ഉപനിഷത്തുകളിലൂടെ ഘൃഷിമാരും ഗീതയിലൂടെ വ്യാസനും ശങ്കരനുമെല്ലാം പഠിച്ച സര്‍വ്വകലാശാല ഏതാണ് ? അവരുടെ ദര്‍ശനത്തിനു ഒരു സമഗ്രതയുണ്ടായിരിക്കുമ്പോള്‍ പണ്ഠിതരുടെ വികലമാകുന്നതെന്തേ ?
ശൂന്യാകാശത്തില്‍ ഒളിഞ്ഞിരിക്കുന്ന തടസ്സങ്ങളെ കണക്കുകൂട്ടി കണ്ടെത്തി. പ്രാതിയൌഗികമായ കണക്കുകൂട്ടലുകള്‍കൊണ്ട് അവയേ ഒഴിവാക്കി. ചന്ദ്രനിലും ചൊവ്വയിലും കടന്നുചെല്ലുവാന്‍ കഴിയുന്ന മനുഷ്യന്റെ മനസ്സിനു എന്തുകൊണ്ട് ആ കണക്കുകൂട്ടലിലെ തെറ്റും ശരിയും നിര്‍ണ്ണയിക്കുന്ന ബുദ്ധിയുടെ സ്വഭാവവും സ്വരൂപവും അളക്കാനായി സ്വാത്മാവിലേക്കുതന്നെ നടന്നുചെല്ലുവാന്‍ തോന്നുന്നില്ല ? അങ്ങനെയൊന്ന് സംഭവിച്ചാല്‍ തന്നെ അതെന്തുകൊണ്ട് ഇത്ര ദുഷ്കരമായിരിക്കുന്നു ?

ശരിയായ പ്രതിജ്ഞയില്‍ എത്തിച്ചേരണമെങ്കില്‍ ചിന്തയെ വേണ്ടവിധത്തില്‍ മുന്നോട് കൊണ്ടുപോകാന്‍ കഴിയണം. ഇവിടെ വിശേഷബുദ്ധിയേക്കാള്‍ സാമാന്യബുദ്ധിയ്ക്കാണ് പ്രാധാന്യം നല്‍കേണ്ടത്.

എവിടെയോ കണ്ട ഒരു കമന്റാണ് ഇങ്ങനെ ഒരു കുത്തിക്കുറിപ്പിനാധാരം.

കണ്ടമ്പുള്ളി ബാലനാരായണന്‍ ഓര്‍മ്മയായി

2007-12-15T21:48:00.000-08:00

കണ്ടമ്പുള്ളി ബാലനാരായണന്‍ (നാണു എഴുത്തച്ഛന്‍ ശിവശങ്കരന്‍) ചെരിഞ്ഞു. രാജ്യത്തെ ഏറ്റവും വലിയ നാട്ടാനയായിരുന്നു. പാലക്കാട് ലക്കിടി പാലത്തിനടുത്ത് വെച്ച് ലോറിയില്‍ കയറ്റുമ്പോള്‍ കുഴഞ്ഞു വീഴുകയായിരുന്നു.

'സഹ്യനേക്കാള്‍ തലപ്പൊക്കം, നിളയേക്കാളുമാര്‍ദ്രത'- കവിതയിലെ വരികളില്‍ 'പട്ടാമ്പി നാരായണന്‍ എന്ന കണ്ടമ്പുള്ളി ബാലനാരായണന്‍ എന്ന നാണു എഴുത്തച്ഛന്‍ ശിവശങ്കരന്' വരികളിലെ ആദ്യഭാഗമാണ് കൂടുതല്‍ ചേരുക. ആര്‍ദ്രതയേക്കാള്‍ രൌദ്രഭാവമാണ് അവനില്‍ മുന്നിട്ടുനിന്നിരുന്നത്. അതുകൊണ്ടുതന്നെ ഒരേസമയം ഉത്സവപ്പറമ്പുകളിലെ നായകനും വില്ലനുമായി ഈ കൊമ്പന്‍.

തലപ്പൊക്കം കൊണ്ട് ഉത്സവപ്പറമ്പുകളിലെ ആവേശമായിരുന്നു കണ്ടമ്പുള്ളി ബാലനാരായണന്‍ എന്ന നാണുഎഴുത്തച്ഛന്‍ ശിവശങ്കരന്‍. പത്തേമുക്കാല്‍ അടി ഉയരം, ആരേയും കൂസാത്ത, ആര്‍ദ്രതയില്ലാത്ത ആ തലയുയര്‍ത്തിയുള്ള നില്പ്. ആനക്കമ്പക്കാര്‍ ആ തലയെടുപ്പിനെ നമിച്ചിരുന്നു, ഒപ്പം പേടിക്കുകയും. കാരണം കേരളത്തില്‍ ഏറ്റവും കൂടുതല്‍ മയക്കുവെടിയേറ്റതില്‍ മുന്‍പന്തിയില്‍ ഈ കൊമ്പനുണ്ടായിരുന്നു എന്നതുതന്നെ. ഇവന്റെ പരാക്രമം കണ്ട ഉടമ കണ്ടമ്പുള്ളി ബാലന്‍ ഹൃദയംപൊട്ടി മരിക്കുകയായിരുന്നു.

ബിഹാറില്‍നിന്നും പട്ടാമ്പിയുടെ മണ്ണിലേക്കെത്തിയ ആദ്യദിനംതന്നെ അനുഗമിച്ച പാപ്പാന്റെ കഥ കഴിച്ചവനാണ് കക്ഷി. മയക്കുവെടി പ്രചാരത്തിലെത്തുന്നതിനും മുമ്പ് മുടക്കുവെടി വച്ചാണ് അന്ന് ഇവനെ തളച്ചത്. കണ്ടമ്പുള്ളിക്കാരുടേതായി മാറിയതിനുശേഷം ചൂണ്ടല്‍ പാറക്കുളത്തില്‍ വച്ച് വര്‍ഷങ്ങള്‍ക്കുമുമ്പ് ഒന്നാംപാപ്പാന്‍ രാജനേയും ബാലനാരായണന്‍ കുത്തിമലര്‍ത്തി. ഇതൊക്കെയാണെങ്കിലും കടപുഴക്കിയ മരം തടഞ്ഞുനിര്‍ത്തി തറവാട്ടുവീടിനെ രക്ഷിച്ച കഥയും ചൂണ്ടല്‍ സെന്റ് ജോസഫ്സ് ആശുപത്രിയില്‍ ചികിത്സയിലിരുന്ന കണ്ടമ്പുള്ളിയിലെ തറവാട്ടമ്മ 95-കാരി പാര്‍വതിയമ്മയെ കാണാനെത്തിയ ചരിത്രവും ഇവനു സ്വന്തം.

ബിഹാറിയായ ബാലനാരായണനെ കാല്‍നൂറ്റാണ്ടുമുമ്പാണ് ബാലന്‍ വാങ്ങിയത്. പട്ടാമ്പിയിലെ അഡ്വ. ഉദയവര്‍മനില്‍നിന്നും ഒന്നരലക്ഷം കൊടുത്ത്. കണ്ടമ്പുള്ളിയിലെത്തി ആദ്യ പത്തുവര്‍ഷത്തോളം ഇവന്റെ കുറുമ്പ് ഏറെ പ്രശ്നങ്ങള്‍ സൃഷ്ടിച്ചിരുന്നു. കേരളത്തിലെ ലക്ഷണമൊത്ത ആനകള്‍ ഏഴുന്നള്ളിയിട്ടുള്ള തൃശൂര്‍പൂരത്തിന്റെ അവസാന ഇലവനില്‍ സ്ഥാനം ലഭിക്കാഞ്ഞതും ഈ കുറുമ്പു കാരണമാകാം. വര്‍ഷത്തില്‍ പരമാവധി 50 എഴുന്നള്ളിപ്പുകള്‍ക്കു മാത്രമേ ബാലനാരായണനെ വിട്ടിരുന്നുള്ളൂ.

കണ്ടമ്പുള്ളിക്കാര്‍ക്ക് ആനക്കാര്യത്തില്‍ മേല്‍വിലാസമുണ്ടാക്കിയതുതന്നെ ബാലനാരായണനായിരുന്നു. ഉത്സവപ്പറമ്പുകളില്‍ ഇവന്റെ ഉയരംതന്നെ ചര്‍ച്ചാവിഷയമായി. മദകാലയളവില്‍ പരാക്രമിയാകുമെങ്കിലും ബാലനാരായണന്റെ ഉടമ ബാലന്റെ അമ്മ പാര്‍വതിയമ്മയ്ക്കു മുന്നില്‍ ശാന്തനാകും. നീരിലുള്ള ഇവന് തീറ്റകൊടുത്തിരുന്നതും ഇവരാണ്. ഭക്ഷണവുമായെത്തുന്ന ഇവര്‍ക്കായി പട്ട നീക്കി ഇവന്‍ വഴിയുമൊരുക്കുമായിരുന്നു. പിന്നീട് പട്ടയില്‍ തട്ടിത്തടഞ്ഞ് വീണ് ആശുപത്രിയിലായ ഇവരെ കാണാന്‍ ബാലനാരായണന്‍ എത്തിയതും വലിയ വാര്‍ത്തയായിരുന്നു. ആശുപത്രിയിലെത്തി തുമ്പിക്കൈ കൊണ്ട് തലോടി കണ്ണീരൊലിപ്പിച്ചുകൊണ്ടായിരുന്നു അന്നിവന്റെ മടക്കയാത്ര.

ചെമ്പൂത്രയിലെ പൂരപ്പറമ്പില്‍ വച്ചായിരുന്നു ഉടമ ബാലന്റെ മരണം. 1996-ലായിരുന്നു അത്. കൊടുങ്ങല്ലൂര്‍ക്കാവ് ഭഗവതിയുടെ തിടമ്പേറ്റിയിരുന്നത് ബാലനാരായണനായിരുന്നു. ഇടയ്ക്ക് പറ്റാനയുടെ കൊമ്പ് ഇവന്റെ മേലുരസി. ഇതോടെ ആന മുമ്പോട്ടുകുതിച്ചു. പാപ്പാനും ഓടിമാറി. ആരേയും അടുപ്പിക്കാതെ ക്ഷേത്രപരിസരത്ത് നില്‍ക്കുകയായിരുന്ന ആനയെ ബാലന്റെ മക്കളായ മോഹന്‍ദാസും സുന്ദരനും സുനിലും ചേര്‍ന്നാണ് അനുനയിപ്പിച്ചത്. വിവരം കേട്ടെത്തിയ ബാലന്‍ ക്ഷേത്രപ്പറമ്പിലെത്തിയെങ്കിലും അവിടെവച്ച് കുഴഞ്ഞുവീണു. ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. പിന്നീട് ഇളയമകന്‍ സുനിലിനായി ഉടമസ്ഥാവകാശം. ഒടുവില്‍ മൂന്നു വര്‍ഷം മുമ്പാണ് ബാലനാരായണനെ നാണുഎഴുത്തച്ഛന്‍ഗ്രൂപ്പ് ശിവശങ്കരനാക്കിയത്.

കഴിഞ്ഞ തവണ തൃശ്ശൂര്‍ വടക്കേ സ്റ്റാന്‍ഡിനടുത്ത് നാണു എഴുത്തച്ഛന്റെ തൊടിയില്‍ വെച്ച് കണ്ടപ്പോഴും അവന്റെ ശൌര്യത്തിനൊരു മാറ്റവുമുണ്ടായിരുന്നില്ല. സൌകര്യം കിട്ടിയാല്‍ പട്ടയെടുത്ത് അടുത്ത് വരുന്ന അപരിചിതരെ എറിയാന്‍ യാതൊരു മടിയുമുണ്ടായിരുന്നില്ല. എങ്കിലും ആ തലയെടുപ്പ് ആരുമൊന്ന് നോക്കിനിന്നുപോകും. ഇനിയതില്ല.

വരയും പാരയും.

2007-12-12T21:02:00.000-08:00

വര
നീണ്ട വര
കുറുകിയ വര
വളഞ്ഞ വര
വാലുള്ള വര
കനമുള്ള വര
ചുളുങ്ങിയ വര
ചെരിഞ്ഞ വര
എല്ലാ വരകള്‍ക്കും
വേരു തലവര
ഒടുക്കം അടിവര

പാര
കമ്പിപ്പാര
കനമുള്ള പാ‍ര
നീളമുള്ള പാര
നിറമുള്ള പാര
നിജമുള്ള പാര
എല്ലാ പാരകള്‍ക്കും
പിടി കൈപ്പിടി

കൃഷ്ണന്‍കുട്ടി ചേട്ടന്‍ ഇനി ആനക്കഥകളിലേക്കും കവിതകളിലേക്കും.

2007-10-25T02:13:00.000-07:00

എല്ലാ അവധിക്കും ഞാന്‍ കൃഷ്ണങ്കുട്ടിച്ചേട്ടനെ കാണാറുണ്ട്. ഇത്തവണയും ഏറെ തിരക്കുണ്ടായിട്ടും കാണാതെ പോരാന്‍ മനസ്സുണ്ടായില്ല. വര്‍ഷങ്ങളായി അങ്ങനെ ഒരു ആത്മബന്ധമാണ്.കൃഷ്ണന്‍ കുട്ടിച്ചേട്ടനോട് സംസാരിച്ചിരുന്നാല്‍ നേരം പോകുന്നതേയറിയില്ല.

ഇത്തവണ കാണുമ്പോള്‍ ഏറെ ക്ഷീണിതനായിരുന്നു‍. എങ്കിലും സംസാരത്തിനു കുറവൊന്നുമില്ല.പുതുതായി വന്ന ആനകളെ കുറിച്ചും അടുത്ത കാലത്ത് ആനകള്‍ ഇടയുന്നതെന്തുകൊണ്ടാ‍ണെന്നതിനെ കുറിച്ചും ആനകളുടെ സ്വഭാവത്തില്‍ വന്ന മാറ്റങ്ങളെകുറിച്ചും സമകാലീന മലയാളകവിതകളെക്കുറിച്ചുമെല്ലാം ഗുരുവായൂര്‍ ദേവസ്വത്തിന്റെ ആനക്കൊട്ടിലിലെ ക്വാര്‍ട്ടേഴ്സില്‍ തന്റെ ഒറ്റമുറി വീടിന്റെ ചായ്പ്പില്‍ ഇരുന്ന് സംസാരിച്ച് രണ്ടു മണിക്കുര്‍‍ കടന്നുപോയതറിഞ്ഞില്ല.പത്തമ്പത്തഞ്ച് വയസ്സയി. ഇനി ആനപ്പാപ്പന്റെ പണി നിര്‍ത്തുന്നെന്നു പറഞ്ഞു. ഒക്ടോബര്‍ 31 നു പിരിയാന്‍ അപേക്ഷ കൊടുത്തിട്ടുണ്ട്.

ആനകളെപ്പോലെ തന്നെ കവിതകളും കൃഷ്ണന്‍ കുട്ടിച്ചേട്ടന്റെ ജീവിതത്തിന്റെ ഒരു ഭാഗം തന്നെയാണ്. കുറച്ചുകാലം സുഖമില്ലാതെ കിടപ്പിലായപ്പോഴും കവിതകളായിരുന്നു കൂട്ട്. ഇരുന്നൂറ്റന്‍പതോളം കവിതകള്‍ എഴുതിയിട്ടുണ്ട്. ‘പുനര്‍ജനി’ , ‘കല്ലുകളില്‍ കാണുന്നത്’ എന്നീ രണ്ടു കവിതാ സമാഹാരങ്ങള്‍ പ്രസിദ്ധീകരിച്ചു. ഇരുപതോളം കഥകളും ഒരു നോവലും വേറെ.

ഇനി ഒരു വലിയ ആനക്കഥകളുടെ സമാഹാരമിറക്കാനുള്ള പരിപാടിയിലാണ് കൃഷ്ണങ്കുട്ടിച്ചേട്ടന്‍. അതുപോലെ തന്നെ ആനകളുടെ ഒരു എന്‍സൈക്ലോപീഡിയയും വെബ്സൈറ്റും മനസ്സിലുണ്ട്.

ഇരുപത്തെട്ടുവര്‍ഷമായി പാപ്പാനായിട്ട്. സ്വദേശം പാലക്കാട് ജില്ലയിലെ കര്‍ക്കിടാംകുന്നാണെങ്കിലും വളരെ ചെറുപ്പത്തില്‍ തന്നെ ഗുരുവായൂരെത്തിയിട്ടുണ്ട്. അച്ഛന്‍ ഗോവിന്ദന്‍ നായര്‍ ‍ ക്ഷേത്രത്തിലെ ആന പാപ്പാനായിരുന്നു. ആദ്യം കുട്ടിശങ്കരന്‍ എന്ന ആനയുടെ പാപ്പാനായിരുനു കൃഷ്ണങ്കുട്ടിച്ചേട്ടന്‍. പിന്നെ പത്തിരുപതോളം ആനകളുടെ പാപ്പാനായിട്ടുണ്ട്. ഭാര്യയും മകനും സഹോദരനും സഹോദരിയുമൊക്കെയായി ആനക്കൊട്ടിലിലെ ക്വാര്‍ട്ടേഴ്സില്‍ താമസിക്കുന്നു.

മൂന്നു വര്‍ഷം മുമ്പ് ഒരു ആനയൂട്ടിനു ‘രശ്മി’ എന്ന ആനയുമായി പാലക്കാട്ടേക്ക് പോകുമ്പോള്‍ വാഹനമിടിച്ച് വാരിയെല്ലുകള്‍ തകര്‍ന്ന് ആറുമാസം ചികിത്സയിലായിരുന്നു. രണ്ടു വര്‍ഷം മുമ്പാണ് തിരിച്ച് ജോലിക്ക് കയറിയത്. അതിനു ശേഷം പുറത്തേക്കൊന്നും അധികം പോകാറില്ല. ആനക്കൊട്ടിലില്‍ തന്നെ. വായനയും എഴുത്തും തന്നെ. സുഹ്രുത്തുക്കളല്ലാതെ കാര്യമായ സമ്പാദ്യങ്ങളൊന്നും ഇല്ല. ഇനി മരണം വരെ ഭക്തവത്സലനായ ഗുരുവായൂരപ്പന്റെ മുന്നില്‍ തന്നെ.

പനി

2007-10-08T08:17:00.000-07:00

ഒരു കുളിര്
ശിരസ്സിലേക്കിറങ്ങി
പുലരുവോളം ത്രസിച്ചു
കളിച്ചു.

വരില്ലെന്നാണയിട്ടിറങ്ങിപ്പോയതാണ്
പണ്ട്.

വാഷ് ബേസിനില്
‍ചിതറിയ വറ്റുകള്‍ക്കിടയില്
'തമിഴത്തി'യുടെ ഭ്രൂണവും
പല്ലിളിച്ചു കാണിച്ചു

എന്തൊരാശ്വാസം

പടിപ്പുരവാതിലില്‍
തിരിഞ്ഞു നോക്കാതെ നടന്നു
പനി.

(തമിഴത്തി - ഇന്നലെ മനോരമ ന്യൂസില്‍ മലപുറത്ത് ഒരു ഗര്‍ഭിണിയായ ഒരു തമിഴ് സ്ത്രീയെ മോഷണക്കുറ്റം ചുമത്തി ചിലര്‍ മര്‍ദ്ദിച്ചത് കണ്ടു.)

ഗുരുവായൂരപ്പനും ഓണത്തിരക്ക്.

2007-08-27T00:04:00.000-07:00

ഓണത്തിനു തൊഴാന്‍ വന്നവരുടെ തിരക്ക് ഗുരുവായൂരിലും... പത്തുമിനിട്ട് മുമ്പ് കിഴക്കേ നടയില്‍ സമൂഹ മഠം ഹാളിലെത്തിയത് പാലട പാഴ്സല്‍ വാങ്ങാന്‍ മാത്രമായിരുന്നു.കൂടെ ഒരു ദര്‍ശനവും ആവാമെന്ന് വിചാരിച്ചത് തെറ്റായിപ്പോയി. നല്ല തിരക്ക്..കാലത്ത് ഏട്ടുമണിക്ക് ക്യൂവില്‍ നില്‍ക്കുന്നവര്‍ ഇപ്പോഴും വരിയിലാണ്. അപ്പോള്‍ പിന്നെ രാത്രി ശീവേലിക്കാവാം ദര്‍ശനമെന്ന് തീരുമാനിച്ചു.

എന്റെ മൊബൈല്‍ കാമറയില്‍ തെളിഞ്ഞ കുറച്ച് പടങ്ങള്‍ ..

തമിഴന്റെ ഓണം

2007-08-26T09:33:00.000-07:00

ഇതു സന്തോഷത്തിന്റെ ഓണം.

മലയാളിയുടെയല്ല. തനി പാണ്ടിയുടെ... തമിഴന്റെ ഓണം.

മലയാളി ചിക്കന്‍ 65 യും തന്തൂരി ചിക്കണുമായി ഓണം സ്വപ്നം കാണുമ്പോള്‍ തമിഴന്‍ മലയാളിയുടെ ഓണത്തെ അതിരറ്റു ആശ്ലേഷിക്കുന്നു.

ഇന്നു ഉത്രാടം. പാറമ്മേക്കാവിനുമുന്നില്‍ തിങ്ങിക്കൂടിയ ജനസഹസ്രത്തിനു ഓണമാഘോഷിക്കാന്‍ തമിഴന്റെ ചെണ്ടുമല്ലിപ്പൂവും പിച്ചിപ്പൂവും മലയാളിയുടെ ഓണത്തിനു അത്യാവശ്യ ഘടകം തന്നെ.

href="http://3.bp.blogspot.com/_4beK8WtivFM/RtGstLxTaDI/AAAAAAAAANQ/2Bjpd07vmBM/s1600-h/Image044.jpg">

എല്ലാവര്‍ക്കും ഓണാശംസകള്‍ !!

ചുള്ളിക്കാടിനു അന്‍പതുവയസ്സ്..

2007-07-30T02:29:00.000-07:00

ചൂടാതെ പോയ് നീ നിനക്കായ് ഞാന്‍
ചോര ചാറിച്ചുവപ്പിച്ചൊരെന്‍ പനീര്‍പ്പൂവുകള്‍
കാണാതെ പോയ് നീ നിനക്കായ് ഞാനെന്റെ
പ്രാണന്റെ പിന്നില്‍ കുറിച്ചിട്ട വാക്കുകള്‍

മലയാളത്തിന്റെ ധിക്കാരിയായ യുവ കവിക്ക് ഇന്നേക്ക് (30/07/2007) അന്‍പതു വയസ്സാവുന്നു. എണ്‍പതുകളിലെ കാമ്പസ്സുകളിലെ ഒഴിച്ചുകൂടാനാവാത്ത ലഹരിയായിരുന്നു ചുള്ളിക്കാടിന്റെ കവിതകള്‍. പതിനെട്ടുകവിതകള്‍, മാനസാന്തരം, അമാവാസി എന്നിവയാണ് പ്രധാന കൃതികള്‍.

കുറച്ചുകാലമായി കവിതയെഴുത്തില്‍ നിന്നും വിട്ടു നില്‍ക്കുന്ന അദ്ദേഹം സിനിമാ സീരിയല്‍ അഭിനയരംഗത്ത് ചുവടുറപ്പിച്ചുകഴിഞ്ഞു. നല്ലൊരു പ്രാസംഗികനും കൂടിയാണ്. ഒരു മിന്നാമിനുങ്ങിന്റെ നുറുങ്ങുവെട്ടം പോലെ കുറച്ചുകാലം മുമ്പ് ചുള്ളിക്കാടിന്റേതെന്ന പേരില്‍ ഒരു ബ്ലോഗ് കണ്ടിരുന്നു. പിന്നീട് അത് അപ്രത്യക്ഷമായി.

പ്രിയ കവിക്ക് എല്ലാ ഐശ്വര്യങ്ങളും നേരുന്നു.

ഉപകാര സ്മരണ

2007-07-17T06:19:00.000-07:00

കുറ്റബോധം ഒന്നുകൊണ്ടുമാത്രമാണ് കുമാരേട്ടന്‍ ഇതിനിറങ്ങിത്തിരിച്ചത്. ഇത്രയും കാലം വിശ്വസിച്ച ഒരാള്‍ ഇങ്ങനെ ഒരു വഞ്ചന ചെയ്യുമെന്ന് സ്വപ്നത്തില്‍ പോലും കുമാരേട്ടന്‍ കരുതിയിരുന്നില്ല. ഒരു ബൂലോക കോഴിയെ അന്വേഷിക്കാന്‍ പോകുന്നതിനുമുന്‍പ് ഗീവര്‍ഗ്ഗീസ് പുണ്യാളനു കോഴിയെ നടയിരുത്തണമെന്ന് രാത്രി വൈകി വീട്ടില്‍ വന്ന പല സുഹൃത്തുക്കളും പറഞ്ഞതുകൊണ്ടു മാത്രമാണ് കുമാരേട്ടന്‍ സഹധര്‍മ്മിണിയറിയാതെ കാലത്ത് തന്നെ കോഴിക്കൂട്ടില്‍ കൈയ്യിട്ട് ഉറക്കം തൂങ്ങിയിരുന്ന ഒരു കോഴിയെ എടുത്ത് സഞ്ചിയിലാക്കിയത്. പിന്നെ അധികം താമസിയാതെ ആദ്യത്തെ ബസ്സുപിടിക്കാന്‍ നീലച്ചന്ദ്രനെ സാക്ഷി നിര്‍ത്തി ബസ്റ്റോപ്പിലേക്ക് നീങ്ങി.

വളരെ മനസ്സമാധാനത്തോടെ ഇരുന്നിരുന്ന കോഴി ചന്തമുക്കെത്തിയപ്പോള്‍ ഡിങ്കനെ കണ്ട ദില്‍ബനെ പോലെ സഞ്ചിക്കുള്ളില്‍ കിടന്ന് പെരുകി. സഞ്ചിക്കകം കോഴി നഗര ശുചീകരണത്തിന്റെ ആവശ്യകതെയെക്കുറിച്ച് ക്ലാസെടുത്തു. സൌകര്യം കിട്ടിയാല്‍ ലെന്‍ വൈസ്മാനെ വരെ കൊണ്ടുവന്ന് ക്ലാസെടുക്കുമെന്ന് കുമാരേട്ടനൊരു മുന്നറിയിപ്പും. കുമാരേട്ടനത് സമ്മതിച്ചുകൊടുത്തു. ഏതായാലും അതിന്റെ അവസാനത്തെ ഒരു ആഗ്രഹമല്ലേ. സഞ്ചി പോയാലും കോഴി നന്നായല്‍ മതി എന്ന വിശ്വാസപ്രമാണം ചെല്ലി കുമാരേട്ടന്‍ യാത്ര തുടര്‍ന്നു.

ഇടപ്പിള്ളി പള്ളിയുടെ മണ്ണ്ഢപത്ത് നിന്ന് ഗീവര്‍ഗ്ഗീസു പുണ്യാളനു ആദ്യത്തെ തിരി കത്തിച്ചപ്പോഴാണ് ഒരു പൊട്ടലും ചീറ്റലും. ഒരു മാതിരി മലപ്പുറത്തെ മലയാളരംഭയുടെ ആപ്പീസിലിരുന്ന് കോപ്പാ അമേരിക്കയുടെ ഫൈനല്‍ കണ്ടിരിക്കുന്ന പാലാക്കാരന്‍ കൊച്ചുതോമായുടെ മൂക്കുപിഴിയലുപോലെ ‍.. മഴക്കാലമായതുകൊണ്ടാവുമെന്ന് വെറുതെ വിചാരിച്ചത് തെറ്റ്. മഞ്ഞുമ്മലിലെ കുട്ടൂസന്‍സ് പലചരക്കുകടയില്‍ നിന്നു തിരി വാങ്ങേണ്ടെന്ന് സഹധര്‍മ്മിണി പല വട്ടം പറഞ്ഞതാ. കത്താത്ത, വെറുതെ കിടന്നു ചീറ്റുന്ന തിരിയേ അവിടെയുള്ളുവെന്ന് ഏത് കഞ്ഞിപ്പശകൂട്ടിയ കാല്‍ ശരായിയിട്ട പോലീസുകാരനും അറിയാവുന്നതാണ്. എങ്കിലും നിവൃത്തികേടുകൊണ്ട് വാങ്ങിപ്പോയി. കുറെ നേരത്തെ കരച്ചിലിനും പിഴിച്ചിലിനുമൊടുവില്‍ തിരികത്തി ജ്വലിച്ചു നിന്നു. കുമാരേട്ടനു സമാധാനമായി. കോഴിയെ സമര്‍പ്പിച്ചു പ്രാര്‍ത്ഥിച്ചു. ഈ കോഴിയെ നീയെടുത്ത് ആ ബൂലോക കോഴിയെ ദര്‍ശിക്കാനുള്ള അനുഗ്രഹം തരണേ ..

പിന്നെ, ട്രാന്‍സ്പോര്‍ട്ട് സ്റ്റാന്‍ ഡിലേക്ക് വെച്ചടിച്ചു.

‘വൈക്കം വഴി കോട്ടയത്തിനു പോകുന്ന ഫാസ്റ്റ് പാസഞ്ചര്‍ സ്റ്റാന്‍ഡിന്റെ വടക്കു വശത്തു പാര്‍ക്ക് ചെയ്തിരിക്കുന്നു..’

പിന്നെ ഏതുവഴിക്കൊക്കെ കോട്ടയത്തിനു പോകുമെന്ന് കുമാരേട്ടന്‍ ഡൌട്ടടിച്ചു.

ലക്ഷം മാതാവ് പാലം കഴിഞ്ഞ് അടുത്ത സ്റ്റോപ്പിലിറങ്ങി വലത്തോട്ട് നോക്കിയാല്‍ തെക്കോട്ടിറങ്ങി നില്‍ക്കുന്ന തലതിരിഞ്ഞ മലയാളരംഭയുടെ ആപ്പീസില്‍ ദുബായിലെ കുപ്പൂസും കോഴിയും കണികണ്ടുണരുന്ന അവനെ ഇന്നു കാണാതെ തിരിച്ചുപോരില്ലെന്ന് ശപഥം ചെയ്തിരിക്കുന്ന കുമാരേട്ടന്‍ രണ്ടും കല്‍പ്പിച്ച് ശകടത്തില്‍ കയറി.

മൂന്നര രൂപകൊടുത്ത് വാങ്ങിയ ലേറ്റ് എഡിഷന്‍ മലയാള രംഭയുടെ കുത്തിനു പിടിച്ച് തുറന്നു. രണ്ടാം പേജില്‍ ഇതാ‍ തേടിയ വള്ളി മാമുക്കോയ സ്റ്റൈലില്‍ ഇരിക്കുന്നു. ‘ഉപകാര സ്മരണ’ കോളത്തില്‍ 10 X 12 സൈസില്‍. ഉദ്ദിഷ്ട കാര്യത്തിനു ഉപകാര സ്മരണ. നല്ല നിലയില്‍ പ്രവര്‍ത്തിച്ചിരുന്ന തങ്ങളുടെ അണ്ടിക്കമ്പനി പൂട്ടിച്ചുതന്നതിനു ഉപകാരസ്മരണ. ഫിലഡാല്‍ഫിയയില്‍ നിന്നും കുഞ്ഞവറാന്‍‍ & ഫാമിലി.

ഓഹൊ ഇവനു ഈ പരിപാടിയും ഉണ്ടോ എന്റെ ഗീവര്‍ഗ്ഗീസ് പുണ്യാളാ. കണ്ടാല്‍ മാമുക്കോയയാണെങ്കിലും മമ്മൂട്ടിയുടെ കയ്യിലിരിപ്പാണവനെന്ന് വിശ്രുത സാഹിത്യ ശിരോമണി വടിവാള്‍ മുന്‍പൊരിക്കല്‍ ജാലകക്കാഴ്ചകള്‍ എന്ന പംക്തിയില്‍ അഭിപ്രായപ്പെട്ടത് കുമാരേട്ടന്‍ ഓര്‍മ്മിച്ചു.

എങ്ങനെയെങ്കിലും ഇവനെ ഇന്നു കണ്ടേ തീരു. ഇത്തവണ പരാജയപ്പെട്ടാല്‍ കുറുമാന്റെ ആജീവനാന്ത സുഹൃത്ത് പോത്തന്‍ കോട് എസ്പി. ഡാഷ് ചന്ദ്രനെ തന്നെ കൊണ്ടുവരേണ്ടി വരുമെന്ന് കുമാരേട്ടന്‍ കണക്കുകൂട്ടി.

വൈറ്റിലയും പൂണിത്തുറയും കടന്ന് സര്‍ക്കാര്‍ അനുവദിച്ചു തന്ന 60 കി.മീ സ്പീഡില്‍ ശകടം വെച്ചു പെടച്ചു. ഈ അവസ്ഥയില്‍ പോയാല്‍ കോട്ടയത്തെത്തിയാല്‍ തന്നെ യാത്രക്കാരെല്ലാം ഇറങ്ങിക്കഴിഞ്ഞേ പുറത്തിറങ്ങാനാവൂവെന്നു പോലും കുമാരേട്ടന്‍ ഭയന്നു. മേലില്‍ കാലത്തെ എല്ലാ സത്‍ക്കര്‍മ്മങ്ങളും കഴിച്ച് സഹധര്‍മ്മിണിയോട് റ്റാറ്റായും പറഞ്ഞേ ഒരു വഴിക്കിറങ്ങൂയെന്ന് അപ്പോള്‍ തന്നെ കുമാരേട്ടന്‍ ദൃഢപ്രതിഞ്ജയെടുത്തു.

ലക്ഷം മാതാ കോളനിയില്‍ വണ്ടിയിറങ്ങി മലയാള രംഭയുടെ ആപ്പീസ് ലക്ഷ്യമാക്കി കുമാരേട്ടന്‍ നടന്നു. സെക്യൂരിറ്റിക്കാരനു പകിടി കൊടുത്ത് കുമാരേട്ടന്‍ മലയാള രംഭയുടെ നാലുനില കെട്ടിടത്തിനകത്ത് അവനെ തപ്പാനിറങ്ങി. ആ കശ്മലനെ.. വാറുണ്ണിയെ.
കുമാരേട്ടന്‍ സബ് എഡിറ്ററായിട്ടുള്ള ‘അജപാലനം’ മാസികയില്‍ പാചക കുറിപ്പിന്റെ ആയിരത്തൊന്നാമത്തെ എപ്പിസോഡെഴുതാന്‍ മോഹന്‍ ലാലിന്റെ ഡേറ്റ് തരാമെന്ന് പറഞ്ഞ് സ്ഥലം വിട്ട കഷിയാണ് ഈ വാറുണ്ണി.

വെട്രിവേലിട്ട തറയില്‍ മിന്നി തിളങ്ങുന്ന പ്രതലത്തില്‍ കുമാരേട്ടന്‍ വെറുതെ കാലൊന്നു വെച്ചതേയുള്ളൂ.

പിറ്റേന്ന് കണ്ണു തുറക്കുമ്പോള്‍ കോട്ടയം മെഡിക്കല്‍ കോളജിലെ സ്പെഷല്‍ വാര്‍ഡില്‍ ഇഞ്ചക്ഷനുമായി നില്‍ക്കുന്ന നേഴ്സ് കുമാരേട്ടനോട് പറഞ്ഞു..
‘ചേട്ടനു ചിക്കന്‍ ഗുനിയായാണ്.. മിണ്ടാതെ അവിടെ കിടന്നോളണം..’
കുമാരേട്ടന്‍ വിറച്ചു കിടന്നു. കുനിഞ്ഞിരുന്ന് പത്രം വായിക്കുന്ന അടുത്ത കട്ടിലിലുള്ളവനില്‍ നിന്നും പത്രം കടം വാങ്ങി വായിച്ചു.
അന്നും മലയാള രംഭയിലെ രണ്ടാം പേജില്‍ 10 X 12 സൈസില്‍ ഒരു ഉപകാര സ്മരണ കോളമുണ്ടായിരുന്നു.
‘ചിക്കണ്‍ ഗുനിയയില്‍ നിന്നു വിടുതല്‍ തന്നതിന് ... ഉപകാരസ്മരണയോടെ പാലായില്‍ നിന്നും വാറുണ്ണി & ഫാമിലി..’
കുന്തം പിടിച്ചു നില്‍ക്കുന്ന ഗീവര്‍ഗ്ഗീസ് പുണ്യാളനു വാറുണ്ണിയുടെ ഛായയുണ്ടോയെന്ന് കുമാരേട്ടന് വര്‍ണ്യത്തിലാശങ്കയുയര്‍ന്നു.

കലാലയ വര്‍ണ്ണങ്ങള്‍

2007-07-07T00:41:00.000-07:00

മഴക്കാലം വന്നാല്‍ പലപ്പോഴും എന്റെ മനസ്സില്‍ വരുന്ന ഒരു ചിത്രമുണ്ട്. പഠിച്ചിരുന്ന കോളജിന്റെ.. തൃശ്ശൂര്‍ ജില്ലയിലെ എല്‍ത്തുരുത്തെന്ന ദ്വീപിലെ സെന്റ്. അലോഷ്യസ് കോളജിന്റെ ചിത്രം. ചുറ്റും നെല്‍പ്പാടം.. അതിനെ ചുറ്റി ഒരു കനാല്‍. മഴക്കാലത്ത് നെല്‍പ്പാടം വെള്ളം നിറഞ്ഞ് കിടക്കും. മനോഹരമായ ഒരു ദൃശ്യമാണത്. ദ്വീപിലേക്ക് ഒരു വലിയ കയറ്റമാണ്. ഒരു വശം റബ്ബര്‍തോട്ടം. മറുവശം മരച്ചീ‍നി കൃഷി ( എത്ര വലിയ കമ്പി വേലി കെട്ടിയാലും ഇരുകാലികളായ തൊരപ്പന്മാരുടെ ശല്യം സഹിക്ക വയ്യാതെ അച്ചന്മാര്‍ മരച്ചീനി കൃഷി പിന്നീട് നിര്‍ത്തിയെന്നറിഞ്ഞു. ). കയറ്റം കയറി ചെന്നാല്‍ പൂമരങ്ങള്‍ ഇതള്‍ വിരിയിക്കുന്ന വിശാലമായ കാമ്പസ്.

കുറച്ചുകാലം മുമ്പ് അവിചാരിതമായാണ് ഡോ. മുരളിധരന്‍ സാറിനെ ഓര്‍ക്കുട്ടില്‍ കിട്ടിയത്. മുരളി സാര്‍ കോളജില്‍ ഇംഗ്ലീഷ് അദ്ധ്യാപകനാണ്. 85-86 കാലഘട്ടത്തില്‍‍ എന്നെ പഠിപ്പിച്ചിട്ടുമുണ്ട്. കഴിഞ്ഞ ദിവസം സാറുമായുള്ള സൌഹൃദ ഭാഷണത്തിനിടയില്‍ ഇപ്പോഴത്തെ കാമ്പസ് എങ്ങനെയുണ്ടെന്ന് ചോദിച്ചു. നന്നായിരിക്കുന്നെന്ന് വിരസമായ ഒരു മറുപടി. പക്ഷേ, പിറ്റേന്ന് 'this is how your college now..' എന്നൊരടിക്കുറിപ്പുമായി കുറെ ചിത്രങ്ങള്‍ എന്റെ മെയില്‍ ബോക്സില്‍..

ഇതാണ് കോളജിലേക്കുള്ള വഴി. എല്ലാം പഴയ പോലെ തന്നെ.

ഇത് കോളജിലേക്കുള്ള ബസുകള്‍ വന്നു നില്‍ക്കുന്ന സ്ഥലം. മുമ്പ് സിറ്റി ബസുകള്‍ വന്നു നിന്നിരുന്നതും ഇവിടെ തന്നെ. ഇപ്പോള്‍ സിറ്റി ബസുകളൊന്നുമില്ലെന്ന് തോന്നുന്നു. ഈ മരങ്ങള്‍ക്ക് എത്ര കഥകളാണ് പറയാനുണ്ടാവുക ? അവസാനത്തെ ബസു വരുന്നതു വരെ കാത്തു നിന്ന സായാഹ്നങ്ങള്‍..

ചെറിയ മറ്റു തണല്‍ മരങ്ങള്‍. ഇടവേളകള്‍ ഉല്ലാസകരമാക്കിയിരുന്നതിവിടെ.. ചെറിയ ചാറ്റല്‍ മഴ വന്നാല്‍ ഇതിനടിയില്‍.. മഴമാറിയാല്‍ മരം പെയ്യും...

‘കാലാപാനി‘യിലേക്കുള്ള വഴി. വലത്തു കാണുന്നതാണ് ലബോറട്ടറി. അതിന്റെ സൈഡ് പിടിച്ച് പോയാല്‍ ശേഖരേട്ടന്റെ കാന്റീന്‍. വയലിലെ തണുത്ത കാറ്റേറ്റിരുന്ന് ചായയും പരിപ്പുവടയും കഴിക്കുന്നത് ഇപ്പോഴും നല്ല ഓര്‍മ്മ.

വെള്ളം നിറഞ്ഞുകിടക്കുന്ന പാടം. അപ്പുറത്ത് നെടുപുഴ ദേശം. ഇലക്ഷന്‍ കാലത്ത് കോളജില്‍ അടിയുണ്ടാക്കി (കൂടുതല്‍ ഇങ്ങോട്ട് കിട്ടിയിട്ടേ ഉള്ളൂ :) ) പോലീസ് വരുന്നതിനു മുമ്പ് സ്കൂട്ടാവുന്നത് ഈ വഴിയാണ്.

ചിത്രങ്ങളെടുത്ത് അയച്ചു തന്ന മുരളി സാറിനു ഹൃദയത്തിന്റെ ഭാഷയില്‍ നന്ദി.

കൊമാല

2007-06-05T23:23:00.000-07:00

വായനക്കാരനുമായി നല്ല ഒരു സംവേദനത്തിനു പുതിയ കൃതികള്‍ ഒരുമ്പെടുന്നില്ല എന്നതുകൊണ്ടു മാത്രം പുതിയ കഥകളോടും കഥയെഴുതുന്നവരോടും പുറന്തിരിഞ്ഞു നില്‍ക്കുന്ന ഒരു മനോഭാവമാണ് എനിക്കുണ്ടായിരുന്നത്. ഈയിടെ ഒരു സുഹൃത്തു മുഖേനയാണ് ‘കൊമാല’ എന്റെ മുന്നിലെത്തിയത്. ജനിച്ചുവളര്‍ന്ന ഭൂമിയും അതിലെ കൃഷിയിടങ്ങളും ചൂഷണം ചെയ്യപ്പെടുന്ന മദ്ധ്യപൂര്‍വ്വദേശത്തെ കുര്‍ദ്ദുകളുടെ സംഘടനയായ ‘കൊമാല‘യെ (Council on Rebirth of Kurdistan) മനസ്സില്‍ ധ്യാനിച്ചാണ് ഇതു വായിച്ചുതുടങ്ങിയത്.

ഏതൊരു രാജ്യത്തിന്റെയും സമ്പത് സമൃദ്ധിയുടെ അടിസ്ഥാനമാണ് കൃഷി. അടുത്ത കാലത്തായി കേരളത്തില്‍ ഉടലെടുത്ത ഒരു പ്രതിഭാസമാണ് കര്‍ഷക ആത്മഹത്യകള്‍. പൊതു സമൂഹം ഇതൊരു വലിയ വിഷയമായി എടുത്തുകണ്ടില്ല. ആത്മഹത്യകളുടെ പേരില്‍ വന്‍ പ്രക്ഷോഭങ്ങളൊന്നും നടന്നുമില്ല. ഒരു എഴുത്തുകാരനു സാമൂഹിക പ്രതിബദ്ധതയുണ്ടോയെന്ന് പലപ്പോഴും സംശയിച്ച സന്ദര്‍ഭങ്ങളായിരുന്നു അത്. ഇവിടെയാണ് ‘കൊമാല’ എന്ന കഥാസമാഹാരത്തിന്റെ പ്രസക്തി. അടുത്ത കാലത്ത് മലയാളത്തിലുണ്ടായ മികച്ച ഒരു കഥാസമാഹാരമായാണ് സന്തോഷ് ഏച്ചിക്കാനത്തിന്റെ ‘കൊമാല’ യെ എനിക്ക് കാണാനായത്. ‘കൊമാല’, ‘പന്തിഭോജനം’, ‘റോഡില്‍ പാലിക്കേണ്ട നിയമങ്ങള്‍’ തുടങ്ങി എട്ടു കഥകളുടെ സമാഹാരമാണിത്.

വ്യത്യസ്ഥങ്ങളായ പ്രമേയങ്ങള്‍ കൈകാര്യം ചെയ്യുന്നു എന്നതുതന്നെയാണ് ഈ കൃതിയുടെ സവിശേഷത. കേവലമായ സാങ്കേതികതയിലും പരീക്ഷണങ്ങളിലുമൊന്നും വീഴാതെ ഏകാത്മകമായ ചര്‍ച്ചകളുടെ ഒരു ലോകത്തെ തന്നെ ഈ കൃതി തുറന്നു വിടുന്നു. കേരളീയ നവോത്ഥാനത്തിന്റെ വികസന വഴികളും സമകാലിക ജീവിതാവസ്ഥകളും സസൂഷ്മം നിരീക്ഷിക്കുന്ന ഇതിലെ കഥകള്‍ വായനക്കാരന്റെ മുന്നിലേക്ക് ചര്‍ച്ചകള്‍ക്കായി ഒരു പുതിയ ലോകം തന്നെ സൃഷ്ടിക്കുന്നു.

കടബാധ്യതമൂലം ആത്മഹത്യക്കൊരുങ്ങുന്ന ഒരു കുടുംബത്തിന്റെ കഥയാണ് കൊമാല. ജാമ്യം നിന്നു എന്ന ഒറ്റക്കാരണത്തിന്റെ പേരിലാണ് കുണ്ടൂര്‍ വിശ്വന് ഈ അവസ്ഥ വരുന്നത്. മനുഷ്യനും മനുഷ്യനും തമ്മിലുള്ള സാമ്പത്തിക വിനിമയങ്ങളില്‍ നഷ്ടബോധത്തിന്റെ പ്രതിനിധിയാണ് കുണ്ടൂര്‍ വിശ്വന്‍. കടക്കാര്‍ മാത്രമായ ഈ ലോകത്ത് കടത്തെ ഉന്മൂലനം ചെയ്യാനുള്ള പ്രതിവിധികള്‍ ആര്‍ക്കും കണ്ടെത്താനാവുന്നില്ല. കേവലം സാങ്കേതികം മാത്രമായ കടം വീട്ടാന്‍ മറ്റൊരു നിര്‍വാഹവുമില്ലാതെയാണ് വിശ്വന്റെ മുന്നില്‍ മരണം ഒരു ചൂണ്ടു പലകയായെത്തുന്നത്. എല്ലാം തകര്‍ന്ന ‘കൊമാല‘യില്‍ വിശ്വന്റെ മരണം ലോകത്തിനു ഒരു വിഷയമേ ആവുന്നില്ല.

ദാമ്പത്യ ബന്ധത്തിലെ പൊരുത്തക്കേടുകളിലൂടെയുള്ള ഒരു യാത്രയാണ് ‘റോഡില്‍ പാലിക്കേണ്ട നിയമങ്ങള്‍‘ എന്ന കഥ. ഫിലോസഫി പഠിപ്പിക്കുന്ന രവിചന്ദ്രന്‍ എന്ന പ്രൊഫസറെ ജീവിതത്തിന്റെ ഫിലോസഫിപഠിപ്പിക്കേണ്ടി വരുന്നത് രാമകൃഷ്ണന്‍ എന്ന സാധാരണക്കാരനായ ഒരു ഡ്രൈവറാണ്. ജീവിതത്തെ അവനവനു വേണ്ട രീതിയില്‍ രൂപപ്പെടുത്തിയെടുക്കേണ്ട വഴികളിലൂടെ അവനവനനുവദിച്ചിട്ടുള്ള വഴികളിലൂടെ ഓടിച്ചു കൊണ്ടു പോകേണ്ടതെങ്ങനെയെന്ന് രാമകൃഷ്ണന്‍ രവിചന്ദ്രനെന്ന പ്രൊഫസറെ പഠിപ്പിക്കേണ്ടി വരുന്നു.

ഈ സമാഹാരത്തിലെ ശ്രദ്ധേയമായ ഒരു കഥയാണ് ‘ പന്തി ഭോജനം’. സംഭാഷണങ്ങളിലൂടെ വികസിക്കുന്ന ഒരു ആഖ്യാന ശൈലിയാണിതില്‍ അവലംബിച്ചിരിക്കുന്നത്. ജാതീയ ഘടനകളുടെ വിനിമയത്തിന്റെ സംസ്കാര സൂചനകള്‍ നവോത്ഥാനശേഷമുള്ള കേരളീയ സമൂഹത്തെ എങ്ങനെയൊക്കെ ഗ്രസിക്കുന്നുവെന്നതിന്റെ ഒരു ചൂണ്ടുവിരലാണീ കഥ.

കഥയില്‍ നിന്നും..

രണ്ടു മതങ്ങള്‍ തമ്മിലുള്ള സാമൂഹികമായ അകലം നികത്തുന്നതില്‍ പന്നിമാംസത്തിന്റെ സ്വാധീനത്തെ പറ്റി കോതമംഗലം ഡിഷ് വിളമ്പാറുള്ള ദിവസങ്ങളിലൊക്കെ പറയാറുള്ള ചില അഭിപ്രായങ്ങള്‍ സംഗീ‍ത ഇന്നും ആവര്‍ത്തിച്ചു.
‘’സംഗീ.. ബി. സീരിയസ്.." സൂസന്‍ തന്റെ രണ്ടു വര്‍ഷത്തെ സീനിയോറിട്ടിയെ കണ്ണടയുടെ കൂടെ മൂക്കിന്‍ തുമ്പില്‍ നിന്നും മുകളിലേക്കുയര്‍ത്തി സംഗീതയ്ക്കരികിലേക്ക് ഒന്നുകൂടി നീങ്ങിയിരുന്നു.
....
രമ്യപോയതും സംഗീത കണ്ണാടിയില്‍ നോക്കി മുഖം തുടച്ചു. പിന്നെ ടാപ്പ് തുറന്ന് ചത്തുപൊന്തിയ ചേറ്റുമീനുകളെ വാഷ് ബേസിനില്‍ നിന്നും ഒഴുക്കി കളയുവാന്‍ തുടങ്ങി. ....

ഒരു പരാതിയെഴുത്തുകാരന്റെ മാനസിക സംഘര്‍ഷങ്ങള്‍ , ചരമക്കോളം, തേവി നനച്ചത്, ബേബീസ് ബ്രെത്ത് ... തുടങ്ങിയവയാണ് ഈ സമാഹാരത്തിലെ മറ്റു കഥകള്‍. തീര്‍പ്പുണ്ടാക്കാതെ കുമിഞ്ഞുകൂടുന്ന സമകാലിക പ്രശ്നങ്ങളിലേക്കുള്ള ഒരു നേര്‍ രേഖയായി ഈ കഥാസമാഹാ‍രം വായനക്കാരനു മുന്നിലെത്തുന്നു. സംവേദനക്ഷമതയുള്ള ഒരു കഥ വായിച്ച സുഖം എനിക്കും.

കൊമാല
സന്തോഷ് ഏച്ചിക്കാനം
കൈരളി ബുക്സ് കണ്ണൂര്‍
വില 45 രൂപ

ആളൂര്‍ ഷാപ്പ്

2007-06-02T04:02:00.000-07:00

പാതിരാവില്‍,പെരുമഴയത്ത്‌
ഒഴുകിവന്ന മരത്തടിയില്‍
പിടിച്ചുനീന്തി ഞാന്‍ അക്കരെയെത്തി.
നീ എനിക്ക്‌ അന്നവും കമ്പിളിയും തന്നു
കാന്താരിയും കള്ളും തന്നു....

തൃശ്ശൂര്‍ - കുന്ദംകുളം റൂട്ടില്‍ കേച്ചേരിയില്‍ നിന്നും രണ്ടുകിലോമീറ്റര്‍ പടിഞ്ഞാറ് മാറി കേച്ചേരിപ്പുഴയുടെ തീരത്ത്, ആളൂര് പാലത്തിന്റെ വലതുവശത്തായി കുടിയിരിത്തിയിരിക്കുന്ന കള്ളുഷാപ്പില്‍ ത്രിസന്ധ്യക്ക് കേള്‍ക്കുന്ന ചുള്ളിക്കാടിന്റെ കവിതാഭേദങ്ങളിലൊന്നാണിത്.

കേച്ചേരി അങ്ങാടിയില്‍ ചാക്കിറക്കുന്ന രാമേട്ടന്‍ ചുള്ളിക്കാടിന്റെ കവിതയെ ചുള്ളിക്കൊമ്പുകളാക്കി ഇങ്ങനെ കയ്യില്‍ വെച്ചുതരും. അതിനിത്തിരി ചെലവുണ്ട്. രണ്ടു കുടുക്ക കള്ളെങ്കിലും രാമേട്ടന്റെ കുഞ്ഞു ആമാശയഭിത്തിയെ പ്രകമ്പനം കൊള്ളിക്കണമെന്നുമാത്രം.

ഒരു വേള രാമേട്ടനീ കവിതയെല്ലാം എവിടെനിന്നു കിട്ടിയെന്ന് അടക്കാനാവാത്ത ജിഞ്ജാസകൊണ്ട് ചോദിച്ചുപോയി..

‘മ്മടെ നവാബ് ഒരു പ്രാവശ്യം മറന്നു വെച്ച പൊസ്തകം.. ആപ്പീസിന്റെ എറേത്ത് ഞാന്‍ കേറ്റി വെച്ചു. പണീല്ലാണ്ടാവുമ്പോ ഇരുന്നു വായിക്കും..അദന്നെ..’
അതുപോലെ പല ആസ്ഥാന ഗായകരേയും കവികളേയും കൊണ്ട് മുഖരിതമാണ് അശോകേട്ടന്റെ ഷാപ്പ്.

വക്കുപൊട്ടിയ കുടുക്കയിലെ കള്ളിനിത്ര സ്വാദുണ്ടോ ?

അപ്പോയിന്റ്മെന്റ് എടുത്ത് ചെന്നാല്‍ നല്ല കള്ളുകിട്ടും. അല്ലെങ്കില്‍ ..സ്വാഹ.

പ്രധാന സേവ ഹനുമാന്‍. ഹനുമാനു സമര്‍പ്പിച്ചിട്ടെ അശോകേട്ടന്‍ സ്റ്റൌവ് കത്തിക്കൂ.

മുതിര ഉപ്പേരിയും താറാവുകറിയും അശോകേട്ടന്റെ സ്പെഷ്യല്‍ പാചകവിധി.

കള്ളും കുടിച്ചിരിക്കുമ്പോ ഇങ്ങനെ ഒരു കുളിസീന്‍ ...

രാമേട്ടന്റെ പടമെടുക്കാന്‍ ഒരുങ്ങിയതാണ്. ‘ഡാ ചെക്കാ നീ ഈ കാമറ്യാട്ട് ഇവിടുന്ന് എറങ്ങണതൊന്ന് കാണണം.. ‘ ആ സ്നേഹത്തിനു മുന്‍പില്‍ പകച്ചു നിന്നുപോയി.

കോഴിക്കറിയും പത്തിരിയും

2007-05-09T04:59:00.000-07:00

കഴിഞ്ഞ തവണ നാട്ടില്‍ പോയപ്പോള്‍ മറിയുമ്മ താത്തയുടെ സ്നേഹസമ്മാനം.

പത്തിരി ഉണ്ടാക്കേണ്ട വിധം ഇവിടെ വല്യമ്മായി വിവരിച്ചിട്ടുണ്ട്.

മാപ്രാണം ഷാപ്പും ചാത്തനും.

2007-04-16T06:10:00.000-07:00

അല്ലെങ്കിലും ഇരിങ്ങാലക്കുട എനിക്കത്ര പഥ്യമുള്ള സ്ഥലമല്ല. ഡോണ്‍ബോസ്കോയുടെ അടുത്ത പ്രദേശങ്ങളില്‍ താമസിക്കുന്ന ചിലരോടെങ്കിലും പലപ്പോഴും അത് പ്രകടിപ്പിക്കേണ്ടി വന്നിട്ടുമുണ്ട്.. അങ്ങനെയുള്ളവരുടെ കൂട്ടത്തില്‍ വലിയ വീട്ടില്‍ അന്ത്രുവോ കുണ്ടുപറമ്പില്‍ ഉലഹന്നാനോ ആലുമ്മൂട്ടിലെ വിനയനോ ഉള്‍പ്പെട്ടത് തികച്ചും യാദൃശ്ചികം മാത്രം.

കൊല്ലാട്ടിക്കാരുടെ പറമ്പിനടുത്തുള്ള രാമേട്ടന്റെ ചായപ്പീടികയിലെ വടയുടെ എണ്ണം അന്ത്രുവിന്റെ വരവു നീളുന്തോറും കുറഞ്ഞു തുടങ്ങിയിരുന്നു. കാലത്ത് തന്നെ അന്ത്രുവുമായി ഒരു അത്യാവശ്യകാര്യം സാധിക്കാന്‍ എത്തിയതാണ് ഞാനും ബിജുക്കുട്ടനും. പെരിങ്ങോട്ടുകരയില്‍ നിന്നും പെട്രോളടിക്കുമ്പോഴാണ് ബിജുക്കുട്ടന്‍ ചാത്തനെ ദര്‍ശിക്കാത്തതിലുള്ള നീരസം പ്രകടിപ്പിച്ചത്. അപ്പോള്‍ തന്നെ അവന്‍ പറഞ്ഞു ഇന്നത്തെ പരിപാടികളെല്ലാം കുഴഞ്ഞുമറിയുമെന്നു. അല്ലെങ്കില്‍ ഈ അന്ത്രുവിനെയും നോക്കി കാലത്ത് പത്തരമുതല്‍ ഇങ്ങനെ ഇരിക്കേണ്ടി വരുമോ . മൊബൈലിനു റേഞ്ചില്ലാത്ത ഏതോ സ്ഥലത്ത് കുരുങ്ങിക്കിടക്കുകയാവും അന്ത്രു. പന്ത്രണ്ടുമണിയായിട്ടും അന്ത്രുവിന്റെ പൊടിപോലുമില്ല കണ്ടുപിടിക്കാന്‍. അപ്പോഴാണ് ബിജുക്കുട്ടനു ഐഡിയ മുളച്ചത്. മാപ്രാണത്തെ ലാല്‍ ആശുപത്രിയുടെ അടുത്തുള്ള ഒരു കല്യാണമണ്ഡപത്തിന്റെ ഓഫീസില്‍ ചിലപ്പോള്‍ അന്ത്രു ചെന്നിരിക്കാറുണ്ടെന്ന്. പിന്നെ വേറൊന്നും നോക്കാതെ മാപ്രാണത്തേക്ക് വിട്ടു വണ്ടി.

മാപ്രാണത്തെത്തി പ്രസ്തുത സ്ഥലങ്ങളില്‍ അന്വേഷിച്ചപ്പോഴാണ് അന്ത്രുവിനെ അവര്‍ അറിയുകപോലുമില്ലെന്ന് മനസ്സിലായത്. അപ്പോള്‍ തന്നെ ബിജുക്കുട്ടന് മോന്തക്കിട്ട് ഒന്ന് പൊട്ടിക്കാന്‍ തോന്നിയതാണ്. അവന്‍ പഴയ ബിജുക്കുട്ടനല്ലാത്തതുകൊണ്ടും ഇന്ത്യന്‍ പാസ്പോര്‍ട്ട് എടുത്തിട്ടില്ലാത്തതുകൊണ്ടും ഞാന്‍ രോഷം കടിച്ചമര്‍ത്തി ആക്സലറേറ്ററില്‍ കാലമര്‍ത്തി.

മാപ്രാണം സെന്ററിനു തൊട്ടുമുന്‍പുള്ള ഒഴിഞ്ഞ പ്രദേശത്തെത്തിയപ്പോള്‍ ബിജുക്കുട്ടന്‍ വണ്ടി നിര്‍ത്താന്‍ പറഞ്ഞു.
‘എന്തിനാണ്ടാ ഇബടെ നിര്‍ത്തണേ..’
‘മനുഷ്യനു മൂത്രമൊഴിക്കാന്‍ മുട്ടിയിട്ട് നേരം കൊറെയായി.. ഇനി ഇതു കഴിഞ്ഞിട്ട് ബാക്കി കാര്യം..’
വെറുതെയല്ല.. ഞാനവിടെ ടെന്‍ഷടിച്ചിരിക്കുന്ന സമയം മുഴുവന്‍ അടുത്തുള്ള പെട്ടിക്കടകളിലെ സെവന്‍ അപ്പിന്റെയും പെപ്സിയുടെയും എണ്ണമെടുക്കുകയായിരുന്നു ബിജുക്കുട്ടന്‍. കാലത്ത് ചെറിയമ്മയുണ്ടാക്കിയ കഞ്ഞിയും പയറും പ്ലേറ്റു വെടിപ്പാക്കി കയറ്റിയിട്ടാണിവിനങ്ങനെ.
ഒന്നാം ക്ലാസില്‍ പോയി തിരിച്ച് കാറിലേക്ക് കയറുമ്പോഴാണ് ബിജുക്കുട്ടന്‍ ‘യുറേക്കാ..’ എന്ന ടോണില്‍ ഇങ്ങനെ മൊഴിഞ്ഞത്.
‘ഇതല്ലേ മാപ്രാണം ഷാപ്പ്...’ എനിക്കും അപ്പോഴാണത് ശ്രദ്ധയില് പെട്ടത്.

അങ്ങനെയാണ് പ്രശസ്തമായ ജോയിച്ചേട്ടന്റെ മാപ്രാണം ഷാപ്പില്‍ വീണ്ടും കയറുന്നത്. മാപ്രാണം ഷാപ്പിലെ കറികള്‍ പ്രശസ്തമാണെന്നെ ബ്ലോഗ്ഗില്‍ ചിലരുടെ പോസ്റ്റുകള്‍ കണ്ടതില്‍ പിന്നെ മാപ്രാണം ഷാപ്പിലൊന്ന് കയറണമെന്ന് അതിയായി ആഗ്രഹിച്ചിരുന്നു.

വിശാലമായ നടവഴിയിലൂടെ കയറി, ഒഴിഞ്ഞ ഒരു ബഞ്ചില്‍ ഇരുന്നു. ചുറ്റും നോക്കി. സ്ഥിരം കുറ്റികള്‍ സ്ഥലം വിട്ടെന്നു തോന്നുന്നു. ഒരു വശത്ത് കുറച്ച് കോളജ് പിള്ളേര്‍ ഇരുന്ന് മോന്തുന്നുണ്ട്. ഒരുത്തന്‍ സ്റ്റീയറിങ് വീല്‍ പിടിച്ച് തിരിക്കുന്നപോലെയാണ് കുപ്പിയെടുത്ത് തിരിക്കുന്നത്. ആരോടോ ഉള്ള വാശി തീര്‍ക്കുകയാവാം. ഒരു പക്ഷേ കുപ്പിയുടെ തലഭാഗം കണ്ടെത്താനുള്ള പ്രയത്നത്തിലുമാവാം. കറുത്ത കണ്ണട വെച്ച മറ്റൊരുത്തന്‍ സ്റ്റീല്‍ പിഞ്ഞാണം നക്കിത്തുടക്കുന്നു. പനമ്പിന്റെ മറയുടെ അപ്പുറത്തിരുന്ന് പ്രതിഷേധ സ്വരത്തില്‍ ഒരു നായ മുരളുന്നു. കോളജ് പിള്ളേര് കൂലങ്കലുഷിതമായി എന്താണ് ഡിസ്കസ് ചെയ്യുന്നതെന്നറിയാന്‍ ബിജുക്കുട്ടന്‍ കാതോര്‍ത്തിരിക്കുന്നു. ഇടക്കിടെ എന്നെ നോക്കുന്നുണ്ട്.
‘നീയ്യെന്തിനാണ്ടാ അവരെ ശ്രദ്ധിക്കുന്നത്.. അവര് വല്ല അന്താരാഷ്ട്ര പ്രശ്നങ്ങളും ചര്‍ച്ച ചെയ്യുകയായിരിക്കും..’
‘ ഏയ് .. അവരിവിടത്തെ കടല ഫ്രൈ എങ്ങന്യാണെന്നതിന്റെ ഡിസ്കഷനിലാണ്..’
ആ ശുഭ മുഹൂര്‍ത്തത്തിലാണ് സപ്ലയര്‍ വരുന്നത്.
‘കടലക്കറിയാല്ലാതെ കഴിക്കാനെന്തുണ്ട് ? ‘ അയാള്‍ വന്നു നില്‍ക്കുന്നതിനു മുന്‍പു തന്നെ ബിജുക്കുട്ടന്‍ ചോദിച്ചു.
‘ബീഫ് ഫ്രൈ, കാട ഫ്രൈ......’ നീളുന്ന പട്ടിക ഒറ്റ ശ്വാസത്തില്‍ അയാള്‍ നീട്ടിവിളമ്പി.

രണ്ടു കുപ്പിയും ഒരു ലിവര്‍ ഫ്രൈയും പറഞ്ഞ് ബിജുക്കുട്ടന്‍ ഒരു സിസറിനു തീ കൊളുത്തി.
‘ഇവിടത്തെ കറികളൊക്കെ കിണ്ണങ്കാച്യാന്നാ പറയണത്..’
‘കാണാന്‍ പോണ പൂരം പറഞ്ഞറിയിക്കണോ ..’

കോളജ് പിള്ളേരിലെ കറുത്ത കണ്ണട വെച്ചവന്‍ ഞങ്ങളെ നോക്കി ഒന്ന് ചിരിച്ചു. അവന് നല്ല ഉറക്കം വരുന്നുണ്ടെന്ന് തോന്നി. കണ്ണുകള്‍ ചുവന്നിരിക്കുന്നു. പാത്രങ്ങളും കുപ്പികളും കാലി.

കുറച്ച് കഴിഞ്ഞപ്പോള്‍ സപ്ലയര്‍ കുപ്പികളും ലിവര്‍ ഫ്രൈ എന്ന സാധനവും മേശയില്‍ കൊണ്ടുവന്നു വെച്ചു. കുപ്പിയില്‍ നിന്നും ഒരു ഗ്ലാസില്‍ പകര്‍ന്ന് ബിജുക്കുട്ടന്‍ കണ്ണടച്ച് ഒരു നീക്കു നീക്കി. പിന്നെ അച്ചാറിന്റെ പിഞ്ഞാണം വായിലേക്ക് പകര്‍ന്നു. ‘‘ശ് ശൂ ‘ എന്ന ശബ്ദത്തോടെ പിഞ്ഞാണം താഴെ വെച്ചു.
‘എങ്ങിനീണ്ട്രാ സാധനം ? ‘
‘സാധനം ചാത്തനല്ലേ.. ചാത്തന്‍..’
‘എന്ത് ?’
‘ അച്ചാറ്..’
‘അച്ചാറല്ലടാ കള്ള് എങ്ങനെയുണ്ട് ? ‘
‘കുഴപ്പമില്ല.. ‘ ഇവനോട് ചോദിച്ചിട്ടൊരു കാര്യവുമില്ലെന്ന് മനസ്സിലായി.
പിന്നെ,അടുത്ത ഓര്‍ഡറെടുക്കാന്‍ വന്നപ്പോള്‍ ബിജുക്കൂട്ടന്‍ സപ്ലയറോട് ബില്ലെടുത്തോളാന്‍ പറഞ്ഞു. ബില്ല് സെറ്റില്‍ ചെയ്റ്റു കഴിഞ്ഞപ്പോള്‍ ബിജുക്കുട്ടന്‍ സപ്ലയറെ വിളിച്ച് ഒരു ഉപദേശം കൊടുക്കാന്‍ മറന്നില്ല.
‘ഇനി മുതല് കഞ്ഞി വെള്ളത്തില് കുറച്ച് ചോറിട്ടിട്ട് കൊടുത്താല്‍ നന്നായിരിക്കും ട്ടാ..’ സപ്ലയര്‍ ഒരു വളിച്ച ചിരി ചിരിച്ചു.
പുറത്തിറങ്ങിയപ്പോള്‍ എനിക്കാകെ ഒരു സംശയം
‘അല്ല ബിജുക്കുട്ടാ, ആ സപ്ലയര്‍ക്ക് നമ്മളെ ഇത്ര കൃത്യമായി മനസ്സിലാക്കാന്‍ പറ്റിയതെങ്ങനെയാണാവോ ..’
പിന്നെ,അടുത്ത ബാര്‍ കണ്ടുപിടിക്കുന്നതുവരെ ബിജുക്കുട്ടന്‍ നിര്‍ത്താതെ സിഗരറ്റു വലിച്ചുകൊണ്ടിരുന്നു. ബാറിലിരിക്കുമ്പോഴാണ് മേലില്‍ മാപ്രാണം ഷാപ്പില്‍ കയറില്ലെന്ന് ഞങ്ങള്‍ ദൃഢപ്രതിജ്ഞയെടുത്തതും തിരിച്ച് പോകുന്ന വഴിയില്‍ ചാത്തനെ ദര്‍ശിച്ചേപോകുവെന്ന് തീരുമാനിച്ചതും.

വാല്‍ക്കഷണം : മാപ്രാണം ഷാപ്പിനെക്കുറിച്ച് പറഞ്ഞ് പറഞ്ഞ് ആരുടെയെങ്കിലും വികാരങ്ങള്‍ വൃണപ്പെട്ടിട്ടുണ്ടെങ്കില്‍ അവര്‍ക്ക് ഡെറ്റോള്‍ സോപ്പ് സപ്ലൈകോ സ്റ്റോറുകളില്‍ നിന്നും ഫ്രീയായി ലഭിക്കുന്നതാണ്.

ആനകള്‍ക്ക് സംഭവിക്കുന്നത്

2007-04-01T04:40:00.000-07:00

‘ആനയും കടലും’ കണ്ടാല്‍ മതിവരില്ലെന്നാണ് മലയാളിയുടെ മനസ്സിലമര്‍ന്നിരിക്കുന്ന ഒരു വാമൊഴി. ലക്ഷണമൊത്ത ഒരാനയെ കണ്ടാല്‍ ആരും ഒന്ന് നോക്കി നിന്നുപോകും. ലക്ഷണമൊത്ത ആനയെ കിട്ടാന്‍ ആനപ്രേമികളായ ഉത്സവക്കമ്മറ്റിക്കാര്‍ പലരും ലക്ഷങ്ങളാണ് ഏക്കക്കൂലി തന്നെ കൊടുക്കുന്നത്. ഗുരുവായൂര്‍ പദ്മനാഭനെന്ന ആനയ്ക്ക് ശരാശരി ഒരു എഴുന്നെള്ളിപ്പിനു നാല്‍പ്പതിനായിരമാണ് ലഭിക്കുന്നതെന്നറിയുമ്പോള്‍ ആനയോടുള്ള മലയളിയുടെ ആരാധന എത്രമാത്രമാണെന്ന് മനസ്സിലാവും.

മാധ്യമങ്ങളില്‍ ഇന്ന് നിറഞ്ഞു നില്‍ക്കുന്നതും ആന തന്നെ. പക്ഷേ ഇന്ന് മാധ്യമ ശ്രദ്ധ പിടിച്ചു പറ്റിക്കൊണ്ടിരിക്കുന്ന ആനക്കാഴ്ചകള്‍ മിക്കതും ആനയെ ദ്രോഹിക്കുന്ന കഥകളും കൂടുതല്‍ പണിയെടുപ്പിച്ച് ബുദ്ധിമുട്ടിക്കുന്ന കഥകളും പരിചരണം കിട്ടാതെ ചെരിയുന്ന ആനകളുടെ കഥകളും
മാത്രമാണ്.

ആനവംശം

കേരളത്തില്‍ ഇപ്പോള്‍ ആറായിരത്തില്‍ കൂടുതല്‍ ആനകളുണ്ട്. അതില്‍ നാട്ടാനകള്‍ ആയിരത്തോളവും. അതില്‍ തന്നെ ലക്ഷണമൊത്ത ആനകള്‍ നൂറില്‍ താ‍ഴെ മാത്രമാണ്. കൊമ്പിനുവേണ്ടിയുള്ള ആനവേട്ടയും കാടുവെട്ടിത്തെളിക്കലും ആനകളുടെ എണ്ണത്തില്‍ കാര്യമായ മാറ്റങ്ങളുണ്ടാക്കിയിട്ടുണ്ട്. നാട്ടാനകളുടെ ക്രയവിക്രയം 1972 ലെ നിയമമനുസരിച്ച് നിരോധിച്ചതിനാല്‍ പുതിയ ലക്ഷണമൊത്ത ആനകളെ മലയാളിക്ക് കിട്ടുന്നതും അപൂര്‍വ്വം.

സാമ്പത്തികം
ശരാശരി ഒരാനക്ക് ഒരു മാസം പതിനയ്യായിരം മുതല്‍ ഇരുപതിനായിരം വരെ ചെലവുണ്ട്. പാപ്പാന്‍മാരുടെ ശംബളം വേറെ. ഒരു ഉത്സവ സീസണില്‍ , ജനുവരിമുതല്‍ മെയ് വരെയുള്ള കാലത്താണ് ഉടമയ്ക്ക് ആനയുടെ ചെലവുകള്‍ തിരിച്ചു പിടിക്കാനാവുന്നത്. ഒരു ഉടമയ്ക്കും തങ്ങളിറക്കിയ മൂലധനം തിരിച്ചുപിടിക്കാന്‍ സാധിക്കാറില്ലെന്നാണ് അനുഭവസ്ഥര്‍ പറയുന്നത്.

മദപ്പാട്
ആരോഗ്യമുള്ള ആണാനകള്‍ക്കും മോഴയാനകള്‍ക്കും വര്‍ഷത്തില്‍ ഒന്നുമുതല്‍ മൂന്നുവരെ മാസം നീണ്ടുനില്‍ക്കുന്ന ഒന്നാണ് മദപ്പാട്. മദപ്പാട് കാലത്ത് ആനയെ കൂച്ചുവിലങ്ങിടുകയാണ് സാധാരണ ചെയ്യുന്നത്. വളരെ സൌമ്യനായ ആന പോലും മദപ്പാട് കാലത്ത് അക്രമോത്സുകനായിരിക്കും.

എന്തുകൊണ്ട് ഉത്സവ സീസണ്‍ കാലത്ത് ആനകള്‍ ഇടയുന്നു ?

പല പാപ്പാന്മാരും കൂടുമാറുന്നത് ഇക്കാലത്താണ്. പുതിയ പാപ്പാനുമായി ഇണങ്ങാ‍ന്‍ സാധാരണ ഒരാനക്ക് ഒന്നുമുതല്‍ രണ്ടു മാസം വരെ സമയം വേണ്ടിവരും. ഇന്നുവരെ ഒപ്പമുണ്ടായിരുന്നവരെ നാളെ കാണാതായാല്‍ മനുഷ്യനെപ്പോലെ തന്നെ മറ്റു ജീവികളും ഒന്ന് പ്രകോപിക്കുകയോ വിഷമം പ്രകടിപ്പിക്കുകയോ സ്വാഭാവികമാണ്. ഉത്സവസീസണിലെ ആനയിടച്ചിലിന് ഒരു കാരണം ഈ കൂടുമാറ്റമാണ്.

പാപ്പാന്റെ ഭാഷ, ആനകള്‍ ഇടയുന്നതിലെ പ്രധാനപ്പെട്ട കാരണങ്ങളിലൊന്നാണ്. നല്ല ഒരു പാപ്പാന് തന്റെ ആനയെ ശരിക്കും അറിയാം. അവന്റെ ഇഷ്ടാനിഷ്ടങ്ങള്‍ അറിയാത്ത പാപ്പാന്മാരാണ്‍ ആനകളെ അസ്വസ്ഥരാക്കുന്നത്. മാത്രവുമല്ല, ആന ഒരു വന്യജീവിയാണെന്ന ബോധം മിക്ക പാപ്പാന്മാരും തിരക്കിനിടയില്‍ മറന്നുപോകുന്നു.

എത്ര വലിയ ആനയാണെങ്കിലും ഒരു ബലഹീനത അതിനുണ്ടാവും. നായ, പോത്ത്, ആട് എന്നിവ മുന്നിലൂടെ വന്നാല്‍ പിന്തിരിഞ്ഞോടുന്ന ആനകളുണ്ട്. ഒരു വെടി പൊട്ടുന്നതു കേട്ടാല്‍ വിറളിപിടിക്കുന്ന ആനകളുമുണ്ട്. നടന്നു പോകുമ്പോള്‍ രണ്ടാം പാപ്പാന്‍ തന്റെ മുന്‍ കാലുകളേക്കാള്‍ മുന്നില്‍ നടന്നാ‍ല്‍ വിറളിപിടിക്കുന്ന ആനകളുമുണ്ട്. കുളിക്കുന്ന സമയത്ത് ചെവിയില്‍ പിടിച്ചാല്‍ വിറളിപിടിക്കുന്നവയുമുണ്ട്. അങ്ങനെ പല തരം വ്യത്യസ്ഥ സ്വഭാവ വൈചിത്ര്യങ്ങള്‍ ആനയ്ക്കുണ്ട്. അത് പൂര്‍ണ്ണാമായി മനസ്സിലാക്കുന്നവനാണ് നല്ല പാപ്പാന്‍.

വലിയ ശരീരമുള്ള എല്ലാ ജീവികള്‍ക്കും അവയുടെ ശരീരത്തിന്റെ സംതുലനം നിലനിര്‍ത്താന്‍ വെള്ളം അത്യാവശ്യമാണ്. (ഉദാ: ഹിപ്പൊപ്പോട്ടാമസ്,..) ദിവസത്തില്‍ നിശ്ചിത സമയം അവയ്ക്ക് വെള്ളത്തില്‍ കിടന്നാലേ അവയുടെ ശരീരത്തിലെ ഊഷ്മാവ് പരിമിതപ്പെടുത്തുവാനാവൂ. മിക്ക ആനകളുടെയും മദപ്പാട് സമയം ഏപ്രില്‍ മുതല്‍ ആരംഭിക്കും. മദപ്പാട് നീട്ടിക്കിട്ടാന്‍ പാപ്പാന്മാരും ആനയുടമകളും അവയ്ക്ക് കൊടുക്കുന്ന വെള്ളത്തിന്റെ അളവു കുറയ്ക്കുന്നു. ഈ പ്രക്രിയ എല്ലായ്പ്പോഴും ആനകളില്‍ വിജയിക്കണമെന്നില്ല. ചിലപ്പോള്‍ അത് ആനകളില്‍ പ്രതീക്ഷിക്കാത്ത പല മാറ്റങ്ങള്‍ക്കും ഇടയാക്കും.

മുന്‍പൊക്കെ ആനകളെ കിലോമീറ്ററുകളോളം നടത്തിയാണ് ഉത്സവത്തിനു കൊണ്ടുപോയിരുന്നത്. ഇന്ന് അതല്ല സ്ഥിതി. മിക്കവാറും ആനകള്‍ ലോറിയിലാണ് യാത്ര. നാം വിചാരിക്കുന്ന അത്ര സുഖകരമല്ല ആനകള്‍ക്ക് ഈ ലോറി യാത്ര. പ്രത്യേകിച്ചും കേരളത്തിലെ റോഡുകളില്‍.

തൃശ്ശൂര്‍ ജില്ലയിലെ മുതുവറയടുത്ത് ചൂരക്കാട്ടുകര പൂരത്തിനു അഞ്ചു വര്‍ഷം മുന്‍പ് എഴുന്നെള്ളിച്ചിരുന്നത് മൂന്നാനപ്പുറത്തായിരുന്നു. ഇത്തവണ പാമ്പാടി രാജനടക്കം പതിനഞ്ചാനകളാണ് അണിനിരന്നത്. ഇതുതന്നെയാണ് ഇന്ന് കേരളത്തിലെ മിക്ക ഉത്സവങ്ങളുടേയും അവസ്ഥ. ഗുരുവായൂര്‍ പദ്മനാഭനെ ഒരു ദിവസം മൂന്നുപൂരങ്ങളില്‍ എഴുന്നെള്ളിച്ചുവെന്ന് കേള്‍ക്കുന്നത് ഇന്ന് ഒട്ടും അതിശയോക്തിയല്ല. ലക്ഷണമൊത്ത ആനകള്‍ ഇന്ന് വിശ്രമമില്ലാതെ കേരളത്തിലെ ക്ഷേത്രങ്ങളില്‍ പറന്നു നടന്ന് ഉത്സവം കൊഴുപ്പിക്കേണ്ട അവസ്ഥയാണ്. ഇതിനൊരു അറുതി വന്നേ മതിയാവു. ഉത്സവങ്ങളിലെ ആനസാന്നിദ്ധ്യം കുറക്കേണ്ടത് അത്യന്താപേക്ഷിതമാണ്.

എല്ലാ ആനപ്രേമികളും ഉടമകളെ പഴിപറയുന്നതിനുമുമ്പ് മേല്‍പ്പറഞ്ഞ വസ്തുതകള്‍ കൂടി കണക്കിലെടുക്കുക. ഒരു ആനയുടമയ്ക്കും സ്വന്തം ആനയെ ഉപദ്രവിക്കുന്നത് ഇഷ്ടമുള്ള കാര്യമല്ല.
സാഹചര്യങ്ങളുടെ സമ്മര്‍ദ്ദമാണ് പല ആനകളുടെയും ദാരുണമായ് അന്ത്യത്തിലേക്ക് വഴിവെക്കുന്നത്.

വിവരങ്ങള്‍ക്ക് കടപ്പാട് :
1.ഡേവിസ് ചിറ്റിലപ്പിള്ളി ( ആന ഡേവീസേട്ടന്‍ - തൃശ്ശൂരിലെ ആനകളുടെ ഒരു എന്‍സൈക്ലോപ്പീഡിയ. )
2.ചിറക്കല്‍ മധു. ( ചിറക്കല്‍ മഹാദേവനെന്ന പേരുകേട്ട ആനയടക്കം മൂന്നാനകള്‍ സ്വന്തം)

ഡോ. ചുമ്മാര്‍ ചൂണ്ടല്‍

2007-03-27T00:31:00.000-07:00

കേരളത്തിലെ നാടന്‍ കലകളുടെ ആചാര്യനായിരുന്ന ഡോ. ചുമ്മാര്‍ ചൂണ്ടല്‍ ദിവംഗതനായിട്ട് ഇന്നേക്ക് പതിമൂന്നു വര്‍ഷമാവുന്നു.

കേരളത്തിലെ നാടന്‍ കലകളായ മാര്‍ഗ്ഗം കളിയുടേയും ചവിട്ടുനാടകത്തിന്റെയുമെല്ലാം ഉന്നമനത്തിനായി അദ്ദേഹം നടത്തിയ ശ്രമങ്ങള്‍ എടുത്തു പറയേണ്ടതാണ്. ഡോ. ചുമ്മാര്‍ എഴുതിയ പല ഗ്രന്ഥങ്ങളും കേരളീയ നാടന്‍ കലകളുടെ വേദപുസ്തകമായി ഇന്നും നിലകൊള്ളുന്നു. കര്‍മ്മഭൂമിയില്‍ തനതായ ശൈലിയും വ്യക്തിത്വവും വച്ചുപുലര്‍ത്തുന്ന ചുമ്മാര്‍ സാര്‍ ബുദ്ധിജീവികളുടെ വലയത്തില്‍ ഒരിക്കലും ഉള്‍പ്പെട്ടിരുന്നില്ല. നാടന്‍ കലകളുടെ ഈറ്റില്ലത്തില് ‍(അത് മിക്കവാറും ആദിവാസികളുടെ രംഗഭൂമിതന്നെയായിരിക്കും) ചെന്നുതന്നെ അവയെ തൊട്ടറിയാനുള്ള അദ്ദേഹത്തിന്റെ ശ്രമങ്ങള്‍ വളരെ ശ്ലാഘനീയമാണ്. വളരെ കഷ്ടപ്പെട്ട് ആ കലകള്‍ പഠിച്ചെടുത്ത് സ്വന്തമായി അദ്ദേഹം സദസ്സിനുമുന്‍പില്‍ അവതരിപ്പിക്കാറുണ്ടായിരുന്നു. മാര്‍ത്തോമാ ക്രിസ്ത്യാനികളെ പറ്റിയുള്ള പല ആധികാരിക ഗ്രന്ഥങ്ങളും അദ്ദേഹത്തിന്റെ സംഭാവനയായിട്ടുണ്ട്. തൃശ്ശൂര്‍ സെന്തോമസ് കോളജിലെ മലയാളവിഭാഗം തലവനായിരുന്നു അദ്ദേഹം.

എന്റെ ചൂചു സാര്‍
എന്നെ ഞാനാക്കുന്നതില്‍ വലിയൊരു പങ്കുവഹിച്ചത് ചുമ്മാര്‍ സാര്‍ എന്ന ആ വലിയ മനുഷ്യനായിരുന്നു. തൃശ്ശൂര്‍ സെന്തോമസിലെ പഠനകാലത്ത് മലയാള ഭാഷയും നാടന്‍ കലകളെ പരിചയിപ്പിക്കുന്നതിലും അദ്ദേഹത്തിന്റെ ക്ലാസുകള്‍ക്ക് കഴിഞ്ഞിരുന്നു. ഡിഗ്രി രണ്ടാം വര്‍ഷം ഇടശ്ശേരിയുടെ കറുത്ത ചെട്ടിച്ചികള്‍ എന്ന കവിതാ സമാഹാരം ക്ലാസ്സിലവതരിപ്പിച്ച രീതി ഇന്നും മനസ്സിലുണ്ട്. മാനേജുമെന്റുമായുള്ള വടം വലിയില്‍ ഞങ്ങള്‍ ചില വിദ്യാര്‍ത്ഥികളായിരുന്നു അദ്ദേഹത്തിന്റെ ശക്തി. ക്ലാസ്സില്‍ ശ്രദ്ധിക്കതെയിരുന്നാല്‍ ‘ കുട്ടന്മേന്നെ.. ‘ എന്ന ആ നീട്ടിയുള്ള വിളി, ‍ അട്ടപ്പാടിയിലെ കോരനുമായി സ്റ്റൈലില്‍ കാമ്പസിലെത്തുന്ന യെസ്ഡി മോട്ടോര്‍ സൈക്കിള്‍, പബ്ലിക് ലൈബ്രറിയിലെ ഒരു മൂലയിലിരുന്ന് പാതി കണ്ണടയില്‍ കൂടിയുള്ള ആ നോട്ടം.. എല്ലാം ഇന്നും മനസ്സില്‍ മായാതെ കിടക്കുന്നു.

അവഗണന
നാടന്‍ കലകളെ മലയാളി അവഗണിക്കുന്നതുപോലെ തന്നെ ഡോ. ചുമ്മാറിനെയും നാം അവഗണിച്ചു. അദ്ദേഹത്തിന്റെ സേവനങ്ങളെ നാം അംഗീകരിച്ചില്ലെങ്കിലും വിദേശങ്ങളില്‍ അദ്ദേഹത്തിന്റെ രചനകള്‍ക്ക് നല്ല അംഗീകാരം കിട്ടിയിരുന്നു. കേരളത്തിലെ പല ലൈബ്രറികളിലുമില്ലാത്ത അദ്ദേഹത്തിന്റെ ഗ്രന്ഥങ്ങള്‍ വാഷിങ്ടന്‍ യൂണിവേഴ്സിറ്റി ലൈബ്രറിയിലും മറ്റും ലഭ്യമാണ്.

നാടോടി
ചുമ്മാര്‍ സാറിന്റെ വിദ്യാര്‍ത്ഥികളും അഭുദയകാംക്ഷികളും നാടന്‍ കലാ സ്നേഹികളും ചേര്‍ന്ന് 1995 ലാണ് ഡോ. ചുമ്മാര്‍ സ്മാരക ഫോക് ലോര്‍ സെന്റര്‍ സ്ഥാപിക്കുന്നത്. അദ്ദേഹത്തിന്റെ ജന്മനാടായ തൃശ്ശൂരിലെ ചേറ്റുപുഴയിലാണ് അതിന്റെ ആസ്ഥാനം. ഫോക് ലോര്‍ സെന്റര്‍ അദ്ദേഹത്തെ കുറിച്ച് ഒരു ഡോക്യുമെന്ററി നിര്‍മ്മിച്ചിരുന്നു. ‘നാടോടി’ എന്ന പേരില്‍. സി.ജി. പ്രിന്‍സിന്റെ സംവിധാനത്തില്‍ രാജേഷ് ദാസ് സംഗീതം നല്‍കി രവി അന്തിക്കാട് മുഖ്യവേഷത്തിലഭിനയിക്കുന്ന ഒരു ചെറിയ ഡോക്യുമെന്ററിയാണ് ‘നാടോടി’.

ജീവചരിത്രവും അനുസ്മരണ ഗ്രന്ഥവും
ഡോ. ചുമ്മാര്‍ ചൂണ്ടലിന്റെ സമഗ്രമായ ജീവചരിത്രവും അനുസ്മരണ ഗ്രന്ഥവും ഡോ. ചുമ്മാര്‍ സ്മാരക ഫോക് ലോര്‍ സെന്റര്‍ തയ്യാറാക്കുന്നു. അതിലേക്കാവശ്യമായ വിവരങ്ങള്‍ ഇപ്പോള്‍ ശേഖരിച്ചുകൊണ്ടിരിക്കുന്നു. ഏപ്രില്‍ മുപ്പതിനുമുന്‍പായി താഴെക്കാണുന്ന വിലാസത്തില്‍ അയച്ചാല്‍ നന്നായിരിക്കും. ഫോട്ടോകളും കുറിപ്പുകളും കോപ്പിയെടുത്ത് തിരിച്ചയച്ചുകൊടുക്കുന്നതായിരിക്കും.
വിലാസം :
വിന്‍സന്റെ പുത്തൂര്‍
എഡിറ്റര്‍,
ഡോ. ചുമ്മാര്‍ അനുസ്മരണ ഗ്രന്ഥം,
പി.ഒ. ചേറ്റുപുഴ.
തൃശ്ശൂര്‍. കേരള.

അവകാശികളുടെ താഴ്വര.

2007-03-24T01:24:00.000-07:00

പച്ചക്കുതിരയില്‍ എഴുതിയ ഒരു കഥ. അവകാശികള്‍

അവരുടെ കര്‍മ്മ ഭൂമിയിലെ ചില ദൃശ്യങ്ങള്‍.

അശോകേട്ടന്റെ വള്ളം.

ഒരു വിഹഗ വീക്ഷണം..

അശോകേട്ടന്റെ ചെമ്മീന്‍ കെട്ട്..

നാലുകാലുള്ള ഷാപ്പ്

2007-03-05T02:48:00.000-08:00

അതെ, തൃശ്ശൂര്‍ ജില്ലയിലെ നെടുമ്പാള്‍ പഞ്ചായത്തിലെ ഈ ഷാപ്പ് വളരെ പ്രസിദ്ധമാണ്. പ്രാവിന്‍ കൂട് ഷാപ്പെന്നാണ് അറിയപ്പെടുന്നത്. കുറുമാലിപ്പുഴയുടെ തായ്‌വഴികള്‍ വന്നുചേരുന്ന നെല്‍പ്പാടങ്ങളിലാണ് ഈ ഷാപ്പ് കുടികൊള്ളുന്നത്.

പറപ്പൂക്കരയിലെ ഒരു സുഹ്രുത്തിനെ കാണാനായി മാപ്രാണം വഴി പോയപ്പോഴാണ് ഈ ഷാപ്പ് ഇങ്ങനെ നാലുകാലില്‍ നില്‍ക്കുന്നത് കണ്ടത്. നെല്‍പ്പാടങ്ങള്‍ അതിരു തിരിച്ച സുഖശീതളിമ.

വണ്ടി സൈഡാക്കി നേരെ കയറിച്ചെന്നു. അയ്യപ്പാസിന്റെ പരസ്യം പോലെ അകത്ത് അതിവിശാലമായ ഷോപ്പിങ് വിസ്മയം. പലതരം കറികള്‍.
നെല്‍പ്പാടത്തെ പല തരം കിളികളും തവളകളും മറ്റും വലിയ ഉരുളികളില്‍ നിരന്നിരിക്കുന്നു. നെടുമ്പാള്‍ സംയുകത സമിതിയെന്ന ഒരു ഗ്രൂപ്പാണ് ഷാപ്പ് നടത്തുന്നത്. നല്ല തിരക്കുള്ള ഷാപ്പാണ്. നെടുമ്പാളിലെയും സമീപ പ്രദേശങ്ങളായ പറപ്പൂക്കര, പുതുക്കാട്, മാപ്രാണം, കൊടകര നിവാസികളുടേയും ദാഹശമിനി. നല്ല തണുത്ത കാറ്റേറ്റ് കുടിയന്മാര്‍ ഷാപ്പിന്റെ പുറത്തേക്ക് തുറന്നിരിക്കുന്ന ബാല്‍ക്കണിയിലിരുന്ന് കള്ളുകുടിക്കുന്നു.

പുറത്തിറങ്ങാന്‍ നേരമാണതുകണ്ടത്. രണ്ടുകാലില്‍ നാലുകാലുള്ള ഷാപ്പിലേക്ക് പോയ ഒരു ചേട്ടന്‍ നാലുകാലില്‍ ഷാപ്പില്‍ നിന്നിറങ്ങുന്നു. നല്ല ഷോട്ടായിരിക്കുമെന്ന് വിചാരിച്ച് ഒരു ഫോട്ടോയെടുക്കാന്‍ കാമറ ഫോക്കസ് ചെയ്തപ്പോള്‍ ചേട്ടന്റെ ലേറ്റസ്റ്റ് പുറത്തിറങ്ങിയ ഒരു തെറി. അതുകേട്ട് അകത്തുള്ള സഹ കുടിയന്മാരിറങ്ങിവന്നു. ഒറ്റക്കാലില്‍ സ്കോര്‍പ്പിയോ ഓടിച്ച് പരിചയമില്ലാത്തതുകൊണ്ട് ഞാന്‍ ആ ശ്രമം ഉപേക്ഷിച്ചു.

കാശിനൊരു ആശീര്‍വ്വാദം

2007-02-16T23:05:00.000-08:00

ഗുരുവായൂര്‍ ആനക്കോട്ടയിലെ മറ്റൊരു ദൃശ്യം. ആനയെ തല്ലി ആശീര്‍വ്വാദം കൊടുപ്പിക്കുന്ന ഒന്നാം പാപ്പാനും കാശുതന്നില്ലെങ്കില്‍ തല്ലാന്‍ രണ്ടാം പാപ്പാനും.

കോവിലന്റെ മകന്‍..

2007-02-04T04:34:00.000-08:00

ലാറ്റിനമേരിക്കന്‍ നോവലിസ്റ്റും ഗോത്രവര്‍ഗ്ഗത്തില്‍ ജനിച്ചവനുമായ റിച്ചാര്‍ഡ് റൈറ്റ് ഒരിക്കല്‍ പറയുകയുണ്ടായി ‘Living in the past with regret is like killing yourself on the inside and throwing them to darkness‘. റൈറ്റിന്റെ എല്ലാ നോവലുകളിലും ഈ വാക്കുകളുടെ സുവ്യക്തമായ അനുരണനങ്ങള്‍ കാണാം. മലയാളത്തിലെ ഗോത്രസാഹിത്യത്തിന് ഒഴിച്ചുകൂടാനാവാത്ത സാന്നിദ്ധ്യമാണ് കോവിലന്‍. റിച്ചാര്‍ഡ് റൈറ്റിനെപ്പോലെ കോവിലനും ആത്മഹത്യചെയ്യപ്പെടാവുന്ന ഒരു ഭൂതകാലത്തിനുടമയാണ്. സംസ്കൃതിയെ രൂപപ്പെടുത്തിയ വംശമഹിമയുടെ എഴുത്തുകാരുടെ ഒരു കണിക കോവിലനിലുമുണ്ട്. കഥയായാലും നോവലായാലും കോവിലന്റെ കയ്യൊപ്പ് ഒന്ന് വേറിട്ടുതന്നെ നിന്നു. ‘മകന്‍‘ എന്ന കഥ അങ്ങനെയൊരു കൃതി തന്നെയാ‍ണ്. ഇന്നും ഈ കഥ മലയാള സാഹിത്യത്തില്‍ ഏറെ ചര്‍ച്ച ചെയ്യപ്പെടാതെ കിടക്കുന്നു.

ഈ കഥയിലെ ഒരോ വാക്കും തട്ടകത്തിലെ വെളിച്ചപ്പാടിനെപ്പോലെ ഉറഞ്ഞു തുള്ളുകയാണ്.
വിശപ്പിന്റെ വിളികള്‍.
‘ചോര ഞാന്‍ കുടിക്കും
ചോരയില്‍ കുളിക്കും
ചീറ്റുന്ന ചോരല്; ചിതറുന്ന ചോര;
മഴപോലെ ചോര; ചോരപ്പുഴ കണ്ടോ ?’ കഥ തുടങ്ങുന്നതു തന്നെ ചോരയുടെ മണവുമായാണ്.
ഗോപന്റെ വിശപ്പും ജീവന്റെ വിളികളും കഥയില്‍ മുഴുവന്‍ മുഴങ്ങുന്നു. ഇവിടെ കഥാകാരന്‍ ബൂര്‍ഷ്വകള്‍ക്കെതിരെയും തന്റെ വാളുയര്‍ത്തുന്നു.
‘ആ ഞാന്‍ അച്ഛനെക്കൊല്ലാന്‍ തീര്‍ച്ചയാക്കി. എങ്ങനെയാണ് കൊല്ലേണ്ടതെന്നാലോചിച്ചു.
കഴുത്തില്‍ മുണ്ടിട്ടു മുറുക്കിയിട്ടോ
അതോ
ആ വെട്ടുകത്തികൊണ്ട് ഒറ്റവെട്ടിന്....’ വാക്കുകള്‍ അതിശക്തമാവുന്നു. 47 - 48 കാ‍ലത്തെ കഥാ‍കാരന്റെ മാനസികാവസ്ഥയെ ശരിക്കും വെളിവാക്കുന്ന രചനതന്നെയാണിത്. വിദ്യഭ്യാസമെന്നത് ഭൌതികനേട്ടങ്ങളില്‍ ഏറ്റവുമുയര്‍ന്നതാണെന്നും അത് സ്വായത്തമാക്കാനാവാ‍ത്തതില്‍ മനം മടുക്കുന്ന ഒരാളുടെ മാനസികവ്യാപാരങ്ങള്‍ ഈ കഥയില്‍ മുഴുവനും നിഴലിച്ചുകാണാം.

കഥാഭാഷയുടെ ഘടനയില്‍ ആധുനികരുടേതായി എടുത്തുപറയുന്ന വ്യക്തമായ സ്വരഭേദത്തിന്റെ ആദിമരൂപങ്ങളിലേറെയും കോവിലന്റെ ഈ കഥകളിലാണ്. തീവ്രമായ ഒരു റിയലിസ്റ്റിക് ബോധത്തിന്റെ ആവിഷ്കാരങ്ങള്‍. എന്നിട്ടും കോവിലനെ അംഗീകരിക്കാന്‍ ഇത്രയും കാലമെടുത്തു. ഇന്നും ‘മകന്‍’ എന്ന ഈ കഥ നിരൂപകരുടെ പട്ടികയില്‍ വരാത്തത് തീര്‍ത്തും നിരാശാജനകമാണ്.

ഗുരുവായൂര്‍ മാധവന്‍കുട്ടി

2007-01-30T04:16:00.000-08:00

ഇവന്‍ ഗുരുവായൂര്‍ മാധവന്‍ കുട്ടി. എന്നുവെച്ച് കുട്ടിയൊന്നുമല്ല. നാല്പത്തിരണ്ട് വയസ്സുണ്ട് ചുള്ളന്. പിന്നെ, ദേവസ്വത്തിലെ ആനകളില്‍ കേമന്‍ ഇവന്‍ തന്നെ. കാരണം കഴിഞ്ഞ പതിനേഴുകൊല്ലമായിട്ട് ഇവനെ നിന്ന നില്‍പ്പില്‍ നിന്നും ആര്‍ക്കും മാറ്റിക്കെട്ടാന്‍ ധൈര്യമുണ്ടായിട്ടില്ല. ഏഴുപേരെ കുത്തിക്കുടല്‍മാലയെടുത്തിട്ടുണ്ട്. ഒരാളെയും അടുപ്പിക്കില്ല. കയ്യില്‍ കിട്ടിയതെടുത്ത് എറിയും. അതുകൊണ്ട് ഫോട്ടോ അത്ര നന്നായി കിട്ടിയില്ല. ആറുവര്‍ഷം മുന്‍പാണ് ഏറെ ശ്രമകരമായ ഒരു ഓപ്പറേഷനിലൂടെ ഇവന്റെ കൊമ്പ് മുറിച്ചത്. പലപ്പോഴും ചങ്ങല പൊട്ടിക്കാന്‍ ശ്രമിക്കുന്നു.
പാ‍പ്പാന്മാര്‍ രണ്ടുപേര്‍ക്കും പരമസുഖം. കാര്യമായ പണിയൊന്നുമില്ല. കാലത്ത് 12 മണിക്ക് പാലക്കാടുനിന്നും വരുന്ന പനമ്പട്ട റേഷനനുസരിച്ച് ആനയ്ക്കിട്ടുകൊടുക്കുക.
ആനക്കും പട്ട. പാപ്പാന്മാര്‍ക്കും പട്ട. മൊത്തം പട്ടമയം. ഗുരുവായൂരപ്പാ...

രണ്ടു രൂപയുടെ വില

2007-01-28T01:36:00.000-08:00

കഴിഞ്ഞ ദിവസം ചെറിയ അസുഖത്തെ തുടര്‍ന്ന് അമല(തൃശ്ശൂര്‍) ആശുപത്രിയില്‍ പ്രവേശിപ്പിച്ചിരുന്ന അമ്മാവന് ചായ വാങ്ങാന്‍ വേണ്ടിയാണ് ഞാന്‍ അവിടെ തന്നെയുള്ള കാന്റീലില്‍ ചെന്നത്. ഫ്ലാസ്കില്‍ ചായ വാങ്ങുന്ന സമയത്താണ് തൊട്ടടുത്ത് മധ്യവയസ്സ് പിന്നിട്ട ഒരു സ്ത്രീ നിന്നിരുന്നത്. അവര്‍ കഞ്ഞി വാങ്ങാന്‍ വന്നതാണ്.
കൌണ്ടറിലെ പയ്യനുമായി ചെറിയ വാക്കേറ്റം. പ്രശ്നം കഞ്ഞിയുടെ വിലയെ സംബന്ധിച്ചാണ്. കഞ്ഞിക്ക് പത്തുരൂപയാണ് വില. ആ സ്ത്രീയുടെ കൈവശം 8 രൂപയേ ഉള്ളുവെന്ന് പറയുന്നു. കൌണ്ടറിലെ പയ്യന്‍ അല്പം പരുഷമായിത്തന്നെയാണ് ആ സ്ത്രീയോട് ബാക്കി 2 രൂപ ചോദിക്കുന്നത്.
ആ സ്ത്രീ ദയനീയമായി അയാളെ നോക്കി.
‘ഒരു 2 രൂപയല്ലേ സുഹ്രുത്തേ.. ഞാന്‍ തരാം..’ എന്നു പറഞ്ഞ് ഞാനതെടുത്ത് കൊടുത്തു.
‘അല്ല സാറെ.. ഇത് ഇവരുടെ സ്ഥിരം പരിപാടിയാ..’
ഞാന്‍ ആ സ്ത്രീയെ നോക്കി. ഏകദേശം അറുപതോളം വയസ്സു തോന്നിക്കും. ഇളം മഞ്ഞ സാരിയും ബ്ലൌസുമാണ് വേഷം. അധികം ഉയരമില്ല. മുഖത്ത് നല്ല ക്ഷീണവുമുണ്ട്.
എനിക്ക് തോന്നി അവര്‍ കള്ളം പറയുകയല്ലെന്നു..ഇല്ല.. ഇവര്‍ക്കതിനാവില്ല.
ഞങ്ങള്‍ ഒരുമിച്ചാണ് പുറത്തിറങ്ങിയത്.
‘അമ്മായിയുടെ ആരാ ആശുപത്രിയില് ? ‘
ആ സ്ത്രീ എന്റെ മുഖത്തേക്ക് നോക്കി.
‘മോനു തോന്നുന്നുണ്ടോ ഞാന്‍ കള്ളം പറയുമെന്ന് ? ‘ അവരുടെ സ്വരം ഇടറിയിരുന്നു.
ഒരു നിമിഷത്തെ മൌനത്തിനു ശേഷം ആ സ്ത്രീ പറഞ്ഞു തുടങ്ങി.

തൃശ്ശൂര്‍ ജില്ലയിലെ ആമ്പല്ലൂരടുത്ത് കല്ലൂര്‍ സ്വദേശിനിയാണവര്‍. ഭര്‍ത്താവ് നേരത്തെ മരിച്ചു പോയി. .ഒരു മകനും മകളുമടങ്ങിയ കുടുംബം. കൂലിപ്പണിക്കാരാണ്. അന്നന്ന് കിട്ടുന്നതുകൊണ്ട് വേണം ജീവിക്കാന്‍. മകന് 28 വയസ്സുണ്ട്. പെയിന്റടിക്കുന്ന പണിയാണ്. മകളുടെ വിവാഹം കഴിഞ്ഞു. മകളുടെ ഭര്‍ത്താവിന്റെ അമ്മയുമായുള്ള പ്രശ്നങ്ങള്‍ കാരണം മകളും രണ്ടുകുട്ടികളും ഇപ്പോള്‍ ഇവരുടെ കൂടെ തന്നെയാണ് താമസം. മകള്‍ ചെറിയ പണികള്‍ക്ക് പോകും. മൂന്നുമാസം മുന്‍പ് ഒരു ദിവസം, പെയിന്റ് പണിക്ക് പോയിരുന്ന മകന് കഠിനമായ വയറുവേദന. നാട്ടിലെ പല ഡോക്ടര്‍മാരെയും കാണിച്ചു. പിന്നീട് ജൂബിലി മിഷന്‍ ആശുപത്രിയില്‍ നിന്നാണ് അവരെ അമല ആശുപത്രിയിലേക്ക് റെഫര്‍ ചെയ്തത് . പരിശോധനകള്‍ക്കൊടുവിലാണ് മകന് ബ്ലഡ് കാന്‍സറാണെന്നറിയുന്നത്. അതും രോഗത്തിന്റെ മൂര്‍ദ്ധന്യാവസ്ഥയിലും. കഴിഞ്ഞ മൂന്നുമാസമായി ഈ അമ്മയും മകനും ഇവിടെയുണ്ട്. പല ഉദാരമതികളുടെയും സഹായം കൊണ്ടുമാത്രമാണ് ഇതുവരെയും ചികിത്സ മുടങ്ങാതെ പോകുന്നത്. മകനെ തിരിച്ച് കിട്ടുമെന്ന പ്രത്യാശ അവരുടെ കണ്ണുകളില്‍ നിഴലിച്ചുകണ്ടു. മിക്ക ദിവസങ്ങളിലും ആശുപത്രിയുടെ ഉച്ചക്കഞ്ഞി ഉണ്ടാവും. ചില ദിവസങ്ങളില്‍ അത് മുടങ്ങും. അങ്ങനെയുള്ള ഒരു ദിവസമായിരുന്നു തലേന്ന് എന്നാണവര്‍ പറഞ്ഞത്.
‘മകന്‍ കുറെ പടം വരക്കും. മോനു സൌകര്യമുണ്ടെങ്കില്‍ വന്നാല്‍ കാണിച്ചു തരാം.’ എന്നും പറഞ്ഞ് അവര്‍ കാന്‍സര്‍ വാര്‍ഡിലേക്കും ഞാന്‍ ചായയുമായി അമ്മാവനടുത്തേക്കും പോയി.

എല്ലാ വെക്കേഷനും ഞാന്‍ അമലയുടെ ഫൌണ്ടര്‍ ഡയറക്ടറായ ഗബ്രിയേലച്ചനെ കാണാറുണ്ട്. അദ്ദേഹവുമായി എന്റെ സൌഹൃദം പങ്കുവെക്കാറുണ്ട്. എന്നെക്കൊണ്ടാവുന്ന സഹായങ്ങള്‍ ചെയ്യാറുമുണ്ട്. ഇത്തവണ കണ്ടപ്പോള്‍ അദ്ദേഹം വളരെ ക്ഷീണിതനായിരിക്കുന്നു. വളരെ സ്വരം താഴ്ത്തിയാണ് അദ്ദേഹം സംസാരിക്കുന്നത്. അതിനിടയിലാണ് എന്റെ സുഹൃത്തും ഗാസ്ട്രോ എന്റോളജി വകുപ്പിന്റെ ഹെഡുമായ ഡോ. റോബര്‍ട്ട് അവിടെ വന്നത്. അദ്ദേഹത്തോട് മേല്‍പ്പറഞ്ഞ രോഗിയെക്കുറിച്ച് അന്വേഷിച്ചു. ആര്‍ക്കും വലിയ പ്രതീക്ഷയില്ല. ഡോ. റോബര്‍ട്ട് തിരക്കിലായതിനാല്‍ അദ്ദേഹത്തിന്റെ സഹായിയായ ബാബുവിനെയും കൂട്ടിയാണ് ഞാന്‍ കാന്‍സര്‍ വാര്‍ഡില്‍ ചെന്നത്.

ഹൃദയഭേദകമായ ദൃശ്യങ്ങള്‍.
ജീവനത്തിന്റെ മറ്റൊരു മുഖം. കാന്‍സര്‍ എന്ന രോഗത്തിന്റെ എല്ലാ അര്‍ത്ഥാന്തരങ്ങളും അവിടെ കണ്ടു. പലരും ഒരു നേരത്തെ ഭക്ഷണത്തിനു പോലും കഷ്ടപ്പെടുന്നവര്‍.
പലരും വേദനകൊണ്ട് പുളയുന്നു. സിസ്റ്റേഴ്സ് അവരെ സാന്ത്വനപ്പെടുത്തുന്നു.

ഒരു കാര്യം ശ്രദ്ധയില്‍ പെട്ടത് കൂടുതല്‍ രോഗികളും പാലക്കാട് ജില്ലയിലെ നെന്മാറ, കൊഴിഞ്ഞാമ്പാറ പ്രദേശങ്ങളില്‍ നിന്നുള്ളവരായിരുന്നു. ഒരു പക്ഷേ മറ്റുള്ളവരെല്ലാം പേവാര്‍ഡിലായതിനാലാവും അവരെ മാത്രം ഇവിടെ കാണാനായത്..ദിവസവും അവര്‍ക്ക് മരുന്നും ഭക്ഷണവും നല്‍കാന്‍ ആശുപത്രി ശരിക്കും കഷ്ടപ്പെടുന്നുണ്ടെന്ന് ബാബു പറഞ്ഞു.

ആ അമ്മയെയും മകനെയും അവിടെ കണ്ടു. അവരുടെ അവസ്ഥ വിവരിക്കാന്‍ എനിക്ക് വാക്കുകളില്ല. ഒരു വശത്ത് അടുക്കി വെച്ചിരിക്കുന്ന ചിത്രങ്ങള്‍ ശ്രദ്ധാപൂര്‍വ്വം കാണുവാനും എനിക്ക് മനസ്സുവന്നില്ല.

തിരിച്ചിറങ്ങുമ്പോഴാണ് ആ രണ്ടുരൂപക്ക് നല്ല വിലയുണ്ടെന്ന് എനിക്ക് മനസ്സിലായത്.

വാല്‍ക്കഷണം :
കഴിഞ്ഞ ദിവസം ഗബ്രിയേലച്ചന് പദ്മഭൂഷന്‍ പുരസ്കാരം ലഭിച്ചുവെന്നറിഞ്ഞു.
കാന്‍സര്‍ രോഗികളുടെ മരുന്നിനും ഭക്ഷണത്തിനുമായി അമല ആശുപത്രി ഉദാരമതികളില്‍ നിന്നും സംഭാവനകള്‍ പ്രതീക്ഷിക്കുന്നു. താത്പര്യമുള്ളവര്‍ താഴെക്കാണുന്ന വിലാസത്തില്‍ ബന്ധപ്പെടുക.

The Director
Amala Institute of Medical Science,
Amala Nagar,
Thrissur – 680 055, Kerala
Tel : +91-487-2304100
Email : amalaims@sancharnet.in

മൃഗയാ വിനോദങ്ങള്‍

2007-01-23T01:08:00.000-08:00

തൃശ്ശൂരിലെ ഇലക്ട്രോണിക് ഷോപ്പായ ‘ജി-മാര്‍ട്ടിന്റെ’ ഉടമ ശ്രീ ഗോപു നന്ദിലത്ത്, തന്റെ സ്വന്തം പേരിട്ട് വിളിക്കാനായി ഗുരുവായൂരമ്പലത്തില്‍ നടയിരുത്തിയ ഗോപു എന്ന ആന.
വെള്ളം കണ്ടാല്‍ അവന് സ്വതന്ത്രമായി ഒന്ന് നീന്തി തുടിക്കണം.

ആ സമയം തന്നെ കണ്ട്രോള്‍ ചെയ്യാന്‍ ഒരു പാപ്പാന്‍ ഉണ്ടെന്ന കാര്യം മറക്കുക സ്വാഭാവികം.

ഫലമോ അരമണിക്കൂറ് നീന്തി തുടിച്ച് കയറിവന്നുകഴിഞ്ഞാല്‍ പാപ്പാന്‍ തന്റെ സ്വാഭാവം കാണിക്കും.

നാലുകാലും നാല് തെങ്ങില്‍ കെട്ടി ചിന്നം വിളിക്കാതിരിക്കാന്‍ തുമ്പിക്കൈയ്യില്‍ പട്ടപിടിപ്പിച്ച് ഒന്നാം പാപ്പാനും രണ്ടാം പാപ്പാനും സര്‍വ്വ ശക്തിയുമെടുത്ത് പൂശുന്നു.
(ഈ പടം അല്പം റിസ്കോടെയാണെടുത്തത്. രണ്ടാമതൊരു പടമെടുക്കാന്‍ സഹ പാപ്പാന്മാര്‍ എന്നെ അനുവദിച്ചുമില്ല.)

തപ്പറമ്പ് പൂരവും തെച്ചിക്കോട്ടുകാവ് രാമചന്ദ്രനും

2007-01-16T05:43:00.000-08:00

ഇന്ന് കാക്കശ്ശേരി വൈലിക്കുളങ്ങര ഭഗവതി ക്ഷേത്രത്തില്‍ പൂരം. ഭഗവതിയുടെ തിടമ്പ് ഏറ്റിയിരിക്കുന്നത് തെച്ചിക്കോട്ടുകാവ് രാമചന്ദ്രന്‍.
ഇത്രയും കാലം വിലസി നടന്നിരുന്ന ചിറക്കല്‍ മഹാദേവനും ഗുരുവായൂര്‍ വലിയ കേശവനുമെല്ലാം രാമചന്ദ്രന്റെ മുന്നില്‍ നിഷ്പ്രഭമായി. മഹാദേവന്‍ നീരൊലിപ്പിന്റെ ചെറിയ ലക്ഷണങ്ങള്‍ കാണിച്ചുതുടങ്ങിരിക്കുന്നു. കുറെ കാലമായി തെച്ചിക്കോട്ടുകാവ് രാമചന്ദ്രന്‍ ഉത്സവകാലം മുഴുവന്‍ മദപ്പാടിലായിരുന്നു. കഴിഞ്ഞ വര്‍ഷമാണതിനൊരു വിരാമമായത്. ഇപ്പോള്‍ മദപ്പാടിന്റെ സമയം മാറി. പിന്നെ നല്ല കുറുമ്പും. ഇപ്പോള്‍ അല്പം ശമനമുണ്ട്. പത്തുമിനിട്ട് മുന്‍പ് എന്റെ മൊബൈല്‍ ഫോണില്‍ ഈ മൂന്നാനകളുടെയും കൂട്ടിയെഴുന്നെള്ളിപ്പിന്റെ പടമെടുത്തു. എല്ലാവര്‍ക്കുമായി സമര്‍പ്പിക്കുന്നു. http://i98.photobucket.com/albums/l241/kuttamenon/Image013.jpg

ബബന്‍ സിംഗ് യാദവും കേസരിയും

2006-12-10T23:56:00.000-08:00

കമ്പനിയിലെ ബീഹാറിയായ ബബന്‍ സിംഗ് യാ‍ദവ് കഴിഞ്ഞ കുറെ നാളുകളായി എന്നോട് ഒരു ഹോം മെയ്ഡ് സ്വീറ്റ് ഉണ്ടാക്കി കൊണ്ടുവരാന്‍ പറയുന്നു. കമ്പനിയിലെ ബയറായ യാദവ് നല്ല ഒരു തീറ്റെറപ്പായിയും കൂടിയാണ്. കഴിഞ്ഞ ദിവസം ഡിപ്പാര്‍ട്ടുമെന്റില്‍ കെന്റക്കി ചിക്കണ്‍ വാങ്ങിയപ്പോള്‍ ഡയറ്റു ചെയ്യുന്ന ചില മാന്യന്മാര്‍ കോഴിയുടെ തൊലിപ്പുറമെല്ലാം നീക്കി കൊഴുപ്പുമാറ്റാന്‍ ഒരു ശ്രമം നടത്തിയിരുന്നു. മാറ്റിയ തൊലിപ്പുറമെല്ലാം ‘മസ്ത് ഹെ’ എന്നും പറഞ്ഞ് യാദവ് വെച്ച് നീക്കി . പിന്നെ രണ്ടേകാല്‍ ലിറ്ററിന്റെ ഒരു പെപ്സിക്കുപ്പിയുടെ കാല്‍ ഭാഗം മാത്രം ബാക്കി വെച്ച് ഒരു ഏമ്പക്കവും വിട്ട് തന്റെ കറങ്ങുന്ന കസേരയില്‍ ചെന്നിരുന്നപ്പോഴാണ് വീണ്ടും ആ റിമൈന്‍ഡര്‍ എനിക്കിട്ടത്.

വീട്ടിലെത്തി ഞാന്‍ കുറച്ച് നേരം ആലോചിച്ചു. ഒരു കറിയുണ്ടാക്കുന്ന അത്ര എളുപ്പമല്ല ഒരു സ്വീറ്റ് ഉണ്ടാക്കി ഫലിപ്പിക്കുകയെന്നത്. സൂവിന്റെ കറിവേപ്പിലയില്‍ കുറെ തപ്പി നോക്കി. അവിടെയും മധുരമുള്ള നമ്പറുകള്‍ കുറവ്. (ഒരു പക്ഷേ ബ്ലോഗര്‍മാരെല്ലാവരും മധുരം കഴിച്ച് അതുല്യചേച്ചിയുടെ പുതിയ ഓഫീസ് സെറ്റപ്പിന്റെ പ്രേതം കൂടേണ്ടതില്ലല്ലോയെന്ന നല്ല മനസ്സാവാം.) .

പിന്നെ നേരെ കിച്ചണില്‍ കയറി ഒരു ഇന്വെന്ററിയെടുത്തു. കാര്യമായൊന്നും തടഞ്ഞില്ല.
അപ്പോഴാണ് നിഡോയുടെ ഒരു ടിന്ന് വെറുതെയിരിക്കുന്നത് ശ്രദ്ധിച്ചത്. നോക്കിയപ്പോള്‍ പകുതിയോളം റവ. തലയില്‍ 100 വാട്ടിന്റെ ഫ്ലാഷ് മിന്നി.

ഒരു കേസരി തന്നെ പൂശാം. ഫ്രിഡ്ജില്‍ നോക്കിയപ്പോള്‍ ഇന്ന് കാലാവധികഴിയുന്ന അര ലിറ്റര്‍ മറായിയുടെ മില്‍ക് സുസ്മേരവദനനായി ഇരിക്കുന്നു. നോണ്‍സ്റ്റിക്കിന്റെ വായ്‌വട്ടമുള്ള ഒരു പാത്രം നേരെ അടുപ്പില്‍ കയറ്റി തീപൂട്ടി. വെറുതെ ഒരു രസത്തിന് രണ്ട് ടീസ്പൂണ്‍ ബട്ടറെടുത്തിട്ട് അതിലിട്ടു. ചൂടായി വന്ന സമയത്ത് പാലെടുത്തൊഴിച്ചു. പിന്നെ തിളച്ചു തുടങ്ങിയപ്പോള്‍ മെല്ലെ ഇളക്കിത്തുടങ്ങി. പഞ്ചസാര ടിന്നില്‍ നിന്നും രണ്ടു കുഞ്ഞിക്കയില്‍ പഞ്ചസാരയും ചേര്‍ത്തിളക്കി. പിന്നെ കുറച്ച് സഫ്രോണിന്റെ പൊടി ഒരു നുള്ളും ചേര്‍ത്തു. വീണ്ടും ഇളക്കി. തീകുറച്ച് ഒരു മൂന്നു കുഞ്ഞിക്കയില്‍ റവയും ചേര്‍ത്ത് നന്നായി ഇളക്കി. മൊത്തത്തില്‍ ഒന്ന് കുറുകി വന്നപ്പോള്‍ ബട്ടര്‍ പേപ്പര്‍ നിരത്തിയ ഒരു സ്റ്റീല്‍ പ്ലേറ്റിലേക്ക് അത് പകര്‍ന്നു. കുറച്ചു നേരം ഫ്രിഡ്ജില്‍ വെച്ചു.

ഇന്നലെ കാലത്ത് ഫ്രിഡ്ജില്‍ നിന്നുമെടുത്ത് ഒരു കത്തിയെടുത്ത് കലാപരമായി കുറെ വെട്ടും കുത്തും നടത്തി ഒരു പാത്രത്തിലാക്കി ഓഫീസില്‍ കൊണ്ടുവന്നു. കേസരിയെന്നുവിളിക്കുന്ന ഈ സാധനം ഒരു മൈസൂര്‍പാക്ക് പരുവത്തിലാണിപ്പോള്‍ ഇരിക്കുന്നത്. കഴിച്ചവര്‍ കഴിച്ചവര്‍ കുഴപ്പമില്ലെന്നു പറഞ്ഞു. ബബന്‍ സിംഗ് യാദവ് അതില്‍നിന്നും പകുതിയിലേറെയും വച്ച് നീക്കി. ‘മസ്ത് ഹെ’ എന്ന് കമന്റും കിട്ടി. ഇനിയും ഇതുപോലുള്ള ഐറ്റംസ് കൊണ്ടുവരണമെന്ന് പറഞ്ഞു ഒരു ഏമ്പക്കവും വിട്ടു.

ഇന്ന് ഇതുവരെയായിട്ടും ബബന്‍ സിംഗ് യാദവ് ഓഫീസിലെത്തിയിട്ടില്ല. മൊബൈലും ഓഫ്.
ദൈവമേ .. ഇനി ഞാന്‍ വല്ല നേര്‍ച്ച നേരേണ്ടി വരുമോ എന്തോ....

ഒരു പോസ്റ്റ്പെയ്ഡ് കദനകഥ

2006-12-02T23:24:00.000-08:00

ഇവിടെ ഒരു ഒപ്റ്റിക്കല്‍ ഷോപ്പിലെ ജീവനക്കാരനാണ് നൌഷാദ്. വളരെ ചുരുങ്ങിയ വേതനത്തിലാണ് നൌഷാദ് ജോലി ചെയ്യുന്നത്.
രണ്ടാഴ്ച മുന്‍പൊരു ദിവസം‍ നൌഷാദിന്റെ ഉപ്പ മരിച്ചെന്ന ഫോണ്‍ വന്നു. ഷോപ്പിലെ മുതലാളിയുടെ കാരുണ്യം കൊണ്ട് പെട്ടന്നൊരു ടിക്കറ്റും സംഘടിപ്പിച്ച് നൌഷാദ് നാട്ടിലേക്ക് യാത്ര തിരിച്ചു. ബോര്‍ഡിങ്ങ് പാസും വാങ്ങി എമിഗ്രേഷന്‍ കൌണ്ടറിലെത്തിയപ്പോഴാണ് അറിയുന്നത് നൌഷാദിനെ ബ്ലാക് ലിസ്റ്റ് ചെയ്തിരിക്കുന്നു. കൂടുതല്‍ വിവരങ്ങള്‍ തിരക്കിയപ്പോഴാണറിയുന്നത് നൌഷാദിന്റെ പോസ്റ്റ്പെയ്ഡ് മൊബൈലിന്റെ ബില്‍ പേ ചെയ്തിട്ടില്ലെന്നും ഫൈനടക്കം 640 ദിനാര്‍ ( ഏകദേശം ഒരു ലക്ഷം രൂപ)അടച്ച് കോടതിയിലെ കേസ് ഒത്തുതീര്‍പ്പാക്കിയാലേ രാജ്യം വിട്ടുപോകാനാവുയെന്നും.
സ്വന്തമായി ഇന്നും ഒരു മൊബൈലില്ലാത്ത നൌഷാദ് അവിടെ വെച്ച് ശരിക്കും ബോധം കെട്ടു.
പിന്നീടുള്ള അന്വേഷണത്തിലറിഞ്ഞത്
നാലുവര്‍ഷം മുന്‍പ് നൌഷാദ് നിന്നിരുന്ന ഒപ്റ്റിക്കല്‍ ഷോപ്പിലെ ഫിലിപ്പീനിയായ മറ്റൊരു സെയിത്സ് ഗേള്‍ ചെയ്ത പരിപാടിയായിരുന്നു ഇത്. നൌഷാദില്ലാത്ത സമയത്ത് ഇക്കാമയുടെ കോപ്പിയും നൌഷാദിന്റെ കള്ളൊപ്പുമിട്ട് അവള്‍ ഒരു പോസ്റ്റ്പെയ്ഡ് ലൈന്‍ എടുത്തു. ആദ്യമൊക്കെ മുറയ്ക്ക് ബില്ലടച്ചു. പിന്നീട് ഏകദേശം ആറുമാസത്തേക്ക് അവള്‍ പൈസയടച്ചില്ല. ലാവിഷായി ഫോണ്‍ വിളിച്ചു.
അവസാനം എം.ടി.സി ലൈന്‍ കട്ട് ചെയ്തു.
ഒരു വര്‍ഷം മുന്‍പ് അവള്‍ ഇവിടം വിട്ടുപോകുകയും ചെയ്തു.
പിന്നിട് എം.ടി.സി കേസാക്കി. അവസാനം ഇന്റീരിയര്‍ മിനിസ്ട്രി നൌഷാദിനെ ബ്ലാക് ലിസ്റ്റു ചെയ്തു.

ഇക്കാര്യങ്ങളെല്ലാം എം.ടി.സിയോട് നൌഷാദ് രേഖാമൂലം എഴുതി നല്‍കി. ഒരു രക്ഷയുമില്ല.

ഇന്നും നൌഷാദിന് നാട്ടില്‍ പോകാനായിട്ടില്ല.

വാല്‍ക്കഷണം : മൊബൈല്‍ ഫോണുള്ളവര്‍ക്കും ഇല്ലാത്തവര്‍ക്കും ഇതൊരു ഗുണപാഠമാവട്ടെ.

എന്റെ തക്കുടുവിനിന്ന് ജന്മദിനം

2006-11-28T21:34:00.000-08:00

തക്കുടുവെന്ന് വിളിക്കുന്ന എന്റെ മകള്‍ അനിലയ്ക്ക് ഇന്ന് ജന്മദിനം. ജന്മദിന സമ്മാനമായി ഓണ്‍ലൈനായി ഞാനയച്ച ഒരു പുസ്തകത്തോടൊപ്പം ചോക്കലേറ്റും കൂടി വെക്കാത്തതിന് നേരിയ പരിഭവം. അടുത്തമാസം വരുമ്പോള്‍ കണക്കു തീര്‍ക്കാമെന്ന് സമാധാനിപ്പിച്ചിരുത്തി. ഇന്ന് ക്ലാസ്സിലെല്ലാവര്‍ക്കും ചോക്കലേറ്റ് കൊടുക്ക്കണം, പുതിയ ഡ്രസ്സിട്ട് ക്ലാസ്സില്‍ പോകണം, നിമിഷയ്ക്ക് ഞാന്‍ ഒരു എക്സ്ട്രാ ചോക്കലേറ്റു കൂടി കൊടുക്കും അവള്‍ എന്റെ ബെസ്റ്റ് ഫ്രന്റല്ലേ എന്നൊക്കെ ഇന്നലെ രാത്രി ചാറ്റില്‍ വന്ന് കൊഞ്ചിയപ്പോള്‍ ഇനിയും ഒരു മൂന്നാഴ്ചകൂടി കഴിഞ്ഞാലല്ലേ എനിക്ക് നാട്ടിലെത്താനാവൂയെന്ന വിഷമം മാത്രമായിരുന്നു മനസ്സില്‍.